ھازىر بىز ئىشلىتىۋاتقان 11 خانىلىق يان تېلېفون نومۇرى دۇنيادىكى ئەڭ ئۇزۇن يان تېلېفون نومۇرى ھېسابلىنىدۇ. نېمە ئۈچۈن يان تېلېفون نومۇرى 11 خانىلىق بولىدۇ؟

بۇ، نومۇر ئەندىزىسى تەرىپىدىن بەلگىلىنىدۇ. بىزنىڭ يان تېلېفون نومۇرلىرىمىز كودلاشتۇرۇش مەزمۇنى ئوخشاش بولمىغان ئۈچ بۆلەكتىن تەشكىل تاپقان بولۇپ، ئالدىنقى ئۈچ خانىسى تور پەرقلەندۈرۈش نومۇرى، ئۇنىڭدىن كېيىنكى تۆت خانىسى رايون نومۇرى، ئەڭ ئاخىرقى تۆت خانىسى ئابونت نومۇرىنى كۆرسىتىدۇ(بۇ ئىختىيارىي تەقسىم قىلىنىدۇ). شۇڭا يان تېلېفون نومۇرىنى توغرا ئوقۇش ئۇسۇلىXXXX–XXXX–1XX دىن ئىبارەت بولىدۇ. مۇشۇنداق ئورۇنلاشتۇرۇش قىلغاندا ھەم نومۇر بايلىقىدىن ئەڭ زور دەرىجىدە پايدىلانغىلى، ھەم ھەرقايسى تىجارەت ئورۇنلىرى ۋە رايونلارغا جانلىق تەقسىم قىلغىلى بولىدۇ.

دۆلىتىمىزدىكى يان تېلېفون نومۇرلىرى دۆلەتلىك ئۇچۇر مىنىستىرلىقى تەرىپىدىن بىر تۇتاش پىلانلىنىدۇ. نەزەرىيە جەھەتتىن ئېيتقاندا، 11 خانىلىق ساندا ئوخشاش بولمىغان 100 مىليارد دانە يان تېلېفون نومۇرى بولىدۇ، باشلىنىشىدىكى ‹‹1››نى چىقىرىۋەتكەندە قالغان 10 خانىلىق ساندا 10 مىليارد دانە يان تېلېفون نومۇرى بولىدۇ، ئېلىمىزدە ھەر بىر ئادەمگە يەتتە، سەككىزدىن يان تېلېفون نومۇرى توغرا كېلىدۇ. ئەڭ دەسلەپتە 11 خانىلىق يان تېلېفون نومۇرىنىڭ ھەممىسىلا ‹‹13››تىن باشلىناتتى، سىغىمى 1 مىليارد ئىدى، كېيىن ‹‹15››، ‹‹16››، ‹‹17››، ‹‹18›› قاتارلىق نومۇر بۆلەكلىرى كەينى – كەينىدىن قوشۇلۇپ بىر نەچچە مىلياردلىق كۆلەم شەكىللەندى. بۇ يان تېلېفون نومۇرلىرى كىشىلەرگە كەڭتاشا يېتىدۇ، كۈنلەرنىڭ بىرىدە نومۇر جىددىيلىكى كۆرۈلگەندە ئىككىنچى خانىنى ئۆزگەرتىپ قويسىلا نومۇر جىددىيلىكىنى تۈگەتكىلى بولىدۇ. نومۇر بايلىقى جىددىيلىكىنى پەسەيتىش ئۈچۈن، يەنە تىجارەت ئورۇنلىرى ئۇزاق مۇددەت ئىشلىتىلمىگەن ‹‹ئۇيقۇ ھالىتىدىكى نومۇر›› ۋە ئىشلىتىشتىن توختىتىلغان نومۇرلارنى قايتا قوزغىتىش ئارقىلىق بىر تەرەپ قىلىدۇ.

ياپونىيەمۇ بىزگە ئوخشاش 11 خانىلىق يان تېلېفون نومۇرى ئىشلىتىدۇ، دۆلىتىمىزنىڭ تەيۋەن ئۆلكىسى، ئامېرىكا، گېرمانىيە، ھىندىستان، شىۋېيتسارىيە، گوللاندىيە، بېلگىيە، فىرانسىيە، فىلىپپىن ۋە ئاۋىسترالىيە قاتارلىق دۆلەتلەر ئون خانىلىق، يېڭى زېلاندىيە ۋە تايلاند توققۇز خانىلىق، سىنگاپور سەككىز خانىلىق، كانادا يەتتە خانىلىق يان تېلېفون نومۇرىنى ئىشلىتىدۇ.