جاھان ئاگېنتلىقى 25-ئاپرېل خەۋىرى؛ لەگلەك تورى تەرجىمىسى: مىسىر ئىچكى ئىشلار مىنىستىرلىكى، مىسىرنىڭ بەنى سۇۋەيىف رايۇنىدىكى پارتلاش ۋەقەسىدە 4 كىشىنىڭ ئۆلگەنلىكىنى، بىر كىشىنىڭ يارىلانغانلىقىنى ئۇقتۇردى. مىسىر ئىچكى ئىشلار مىنىستىرلىكىدىن ئېلان قىلىنغان باياناتتا، بەنى سۇۋەيىف ساقچىلىرىنىڭ باشقۇرۇشى ئاستىدىكى رايۇندا بىر ئۆيدە پارتلاش ۋەقەسى ھەققىدە ئۇچۇر بېرىلگەن، بىخەتەرلىك قىسىملىرى تېزدىن مەزكۇر رايۇنغا يىتىپ بارغان. باياناتتا دېيىلىشىچە، ۋەقە يۈز بەرگەن نەخ مەيداننى تەكشۈرۈشتە، زور مىقداردا پارتلاتقۇچ ماتىرياللىرى بىلەن بىر قۇرال ۋە 10 دانە يان تېلېفون بايقالغان. ئىچكى ئىشلار مىنىستىرلىكى، بۇ پارتلاشتا ھاياتىدىن ئايرىلغان كىشىلەرنىڭ مۇسۇلمان قېرىنداشلار تەشكىلاتى ئەزالىرى ئىكەنلىكىنى ئىلگىرى سۈردى.
مىسىردا 2013-يىلىدىكى ھەربىي ئۆزگىرىشتىن كېيىن تەشكىللەنگەن ئۆتكۈنچى ھۆكۈمەت 2013-يىلى 25-دېىكابىردا مۇسۇلمان قېرىنداشلار تەشكىلاتىنى «تېرور تەشكىلاتى» دەپ ئېلان قىلغان ئىدى. بۇ قارار چىقىرىلغاندىن كېيىن مىسىر مىقياسىدا ھەربىي ئۆزگىرىشكە قارشى چىققۇچىلار ۋە مۇسۇلمان قېرىنداشلار ئەزالىرىغا قارىتا قولغا ئېلىش ھەرىكتى باشلاندى. دەسلەپتە مۇسۇلمان قېرىنداشلار تەشكىلاتى باش رەھبىرى مۇھەممەد بەدىئى قاتارلىق يۇقىرى دەرىجىلىك رەھبەرلىرى قولغا ئېلىندى ۋە سوت مەھكىمىسى تەرىپىدىن ئۆلۈم جازاسىغا ھۆكۈم قىلىندى. مىڭلىغان كىشىلەر ھازىرمۇ مىسىر تۈرمىلىرىدە سوتلىنىشنى كۈتۈپ تۇرماقتا. يېقىندا 21-ئاپرېلدىكى سوتتا ھەربىي ئۆزگىرىش بىلەن ۋەزىپىسىدىن ئېلىپ تاشلانغان پرېزىدېنت مۇھەممەد مۇرسى 20 يىللىق قاماق جازاسىغا ھۆكۈم قىلىندى.