شىنخۇا ئاگېنىتلىقى، 27- دېكابىر تېلېگراممىسى: مەملىكەتلىك 12- نۆۋەتلىك خەلق قۇرۇلتىيى دائىمىي كومىتېتىنىڭ 18- يىغىنىدا 27- دېكابىر «جۇڭخۇا خەلق جۇمھۇرىيىتىنىڭ تېررورىزمغا قارشى تۇرۇش قانۇنى» ماقۇللاندى. دۆلەت رەئىسى شى جىنپىڭ 36- نومۇرلۇق رەئىس پەرمانىغا ئىمزا قويدى. بۇ قانۇن 2016- يىلى 1- يانۋاردىن باشلاپ يولغا قويۇلىدۇ.

شىنخۇا ئاگېنتلىقىغا بۇ قانۇننى ئېلان قىلىش ھوقۇقى بېرىلدى. «تېررورىزمغا قارشى تۇرۇش قانۇنى» 97 ماددىدىن تۈزۈلگەن بولۇپ، ئۇنىڭدا تېررورلۇق تەشكىلاتى ۋە ئەزالىرىنى بېكىتىش، مۇداپىئەلىنىش، ئاخبارات ئۇچۇرى، تەكشۈرۈش، تاقابىل تۇرۇپ بىر تەرەپ قىلىش، خەلقئارا ھەمكارلىق، كاپالەتلىك قىلىش تەدبىرلىرى، قانۇنىي مەسئۇلىيەت قاتارلىق جەھەتلەردىكى بەلگىلىمىلەر بار.

بۇ قانۇندا دۆلەتنىڭ ھەرقانداق شەكىلدىكى تېررورىزمغا قارشى تۇرىدىغانلىقى، تېررورلۇق تەشكىلاتلىرىنى قانۇن بويىچە ئەمەلدىن قالدۇرىدىغانلىقى، تېررورلۇق قىلمىشلىرىنى پىلانلىغان، تېررورلۇق ھەرىكەتلىرىنى يولغا قويۇشقا تەييارلىق كۆرگەن، تېررورىزمنى تەرغىب قىلغان، تېررورلۇق ھەرىكىتى ئېلىپ بېرىشقا قۇتراتقان ھەرقانداق تەشكىلات، تەشكىلات رەھبىرى، تېررورلۇق ھەرىكىتىگە قاتناشقان تەشكىلات، تېررورلۇق تەشكىلاتلىرىغا ياردەم بەرگەن تەشكىلاتنىڭ قانۇنىي مەسئۇلىيىتىنىڭ سۈرۈشتۈرۈلىدىغانلىقى ئايدىڭلاشتۇرۇلدى. دۆلەت ھەرقانداق تېرورلۇق تەشكىلاتى ۋە تېررورچى بىلەن مۇرەسسەلەشمەيدۇ، ھەرقانداق تېررورلۇق تەشكىلاتىنى قانات ئاستىغا ئالمايدۇ ۋە مۇساپىرلىق ئورنى بەرمەيدۇ.

بۇ قانۇندا تېررورىزمغا مۇنداق ئېنىقلىما بېرىلدى: تېررورىزم زوراۋانلىق قىلىش، بۇزغۇنچىلىق قىلىش، قورقۇتۇش قاتارلىق ۋاسىتىلەر ئارقىلىق جەمئىيەتتە ۋەھىمە پەيدا قىلىش، ئاممىۋى بىخەتەرلىككە زىيان يەتكۈزۈش، جىسمانىي ۋە مال - مۈلۈك بىخەتەرلىكىگە دەخلى - تەرۇز قىلىش ياكى دۆلەت ئورگانلىرىغا، خەلقئارا تەشكىلاتلارغا تەھدىت سېلىپ، سىياسىي ۋە ئىدېئولوگىيە ساھەسىدىكى مەقسەتلىرىگە يېتىش تەشەببۇسى ۋە قىلمىشلىرىنى كۆرسىتىدۇ.

بۇ قانۇندا مۇنداق بەلگىلەندى: دۆلەت تېررورىزمغا قارشى تۇرۇشنى دۆلەتنىڭ بىخەتەرلىك ئىستراتېگىيەسىگە كىرگۈزۈپ، ئۇنىۋېرسال سىياسەت يۈرگۈزۈپ، ماھىيەتتىنمۇ، ھادىسىدىنمۇ تەڭ تۈزەپ، تېررورىزمغا قارشى تۇرۇش ئىقتىدارىنى كۈچەيتىپ، سىياسىي، ئىقتىسادىي، قانۇن، مەدەنىيەت، مائارىپ، دىپلوماتىيە، ھەربىي ۋاسىتىلەرنى قوللىنىپ، تېررورىزمغا قارشى تۇرۇش خىزمەتلىرىنى قانات يايدۇرىدۇ.

بۇ قانۇندا يەنە تېررورىزمغا قارشى تۇرۇش خىزمىتىنى قانۇن بويىچە ئېلىپ بېرىش، ئىنسان ھوقۇقىغا ھۆرمەت قىلىش ۋە كاپالەتلەندۈرۈش، پۇقرالارنىڭ ۋە تەشكىلاتلارنىڭ قانۇنلۇق ھوقۇق - مەنپەئەتىنى قوغداش كېرەكلىكى كۆرسىتىلدى. تېررورىزمغا قارشى تۇرۇش خىزمىتىدە پۇقرالارنىڭ دىنىي ئېتىقاد ئەركىنلىكى ۋە مىللىي ئۆرپ - ئادىتىگە ھۆرمەت قىلىش، رايون، مىللەت، دىن قاتارلىقلارنى باھانە قىلغان ھەرقانداق شەكىلدىكى كەمسىتىش قىلمىشلىرىنى چەكلەش كېرەك.

بۇ قانۇنغا ئاساسلانغاندا، دۆلەت تېررورىزمغا قارشى تۇرۇش خىزمەتلىرىگە رەھبەرلىك قىلىش تەشكىلاتى قۇرۇپ، مەملىكەت بويىچە تېررورىزمغا قارشى تۇرۇش خىزمەتلىرىگە بىر تۇتاش رەھبەرلىك قىلىدۇ. ھەرقانداق شەخس ۋە ئورۇن ئالاقىدار تارماقلارنىڭ تېررورىزمغا قارشى تۇرۇش خىزمەتلىرىنى قانات يايدۇرۇشىغا ماسلىشىش ۋە ياردەم بېرىش مەسئۇلىيىتى بار. تېرورلۇق ھەرىكىتى توغرىسىدا گۇمانلانغان ياكى تېررورلۇق ھەرىكىتىگە ئالاقىدار گۇمانلىق شەخسلەرنى بايقىغان ھامان ۋاقتىدا ج خ تارماقلىرى ياكى ئالاقىدار تارماقلارغا دوكلات قىلىشى كېرەك.