دۆلەتلىك سەنئەت فوندى تۈرى بولغان شىنجاڭنىڭ چوڭ تىپتىكى ئىجادىي مۇزىكىلىق درامىسى «ئالمىخان ھەققىدە رىۋايەت » 23-دېكابىر كەچتە شىنجاڭ شىنخۇا تىياتىرخانىسىدا قويۇلۇپ، كەڭ ئاممىغا «ئالمىخان » نىڭ سىرلىق چۈمبىلىنى ئېچىپ بەردى. «ئالمىخان ھەققىدە رىۋايەت »نىڭ قويۇلۇشى بىلەن، شەھەر ئاممىسىغا سۇنۇلغان يېڭى يىللىق مول «مەدەنىيەت زىياپىتى» باشلاندى.    ئىگىلىنىشىچە، «ئالمىخان ھەققىدە رىۋايەت » دۆلەتلىك سەنئەت فوندى نۇقتىلىق ئىشلىگەن ئويۇن تۈرى بولۇپ، شىنجاڭ سەنئەت يۇرتى ئوپىرا ئۆمىكى ئورۇندىغان ناھايىتى يۇقىرى بەدىئىيلىككە ۋە كۆرۈش قىممىتىگە ئىگە. بۇ دراما ئىلگىرى جۇڭگو ئاسىيا-ياۋروپا كۆرگەزمىسىنىڭ جۇڭگو ۋە چەت ئەل مەدەنىيەت كۆرگەزمىسى ھەپتىلىكى ۋە 4-نۆۋەتلىك جۇڭگو شىنجاڭ خەلقئارا مىللىيچە ئۇسسۇل بايرىمىدا ئامما بىلەن يۈز كۆرۈشكەن ھەمدە ناھايىتى زور ئىجتىمائىي تەسىر قوزغىغان. بۇ قېتىم «ئالمىخان ھەققىدە رىۋايەت»نىڭ قويۇلۇشى كەڭ شەھەر ئاممىسىنى يەنە بىر قېتىم كۆرۈشكە مۇيەسسەر قىلغان.

   شىنجاڭ سەنئەت يۇرتى ئوپىرا ئۆمىكى پارتكومىنىڭ شۇجىسى ليۇ خۇڭپىڭنىڭ تونۇشتۇرۇشىچە، 2015-يىل ئاخىرىدا بۇ مۇزىكىلىق دراما قايتا قويۇلۇپ، ئاممىنىڭ قىش پەسلىدىكى مەدەنىيەت تۇرمۇشىغا يېڭىچە مەنالار قوشۇلغان. ئويۇننىڭ A بېلەت باھاسى 100 يۈەن، B بېلەت باھاسى 60 يۈەن بولۇپ، ئىشىك بېلىتىدە ئاممىغا نەپ يەتكۈزۈش ئارقىلىق ئاممىنى يۇقىرى سەۋىيەدىكى مۇزىكىلىق دراما ۋە سەھنە سەنئىتىدىن بەھرىمان قىلىش ئىكەن.

  مۇزىكىلىق دراما «ئالمىخان ھەققىدە رىۋايەت»دە ئۇيغۇرلارنىڭ خەلق ناخشىسى «ئالمىخان» ماتېرىيال قىلىنىپ، قەدىمكى يىپەك يولىدا يۈز بەرگەن كىشىنى تەسىرلەندۈرىدىغان مۇھەببەت ھېكايىسى بايان قىلىنغان بولۇپ، ئاقكۆڭۈل، چىرايلىق قىز ئالمىخان بىلەن باتۇر، چېچەن ياش يىگىت قەيسەرنىڭ بىر كۆرۈشۈپلا بىر-بىرىنى ياخشى كۆرۈشۈپ قالغاندىن كېيىن بېشىدىن ئۆتكۈزگەن بىر قاتار ئازاب- ئۇقۇبەتلىرى تەسۋىرلەنگەن. بۇ درامىدا قەيسەرنىڭ تاغىسى ھەسەنباي ۋە ئۇنىڭ غوجىدارى ئۆمەر خىلمۇ خىل ئۇسۇللاردا قەيسەرگە سۈيقەست قىلىپ، ئاخىرىدا بۇ ئائىلىنىڭ مال – مۈلكى ۋە ياش، چىرايلىق ئالمىخاننى قولغا كىرگۈزۈۋالىدۇ. ئالمىخان بىلەن قەيسەر مۇھەببەت، بەخت، ئەركىنلىك ئۈچۈن ھەسەنباي باشچىلىقىدىكى ياۋۇز كۈچلەر بىلەن قەيسەرلىك بىلەن ئېلىشىدۇ. قەيسەر قارا بوران بىلەن كۈرەش قىلىۋاتقاندا، ئالمىخان ئوت ئىچىدە قالىدۇ، موشۇنداق ھايات-ماماتلىق پەيتىدە بىر توپ بۈركۈت ئۇچۇپ كېلىپ ئالمىخاننى قۇتقۇزۇۋالىدۇ. قەيسەر قارا بوران بىلەن ئېلىشپ قايتىپ كەلگەندىن كېيىن، ئالمىخاننىڭ ئىز-دېرەكسىز غايىپ بولۇپ كەتكەنلىكىدەك گۈزەل رىۋايەت سۆزلىنىدۇ.

   ئىگىلىنىشىچە، «ئالمىخان ھەققىدە رىۋايەت» 31-دېكابىرغىچە قويۇلىدىغان بولۇپ، ئويۇن قويۇلۇش جەريانىدا شەھەر ئاھالىلىرى شىنجاڭ شىنخۇا تىياتىرخانىسىغا بېرىپ نەق مەيداندا بېلەت سېتىۋالسا بولىدىكەن.