ئامېرىكا «ۋاشىنگىتون كۈندىلىك پوچتا گېزىتى» نىڭ 3-چېسلا خەۋەر قىلىشىچە، سامانشا خېس (Samantha Hess)نىڭ كەسپى بىر ئاز ئالاھىدە، ئۇنى باشقىلار ئالاھىتەن تەكلىپ قىلىپ «قۇچاقلىشىش» مۇلازىمىتى قىلدۇرىدۇ. ئۇ ھەر سائىتىگە 60 دوللاردىن 80 دوللارغىچە ھەق ئالىدۇ، قۇچاقلىشىشنىڭ پۈتۈن جەريانىدا سامانشا خېس خېرىدارى بىلەن ئەدەپ-ئەخلاقلىق بولىدۇ، باشقىلارغا يامان تەسىر بېرىپ قويۇشتىن ساقلىنىدۇ. ئۇندىن باشقا سامانشا خېس يەنە باشقا شەكىلدىكى ھەمراھ بولۇش مۇلازىمىتىنىمۇ تەمىنلەيدىغان بولۇپ، ئۇ خېرىدارلارغا ھەمراھ بولۇپ تاماق يېيىشىپ بېرىش، ھەمراھ بولۇپ ئايلىنىش قاتارلىق مۇلازىمەتلەرنى يولغا قويغان، ئەلۋەتتە، بۇ مۇلازىمەتنىڭ ھەممىسىدىن ھەق ئېلىنىدۇ.

    ئامېرىكا «ئاتلانتىك ئوكيان ئايلىق ژورنىلى» نىڭ خەۋەر قىلىشىچە، ھەمراھ بولۇش مۇلازىمىتى ھازىر تېز سۈرئەتتە گۈللىنىۋاتقان كەسىپ بولۇپ، سامانشا خېس ئىشلەيدىغان ئامېرىكا «دوستتىن بىرنى ئىجارە ئېلىڭ» تور بېكىتىنى مىسال ئالىدىغان بولساق، بۇ شىركەت ئامېرىكىدىلا ئەمەس بەلكى، پۈتۈن دۇنيانىڭ ھەر قايسى جايلىرىدا كەسىپ كېڭەيتىۋاتىدۇ، خادىم سانىمۇ بارغانسىرى زورىيىۋاتىدۇ. ھازىرغا قەدەر «دوستتىن بىرنى ئىجارە ئېلىڭ» تور بېكىتىدە ھەمراھ بولۇش مۇلازىمىتى تەمىنلەيدىغان خادىمدىن 520 مىڭ خادىم بار بولۇپ، ئۇلار ئوتتۇرا ھېساب بىلەن ھەر سائىتىگە 23 دوللار ھەق ئالىدۇ.

      ئۆتكەن يېرىم يىلدا، ھەمراھ بولۇش مۇلازىمىتى ئورگىنى ئامېرىكىنىڭ ھەر قايسى رايونلىرىدا شىددەت بىلەن كۆپىيىشكە باشلىدى، بەزى شىركەتلەر بۇ مۇلازىمەتكە تايىنىپ خېلى كۆپ بايلىق توپلىۋالدى. مەسىلەن يېڭى جېرسى شىتاتىدا قۇرۇلغان «يېپىشقاق ھەمراھ» دا تىزىمغا ئالدۇرغان 125 خادىم خېرىدارلارغا قۇچاقلىشىش مۇلازىمىتى تەمىنلەيدۇ. بۇ شىركەتنىڭ قۇرغۇچىسى ئىۋان كارىپ (Ivan Karp) مۇنداق دېدى، «يېپىشقاق ھەمراھ» نىڭ ھەر ئايلىق كىرىمى 16 مىڭ دوللارغا بارىدۇ. «دوستتىن بىرنى ئىجارە ئېلىڭ» تور بېكىتىنىڭ قۇرغۇچىسى سىكوت روسېنبائۇم (Scott Rosenbaum) مۇنداق دېدى، تور بېكىتىمىزنىڭ بۇ يىللىق كەسىپ كىرىمى «يەتتە خانىلىق سان» غا يىتىدۇ.

قۇچاقلىشىش مۇلازىمىتى ئاڭلىماققا بىر ئاز قىزىقارلىق تۇيىلىدۇ، ھەتتا بەزىلەر خاتا چۈشىنىپ قېلىشىمۇ مۇمكىن. بىراق ئامېرىكىدا، بۇنداق مۇلازىمەتكە ئېھتىياجلىق بولغان كىشىلەرنىڭ سانى خېلىلا كۆپ. يېقىندا ئېلىپ بېرىلغان ئىككى قېتىملىق خەلق رايىنى سىناش تەكشۈرۈش نەتىجىسىدىن ئايان بولۇشىچە، تەخمىنەن %40 ئامېرىكىلىق قۇرامىغا يەتكەن كىشى ئۆزىنى يالغۇز ھېس قىلىدىكەن. بىراق 20-ئەسىرنىڭ 80-يىللىرىدا پەقەت %20 ئادەم ئۆزىنى يالغۇز ھېس قىلاتتى. يەنە بەزى خېرىدارلار پىسخىكا كېسىلىگە گىرىپتار بولۇپ قېلىشتىن ئەنسىرەيدۇ، شۇڭلاشقا ئۇلار قۇچاقلىشىش ئارقىلىق پىسخىكا سالامەتلىكىنى ئەسلىگە كەلتۈرۈشكە موجتاج.

     ھازىرقى جەمئىيەتتە ھەر خىل ھورداقخانىلاردا قىپيالىڭاچ ياتقان كىشىلەر بەدەنلىرىنى ئۇۋلىتىدۇ، ئۇلارنىڭ بەدىنىنى ئۇۋلايدىغان خادىم بىلەن پەقەتلا تونۇشمايدۇ. بۇنىڭغا سېلىشتۇرغاندا، ئىككى تەرەپ خالىغان ئاساستا قۇچاقلىشىپ قويسا، بۇنىڭغا ھەيران قالمىسىمۇ بولىدىغۇ، دەيمەن.

     خەۋەردە دېيىلىشىچە، «دوستتىن بىرنى ئىجارە ئېلىڭ» تور بېكىتىنىڭ كۆپ قىسىم خېرىدارلىرى سودا ساياھەتچىلىرى بولۇپ، ئۇلار ناتونۇش شەھەردە ئۆزى يالغۇز غىزالىنىشتىن زېرىككەن كىشىلەردۇر. ئۇلار كەچلىك غىزالىنىشتا ياكى قاۋاقخانىلاردا پىۋە ئىچكەندە يېنىدا بىر ھەمراھىنىڭ بولۇشىنى ئارزۇ قىلىدۇ. ئۇندىن باشقا يەنە تېخى ئەمدىلا باشقا شەھەرگە كۆچۈپ بارغان، ئەتراپتىكى مۇھىت بىلەن تونۇشمايدىغان كىشىلەرمۇ، «دوستتىن بىرنى ئىجارە ئېلىڭ» تور بېكىتىنىڭ خېرىدارى بولۇپ قالىدۇ.

    قىسقىچە قىلىپ ئېيتقاندا، ھازىر كۆپ قىسىم كىشىلەر ئالاقە تورى ئارقىلىق ئالاقىلىشىدىغان بولۇپ قالدى، بىراق ئەمەلىي تۇرمۇشتىكى بەدەن ئۇچرىشىشى بىر قەدەر ئاز. دېمەك، كىشىلەر بەدەن ئۇچرىشىشىغا ئېھتىياجلىق. ئۇنىڭ ئۈستىگە ناتونۇش بىر كىشى بىلەن ئۇچرىشىش ئادەمگە باشقىچە بىر ھوزۇر بېغىشلايدۇ.

     مۇلازىمەت تەمىنلىگۈچىلەرنىڭ بىخەتەرلىكى ئۈچۈن، «دوستتىن بىرنى ئىجارە ئېلىڭ» تور بېكىتى خادىملاردىن كەسىپ بېجىرىشتىن بۇرۇن ۋە كېيىن خاتىرە يېزىشنى تەلەپ قىلىدۇ. توردىن خېرىدارلارنىڭ ئۇچۇرلىرىنىمۇ تاپقىلى بولىدۇ. ئادەتتە قىز-ئايال خادىملارنى تەكلىپ قىلىدىغان ئەرلەر كۆپرەك بولىدۇ. شۇڭلاشقا يەنىلا ئېھتىيات قىلغان تۈزۈك.