بۇ يىل ئوتتۇرا، كىچىك، مىكرو كارخانىلارنىڭ توك پۇلى 812 مىليون يۈەن ئەتراپىدا ئازلايدىكەن
جاڭ لېينىڭ ئاپتونوم رايونلۇق تەرەققىيات ۋە ئىسلاھات كومىتېتىدىن ئىگىلىشىچە، 15 - ئاپرېلدىن باشلاپ، ئاپتونوم رايونىمىز سودا - سانائەتكە ئىشلىتىلىدىغان توكقا ئوخشاش باھانى يولغا قويغان. ئاپتونوم رايونلۇق تەرەققىيات ۋە ئىسلاھات كومىتېتى يېقىندا ئۇقتۇرۇش تارقىتىپ، تۆۋەن توك باھا سىياسىتىنى ئىزچىللاشتۇرۇش ۋە ئەمەلىيلەشتۈرۈشتىكى مۇھىم تەدبىرلەرنى يولغا قويغان.
　　2014 - يىلنىڭ ئاخىرى ئېچىلغان ئاپتونوم رايونلۇق پارتكومنىڭ ئىقتىساد خىزمىتى يىغىنىدا، تۆۋەن توك باھاسى ئاپتونوم رايونىمىزنىڭ 2015 - يىلىدىكى ئىقتىسادىغا تىرەك بولىدىغان ئالتە يېڭى ئېشىش نۇقتىسىنىڭ بىرى دەپ قارىلىپ، تۆۋەن توك باھاسى سىياسىتىنىڭ قاپلىنىش دائىرىسىنى يەنىمۇ كېڭەيتىپ، كارخانىلار ئۈچۈن ياخشى مۇھىت بەرپا قىلىش، ئېشىشنى يېڭى تىرەككە ئىگە قىلىش ئوتتۇرىغا قويۇلدى. ئاپتونوم رايونلۇق تەرەققىيات ۋە ئىسلاھات كومىتېتى ئالاقىدار نازارەت ۋە ئىدارىلەر بىلەن مۇھاكىمە قىلىپ ۋە ھېسابلاپ كۆرۈپ، تۆۋەن توك باھاسى سىياسىتىنى ئەمەلىيلەشتۈرۈشنى كېڭەيتىش بىلەن سودا - سانائەتتە ئوخشاش باھانى يولغا قويۇشنى ئىلگىرى سۈرۈشنى ئورگانىك بىرلەشتۈرۈپ، ئاپتونوم رايونىمىزنىڭ سودا - سانائەتتە ئىشلىتىلىدىغان توك باھاسىنى ئوخشاش قىلىش لايىھەسىنى ئوتتۇرىغا قويدى، ئاپتونوم رايون ئۇلارنىڭ لايىھەسىگە قوشۇلدى.
　　تونۇشتۇرۇلىشىچە، بۇ قېتىمقى سودا - سانائەتتە ئوخشاش باھانى يولغا قويۇش سودىغا ئىشلىتىلىدىغان توك باھاسى ۋە سانائەتتە ئومۇملاشمىغان توك باھاسى دەپ ئىككىگە بۆلۈنىدىكەن. كونكرېت ئۇسۇلى: ئۈرۈمچى شەھىرىنىڭ سانائەتتە ئومۇملاشمىغان توك باھاسى ئۆلچەم قىلىنىپ، دۆلەت ئېلېكتىر تورى شىنجاڭ ئېلېكتىر شىركىتىنىڭ ئېلېكتىر تورىغا كىرگۈزۈلگەن ۋىلايەت، ئوبلاست، شەھەرلەرنىڭ سانائەتتە ئومۇملاشمىغان توك باھاسى ۋە سودىدىكى توك باھاسىنى ئۈرۈمچى شەھىرىنىڭ سانائەتتە ئومۇملاشمىغان توك باھاسى سەۋىيەسى بىلەن ئوخشاش قىلىپ تەڭشەپ، ئادەتتىكى سودا - سانائەتتىكى توك باھاسى بىلەن بىرلەشتۈرۈپ، ئاپتونوم رايوننىڭ سودا - سانائەتكە ئىشلىتىلىدىغان توك باھاسىنى ئوخشاش قىلىدىكەن. باھا ئوخشاش بولغاندىن كېيىن توك باھاسىنىڭ ئوخشاش بولمىغان ئېلېكتىر بېسىمى كۈچى دەرىجىسىگە ئاساسەن: بىر كىلوۋولتقا توشمىسا ھەر كىلوۋات سائەت توكنىڭ باھاسى 0.519 يۈەن، بىر كىلوۋولتتىن 10 كىلوۋولتقىچە بولسا ھەر كىلوۋات سائەت توكنىڭ باھاسى 0.516 يۈەن، 35 كىلوۋولتتىن يۇقىرى بولسا ھەر كىلوۋات سائەت توكنىڭ باھاسى 0.512 يۈەن بولىدىكەن.
　　ھازىر خوتەن ۋىلايىتىنىڭ سانائەتتە ئومۇملاشمىغان توك باھاسى ئۈرۈمچى شەھىرىنىڭكىگە قارىغاندا خېلىلا تۆۋەن، ئەگەر ئۈرۈمچى شەھىرىنىڭ باھاسى بىلەن ئوخشاش بولغاندا، خوتەنگە زور تەسىر كۆرسىتىدۇ. شۇ سەۋەبتىن خوتەنگە ئالاھىدە مۇئامىلە قىلىپ، سانائەتتە ئومۇملاشمىغان توكنىڭ باھاسىنى ۋاقتىنچە ئۆستۈرمەي، خوتەننىڭ سودا توك باھاسىنى سانائەتتە ئومۇملاشمىغان توك باھاسىنىڭ سەۋىيەسىدىن تۆۋەن قىلىپ، ئادەتتىكى سودا - سانائەت توك باھاسىنى بىرلەشتۈرۈپ، خوتەن ئېلېكتىر تورى ئىچىدە سودا - سانائەتكە ئىشلىتىلىدىغان توك باھاسى ئوخشاش قىلىندى. باھا بىرلىككە كەلتۈرۈلگەندىن كېيىن، ھەر بىر كىلوۋات سائەت توكنىڭ باھاسى 0.45 يۈەن بولىدۇ.
　　سودا - سانائەتتىكى ئوخشاش باھا ئۈنۈمىدىن قارىغاندا، باھانى تۆۋەنلىتىشنىڭ قاپلىنىش دائىرىسى ئىنتايىن ئېنىق بولغان. باھا ئوخشاش قىلىنغاندىن كېيىن، ئاپتونوم رايوندىكى 13 ۋىلايەت، ئوبلاستنىڭ سودا توك باھاسى، توققۇز ۋىلايەت، ئوبلاستنىڭ سانائەتتە ئومۇملاشمىغان توك باھاسى ئوتتۇرا ھېساب بىلەن كۆرۈنەرلىك چۈشكەن، ئىككى تۈردە ھەر كىلوۋات سائەت توكنىڭ باھاسى 0.093 يۈەن تۆۋەنلىگەن. بۇنىڭ ئىچىدىكى سانائەتتە ئومۇملاشمىغان ھەر كىلوۋات سائەت توكنىڭ باھاسى ئوتتۇرا ھېساب بىلەن 0.021 يۈەن تۆۋەنلىگەن، سودىدا ئىشلىتىلىدىغان ھەركىلوۋات سائەت توكنىڭ باھاسى ئوتتۇرا ھېساب بىلەن 0.244 يۈەن تۆۋەنلىگەن. 2015 - يىلى، ئاپتونوم رايونىمىزدىكى ئوتتۇرا، كىچىك، مىكرو كارخانىلارنىڭ توك پۇلى 812 مىليون يۈەندەك ئازىيىشى مۇمكىن.