يېقىندا خاربىن شەھىرى ئاھالىسىنىڭ جۇڭگو ئاخبارات تورى مۇخبىرىغا ئېيتىشىچە، ئۇنىڭ يېزا ئىگىلىكى بانكىسى كارتىسى ئىچىدىكى 45000 يۈەن خەلق پۇلى ئىز دېرەكسىز يوقاپ كەتكەن. مۇخبىرنىڭ جۇڭگو يېزا ئىگىلىكى بانكىسى پاي چەكلىك شىركىتى خېيلوڭجياڭ تارماق شىركىتىدىن ئىگىلىشىچە، نۆۋەتتە ساقچىلار بۇ ئىشنى تەكشۈرۈشكە كىرىشكەن ئىكەن.

    خاربىن شەھىرى ئاھالىسى ليۇ خانىمنىڭ ئېيتىشىچە، ئۇنىڭ يېزا ئىگىلىكى بانكىسى كارتىسى ئىچىدە ئەسلىدە 45142.21 يۈەن بار ئىكەن، 2015-يىلى 12-ئاينىڭ 9-كۈنى پۇل ئالماقچى بولغاندا كارتىدا پەقەت 132.21 يۈەن قالغانلىقىنى بايقىغان ئىكەن. ليۇ خانىم دەرھال بانكا پۇكىيىگە بېرىپ سۈرۈشتۈرگەندە، كارتىدىكى 45000 يۈەن پۇلنىڭ 2015-يىلى 11-ئاينىڭ 12-كۈنى باشقا ئۆلكىدە ئىلىنغانلىقىدىن خەۋەر تاپقان.

     ليۇ خانىمنىڭ بىلدۈرۈشىچە، ئۇ بۇ كارتىنى ئەڭ ئاخىرقى قېتىم 2015-يىلى 9-ئاينىڭ 10-كۈنى ئىشلەتكەن ئىكەن، ئۇنىڭدىن كېيىن، بانكا كارتىسى، كىملىك ۋە تېلېفونى يېنىدىن ئايرىلمىغان ئىكەن، ئۇنىڭ ئۈستىگە ئۇ ئىزچىل خاربىندا تۇرغان بولۇپ، باشقا ئۆلكىلەرگە بارمىغان ئىكەن. ئۇ بۇ پۇلنى بالىسىنىڭ يۇقىرى ئۆرلەپ ئوقۇشى ئۈچۈن ئىشلەتمەكچى ئىكەن، ئەمما ھازىر بۇ پۇلنىڭ ئىز دېرەكسىز غايىب بولغانلىقىنى كۆرۈپ ليۇ خانىم ناھايىتى جىددىيلەشكەن ئىكەن.

    بۇ ئىش يۈز بېرىپ 10 كۈندىن كېيىن، ليۇ خانىم ئىلگىرى كېيىن بولۇپ بانكا ھېسابات نومۇرىنى ئىلتىماس قىلغان بانكىغا بېرىپ پۇلىنىڭ ئىز دېرىكىنى قىلغان، ھەمدە جامائەت خەۋپسىزلىكى ئورۇنلىرىغا دېلو مەلۇم قىلغان بولسىمۇ يەنىلا ئېنىق جاۋابقا ئېرىشەلمىگەن.

مۇخبىر 18-چېسلا جۇڭگو يېزا ئىگىلىكى بانكىسى پاي چەكلىك شىركىتى خېيلوڭجياڭ ئۆلكىلىك تارماق شىركىتى تەشۋىقات بۆلۈمى بىلەن ئالاقىلەشكەن، بۇ بۆلۈمدىكى مەلۇم بىر خىزمەتچى خادىمنىڭ ئېيتىشىچە، نۆۋەتتە ساقچىلار بۇ ئىشقا قارىتا تەكشۈرۈش ئېلىپ بېرىۋاتقان ئىكەن، بانكا تەرەپ پۈتۈن كۈچى بىلەن ساقچىلارنىڭ تەكشۈرۈشىگە ماسلىشىدىكەن.

    ئۇنىڭدىن باشقا، بانكا خىزمەتچى خادىمى كەڭ ئابونتلارنىڭ بانكا كارتىسىنىڭ بىخەتەرلىكىگە دىققەت قىلىشىنى، يۇقىرىقىدەك ئىش يۈز بېرىشىنىڭ ئالدىنى ئېلىشىنى ئەسكەرتىدۇ.