رۇسىيە «پاكىت ۋە ئەمەلىيەت» گېزىتىنىڭ 24-يانۋاردىكى خەۋىرىگە قارىغاندا، نورۋېگىيە 280 نەپەر مۇساپىرنى رۇسىيەگە يەتكۈزۈپ بېرىشنى پىلانلىغان بولۇپ، نۆۋەتتە مۇساپىرلار تىزىملىكى تەييار قىلىنغان. نورۋېگىيە ھۆكۈمىتى بىلەن مۇساپىرلارنى توشۇش كېلىشىمى ئىمزالىغان مورمانىسكى تىرانسىپورت شىركىتىنىڭ دېرىكتورى مۇنداق دېگەن: «نورۋېگىيە ھۆكۈمىتىدە 280 مۇساپىرنىڭ ئىسمى يېزىلغان بىر پارچە تىزىملىك بار، بۇنىڭ ئىچىدىكى 80 ئادەم ھازىر نورۋېگىيە بىلەن رۇسىيە چېگرىلىنىدىغان كېركىنىس شەھىرىدىكى مۇساپىرلار لاگېرىدا، قالغان مۇساپىرلار باشقا شەھەردە، لېكىن مۇۋاپىق ۋاقىتتا ئۇلارنى كېركىنىس شەھەرىگە ئېلىپ كېلىپ، ئاندىن ھەممىسىنى بىللە رۇسىيەگە ئاپىرىپ قويۇشقا ھازىرلاندۇق».

      خەۋەرلەرگە قارىغاندا، بۇ 280 نەپەر مۇساپىرنىڭ ھەممىسىنىڭ رۇسىيە ۋىزىسى ياكى رۇسىيەدە تۇرۇش كېنىشكىسى بار ئىكەن. نورۋېگىيە تەرەپنىڭ ۋەكىلى بۇنىڭدىن ئىلگىرى، بۇ مۇساپىرلارنىڭ نورۋېگىيەگە قېچىپ كېلىشتىن ئىلگىرى رۇسىيەدە نەچچە ئاي ھەتتا نەچچە يىل تۇرغانلىقىنى، شۇڭا بۇ كىشىلەرنىڭ نورۋېگىيەگە قېچىپ كېلىشى ھەرگىزمۇ ھاياتىنىڭ تەھدىتكە ئۇچرىشى سەۋەب بولماستىن بەلكى تۇرمۇشىنى ياخشىلاش ئۈچۈن ئىكەنلىكىنى، شۇڭا بۇ كىشىلەرنىڭ نورۋېگىيەدە پاناھلىنىش ھوقۇقى بىكار قىلىنغانلىقىنى بىلدۈرگەن.