ئاق ساراي چوڭ قۇرۇقلۇق بىلەن تەيۋەننى چوڭ سايلام مەزگىلدە ئۆزىنى بېسىۋېلىشقا مۇراجىئەت قىلدى   

     تەيۋەن مىنجىن پارتىيەسىنىڭ رەئىسى سەي يىڭۋېن

   «يەر شارى تورى خەۋىرى» ئەنگلىيە رېيتېر ئاگېنتلىقىنىڭ 14-يانۋاردىكى خەۋىرىگە قارىغاندا، پات ئارىدا تەيۋەن رايونىدا چوڭ سايلام ئېلىپ بېرىلىدىغان بولغاچقا، يەنە كېلىپ مىنجىن پارتىيەسىنىڭ نامزاتى سەي يىڭۋىن سايلامدا غەلىبە قىلىدۇ، دەپ قارالغاچقا، ئاق ساراي جۇڭگو چوڭ قۇرۇقلۇقى بىلەن تەيۋەننى «چوڭ سايلام» مەزگىلىدە ئىككى تەرەپنى ئۆزىنى بېسىۋېلىشقا، تەيۋەن ۋەزىيەتىنىڭ جىددىيلىشىپ كېتىشىدىن ساقلىنىشقا مۇراجىئەت قىلغان.

     ئامېرىكا زۇڭتۇڭى ئوبامانىڭ قوشۇمچە دۆلەت بىخەتەرلىك مەسلىھەتچىسى رودوس ئاخبارات ئېلان قىلىش يىغىنىدا:«شەنبە كۈنىدىكى سايلامدا مەيلى كىمنىڭ يېڭىپ چىقىشىدىن قەتئىي نەزەر، ئامېرىكا تەيۋەن ۋە چوڭ قۇرۇقلۇقنىڭ ئوتتۇرىدىكى مەسىلىلەرنى تىنچ ئۇسۇل بىلەن ھەل قىلىشىنى ئۈمىد قىلىدۇ»دېگەن.

     رودوس:«بىزنىڭچە، ۋەزىيەتنىڭ جىددىيلىشىپ كېتىشى، ئىككىلا تەرەپنىڭ مەنپەئەتىگە ئۇيغۇن كەلمەيدۇ. بىز ئىككى تەرەپنىڭ سوغۇنقانلىق بىلەن سۆھبەتلىشىشىنى ئۈمىد قىلىمىز. ئامېرىكا بۇ قېتىملىق چوڭ سايلامدا خالىس مەيداندا تۇرىدۇ ھەمدە تەيۋەن بىلەن چوڭ قۇرۇقلۇقنىڭ بۇرۇنقى سۆھبىتىنى داۋاملاشتۇرۇشىنى قوللايدۇ»دېگەن.

گومىن پارتىيەسىنىڭ رەئىسى جۇ لىلۈن

ئىگىلىنىشىچە، تەيۋەن مىنجىن پارتىيەسىنىڭ رەئىسى سەي يىڭۋېن بۇ قېتىملىق چوڭ سايلامدىكى ئەڭ قىزىق نۇقتا بولۇپ قالغان، بىراق ئۇنىڭ چوڭ قۇرۇقلۇققا يۈرگۈزمەكچى بولغان سىياسىتى ئىككى قىرغاق مۇناسىۋىتىنى يامانلاشتۇرۇۋېتىشتەك يامان ئاقىۋەت پەيدا قىلىدىكەن. باشقا ئىككى پارتىيەنىڭ نامزاتى گومىن پارتىيەسىنىڭ رەئىسى جۇ لىلۈن ۋە چىنمىن پارتىيەسىنىڭ رەئىسى سوڭ چۇيۈنى ئۆز ئىچىگە ئالىدىكەن.

چىنمىن پارتىيەسىنىڭ رەئىسى سوڭ چۇيۈ

ئامېرىكا «بىر جۇڭگو سىياسىتى»دە چىڭ تۇرۇپ كەلگەن، يەنە كېلىپ تەيۋەن بىلەن ھېچقانداق دىپلوماتىك مۇناسىۋىتى يوق. جۇڭگو چوڭ قۇرۇقلۇقى ئالدىنقى ئايدا ئوباما ھۆكۈمىتى تەيۋەنگە قورال سېتىپ بەرگەنلىكىگە قاتتىق قارشىلىق كۆرسەتكەن. ئامېرىكا تەيۋەنگە ئومۇمىي سوممىسى 1 مىليارد 830 مىليون دوللارغا يېتىدىغان قورال - ياراغ سېتىپ بەرگەن، بۇنىڭ ئىچىدە ئىككى دانە قوغدىغۇچى پاراخوت، تانكىغا قارشى باشقۇرۇلىدىغان بومبا، ئىككى دانە زەربىدار ئاپتوموبىل باركەن.