سۈرىيە ھۆكۈمەت ئاگېنتلىقىنىڭ 11-يانۋاردىكى خەۋىرىگە قارىغاندا، خەلقئارا جەمئىيەت تەمىنلىگەن ئىنسانپەرۋەرلىك ماددىي ئەشيالىرى نۆۋەتتە سۈرىيەدىكى قاپسىلىپ قالغان بىر قانچە يېزا-بازارغا توشۇلۇۋاتقان بولۇپ، بۇ جايلاردىكى خەلق ئاممىسى دۇچ كېلىۋاتقان ھايات-مامات خەۋپىنى يېنىكلىتىش مۆلچەرلەنگەن. بۇ بىر قانچە يېزا-بازاردا نۇرغۇن كىشىلەر يېقىندا يەيدىغان يېمەكلىكى بولمىغانلىقتىن، ئاچلىقتىن ئۆلۈپ كەتكەن بولۇپ، بۇ توغرىسىدىكى سىنئالغۇ فىلىمى ئىجتىمائىي ئالاقە تورىدا ئېلان قىلىنغاندىن كېيىن، شۇ زامان خەلقئارا جەمئىيەتنى چۆچۈتۈۋەتكەن.   دۇنيا ئاشلىق پىلان كومىتېتىنىڭ خەۋىرىگە قارىغاندا، بىرلەشكەن دۆلەتلەر تەشكىلاتى سۈرىيە پايتەختى دەمەشىققە نەچچە ئون  كىلومېتىر كېلىدىغان چەت يېزا-قىشلاققا 40 مىڭ ئادەم بىر ئاي يېيىشكە يېتىدىغان ئاشلىق ياردەم قىلغان. ھەمدە باشقا ئىككى جايدىكى يېزا بازارغىمۇ 20 مىڭ ئادەم بىر ئاي يەيدىغان ئاشلىق ياردەم قىلىپ ئەۋەتىپ بەرگەن.

  دەمەشقتە بىر كىلوگرام بۇغداي ئۇنى تەخمىنەن 79 دوللارغا سېتىلىدۇ. بۇ يىراق چەتتىكى يېزىلارغا بارغاندا باھاسى ئۆستۈرۈلۈپ 120 دوللارغا سېتىلىدۇ. بىر كىلوگرام گۈرۈچنىڭ باھاسى 150 دوللار ھەتتا 200 دوللارغىچە ئۆسىدۇ؛ دەمەشىقتە بىر كىلوگرام كالا سۈتىنىڭ باھاسى تەخمىنەن 1.06 دوللار بولۇپ، لېكىن بۇ يېزىلارغا بارغاندا 300 دوللارغىچە ئۆسۈپ كېتىدىكەن.

  يەرلىكتىكى كىشىلەر ئىلگىرى سىرتقا چىقىپ يېمەكلىك سېتىۋالماقچى بولغان، ھەتتا بەزى كىشىلەر ئاشلىق يوق بولغانلىقتىن، يۇرت ماكانىنى تاشلاپ كېتىپ قالغان. لېكىن ھۆكۈمەت ئارمىيەسى بىلەن ئۆكتىچى كۈچلەر ئوتتۇرىسىدىكى قوراللىق توقۇنۇش سەۋەبىدىن، يېزىلارنىڭ ئەتراپىغا سان-ساناقسىز مىنالار كۆمۈلگەن بولۇپ، بۇ يەرلىك كىشىلەرنىڭ سىرتقا چىقىشىغا ئېغىر خەۋپ ئېلىپ كەلگەن.