چەتئەل تاراتقۇلىرىنىڭ ئۇچۇرىغا قارىغاندا، چەتئەلدە ئالقىشقا ئېرىشكەن B2C ئېلېكترونلۇق سودا سۇپىسى GearBest يېقىندا شىياۋمى 5 نىڭ ئۇچۇرلىرىنى ئاشكارىلىغان. تونۇشتۇرۇلۇشىچە، بۇ يانفونغا 5.2 دىيۇملۇق ئېكران، 4GB لىق ئىچكى ساقلىغۇچ، سنەپدراگون 820 قاتارلىقلار سەپلىنىدىغان بولۇپ، 20-فېۋرال ئېلان قىلىنىدىكەن، شۇ كۈنى ياكى ئەتىسىدىن باشلاپ سېتىلىشقا باشلايدىكەن.

       GearBest تور بېكىتىدە شىياۋمى 5 نىڭ سۈرىتى ۋە قاتتىق دېتال سەپلىمىسىگە ئائىت بىر قىسىم ئۇچۇرلار ئاشكارىلانغان. ھالبۇكى، بۇ سۈرەت ئەمەلىيەتتە ئىلگىرى مىكرو بىلوگدا ئاشكارىلانغىنى بىلەن بىردەك بولۇپ، سۈرەتتىكى شىياۋمى 5 نىڭ شەكلىدە ھىچقانداق ئۆزگىرىش يوقكەن، ئۇنىڭ ئۈستىگە، بۇ ھەرگىزمۇ شىياۋمى ئورگان تورى تەمىنلىگەن ئۇچۇر ئەمەسكەن.

      شىياۋمى 5 نىڭ سەپلىمىسى ھەققىدىكى ئۇچۇرلارغا قارىغاندا، شىياۋمى 5 گە ئېنىقلىق دەرىجىسى 2K گە، پىكسېل زىچلىقى 565PPI گە يېتىدىغان 5.2 دىيۇملۇق ئېكران، 4GB لىق ئىچكى ساقلىغۇچ، 16GB لىق ئاساس ساقلىغۇچ، ئالدىغا سەككىز مىليون پىكسېللىق، ئارقىسىغا 16 مىليون پىكسېللىق كامېرا قاتارلىقلار سەپلىنىدىكەن، LED چىرىغى ئورنىتىلىدىكەن. بۇ يانفوننىڭ يەنە 64GB لىق نۇسخىسىمۇ ئېلان قىلىنىدىكەن.

        بۇندىن باشقا، شىياۋمى 5 گە سنەپدراگون 820 تىپلىق يېڭى بىر تەرەپ قىلغۇچ سەپلىنىدىغان بولۇپ، بارماق ئىزىنى تونۇش سېنىزورى home كۇنۇپكىسىغا ئورنىتىلىدىكەن، LTE 4G تورى ۋە قوش كارتىنى تەڭ قوللايدىكەن، باتارىيە سىغىمى 3600 مىللىئامپىر بولىدىكەن. ئاندىرويىد 5.1 ئاساسىدا ئۆزگەرتىلگەن MIUI 7 سىستېمىسى قاچىلىنىدىكەن، قارا، ئاق ۋە ئالتۇن رەڭلىك نۇسخىسى بازارغا سېلىنىدىكەن.

        چەتئەل تاراتقۇلىرى دۆلەت ئىچىدىن تارقالغان ئۇچۇرلارغا ئاساسەن، شىياۋمى 5 نىڭ 20-فېۋرال ئېلان قىلىنىدىغانلىقىنى، شۇ كۈنى ياكى ئەتىسىدىن باشلاپ رەسمىي سېتىلىدىغانلىقىنى خەۋەر قىلغان، بىراق، بۇ يانفوننىڭ باھاسىنى ئاشكارىلىمىغان. بۇندىن ئىلگىرىكى ئۇچۇرلاردا، شىياۋمى 5 نىڭ ئاساس گەۋدىسىگە مېتال ۋە ئەينەك ماتىرىيال قىلىنىدىغان ئىككى خىل نۇسخىسى بارلىقى، 5.2 دىيۇملۇق ئېكران سەپلىنىدىغانلىقى، ئېنىقلىق دەرىجىسى 1080p ۋە 2K دەپ ئىككى خىلغا ئايرىلىدىغانلىقى، 3GB لىق ئىچكى ساقلىغۇچ ۋە NFC تېخنىكىسى ئىشلىتىلىدىغانلىقى قاتارلىقلار تىلغا ئېلىنغان.

ئەلۋەتتە، يۇقارقى ئۇچۇرلار يەنىمۇ ئىلگىرلىگەن ھالدا دەلىللەشنى تەلەپ قىلىدۇ، شىياۋمى 5 نىڭ باھار بايرىمىدىن كىيىن ئېلان قىلىنىدىغانلىقىنى جەزىملەشتۈرۈشكە بولىدۇ، ئەمما كۆپچىلىكنىڭ ئەڭ كۆڭۈل بۆلۈۋاتقىنى ئۇنىڭ سېتىلىش باھاسىنىڭ قانداق بولىدىغانلىقى، يەنى 1999 يۈەن بولامدۇ ياكى 3000 يۈەنگە يىقىنلىشامدۇ بۇنىڭغا ئېنىق بىر نېمە دېگىلى بولمايدىكەن.