روسىيە تاراتقۇلىرىنىڭ خەۋەر قىلىشىچە، يېقىندا روسىيىنىڭ ئمولسكىيدا بىر قىز يۇرتىنىڭ يولىنىڭ ناچارلىقىغا قەتئىي چىدىيالماي ئاخىرى ئۆزى چىقىپ يوللارنى رېمونت قىلىش قارارىغا كەلگەن.  بۇ قىزنىڭ ئىسمى ۋېرونىكا پاپروش بولۇپ بۇ يىل 26 ياشقا كىرگەن، يېقىندىن بۇيان ئۇ دائىم يېرىم كېچىدە ماشىنىسىغا سىمونت ۋە باشقا لازىملىق سايمانلارنى سېلىپ كوچىغا چىقىپ يوللاردىكى ئوڭغۇل-دوڭغۇل ئورەكلەرنى ئوڭشاشقا باشلىغان. ئۇ ئۆزىنىڭ ماشىنا ھەيدىگەندە مۇشۇنداق ئورەكلەردىن بەكمۇ بىراز بولغانلىقىنى، شۇڭا ئاخىرى چىدىماي ئۆزى بۇ ئورەكلەرنى تىندۇرۇۋېتىشنى قارار قىلغانلىقىنى بىلدۈرگەن.

     بەخلەر ۋېرونىكانىڭ يوللاردىكى ئورەكلەرنى رېمونت قىلىۋاتقان كۆرۈنۈشىنى سىنغا ئېلىۋېلىپ تورغا چىقىرىۋەتكەن، بۇنىڭ بىلەن توردا بۇ توغرۇلۇق بەس-مۇنازىرىلەر بولۇپ كەتكەن. كۆپ سانلىق كىشىلەر قىزنىڭ غەيرىتىگە ئاپىرىن ئوقۇغان بەزىلەر يەنە بۇ قىزنىڭ ھەقىقەتەن توغرا ئىش قىلغانلىقىنى، يەرلىك ھۆكۈمەتنىڭ بۇ ئىشنى بىلگەندىن كېيىن چوقۇم ئازراق خىجىل بولۇشى كېرەكلىكىنى بىلدۈرگەن، يەنە بەزى كىشىلەر شەھەر باشلىقىنىڭمۇ بېرىپ قىزغا ياردەملىشىشى كېرەكلىكىنى ئېيتقان. تاراتقۇلار بۇ قىزنى «يول پەرىشتىسى» دەپ سۈپەتلىگەن بولۇپ بۇ قىزنىڭ قىلمىشىنىڭ مەملىكەتنىڭ ھەرقايسى جايلىرىدىكى نۇرغۇنلىغان كىشىلەرگە ئۈلگە بولۇپ، ئۇلارنىڭمۇ ئۆزلۈكىدىن چىقىپ شۇنىڭغا ئوخشاش يوللارنى رېمونت قىلغانلىقىنى خەۋەر قىلغان.

    لېكىن، ئېمولسكىي يەرلىك ھۆكۈمىتىنىڭ پىكرى تورداشلارنىڭكىگە ئوخشىمىغان. شەھەر باشلىقى ۋېرشىف دېۋولاۋىسكىينىڭ ئېيتىشىچە، ئەگەر قىز ئىشلەتكەن ماتېرىياللار ۋە تېخنىكىلار ئۆلچەمگە لايىق كەلمىسە ئۇ چاغدا قىزنىڭ بۇ قىلمىشى يوللارنى رېمونت قىلىش ئەمەس بەلكى يوللارغا ۋە شەھەر ئاھالىلىرىگە بولغان بىر خىل زىيانكەشلىك بولۇپ ھېسابلىنىدىكەن، ئۇ قىز ئەسلىدە بۇنداق قىلماي يوللارنىڭ ئەھۋالىنى ئالاقىدار تارماقلارغا ئىنكاس قىلىپ خىزمەتچى خادىملارنىڭ كېلىپ رېمونت قىلىشىنى كۈتىشى كېرەك ئىكەن.