جۇڭگو ئاخبارات تورى 23-ئىيۇن تېلېگراممىسى : چەت ئەل تاراتقۇلىرىنىڭ خەۋىرىگە قارىغاندا ، كورىيەنىڭ كاڭۋوندو ئۆلكىسى كوسوڭ ۋىلايىتىنىڭ شەرقىدىكى بىر قۇرۇقلۇق ئارمىيە قاراۋۇلخانىسىدا 22-ئىيۇن چۈشتىن كېيىن قوراللىق ئېتىشىش يۈز بېرىپ ، بەش ئەسكەر قازا قىلغان ، يەتتە ئەسكەر يارىلانغان .

22-ئىيۇن ، قوراللىق قاچقۇن ئەسكەر لىن X ئۆزىنى قوغلاپ كەلگەن ئەسكەرلەر بىلەن ئېتىشقان ھەمدە ھەربىي تەرەپنىڭ مۇھاسىرىسىگە چۈشۈپ قالغان . نۆۋەتتە ، ئۇنىڭ ئاتا-ئانىسى ئۇنى قورالنى تاشلاپ تەسلىم بولۇشقا نەسىھەت قىلىۋېتىپتۇ .

ھەربىي تەرەپ مۇھىم يوللارغا پىستىرما قويۇپ ، تەكشۈرۈشنى كۈچەيتكەن ، شۇنىڭ بىلەن بىر ۋاقىتتا ، كېچىدە يورۇتۇش بومبىسى ئىشلىتىپ ، قاچقۇن ئەسكەرنى تىك ئۇچار بىلەن قوغلىغان . ئىگىلىنىشىچە ، قوغلاپ تۇتۇش جەريانىدا لىن X نى قوغلاۋاتقان بىر ئەسكەر يارىلانغان ۋە تىك ئۇچار بىلەن دوختۇرخانىغا ئېلىپ بېرىلغان . ھازىرغا قەدەر ، شۇ ئەتراپتا تۇرۇۋاتقان پۇقرالارنىڭ يارىلانغانلىقى ياكى قازا قىلغانلىقى توغرىسىدا مەلۇمات يوق ئىكەن .

كورىيە ھەربىي تەرەپ بىلدۈرۈشىچە ، ھازىر لىن X نىڭ ئاتا–ئانىسى ئۇنىڭغا قورال تاشلاش توغرىسىدا نەسىھەت قىلىۋېتىپتۇ ، ناۋادا ، ئۇ يەنە كەينىدىن قوغلاۋاتقان ئەسكەرلەرگە قارىتىپ ئوق چىقىرىدىغان بولسا ، ھەربىي تەرەپ ئۇنى ئېتىۋېتىدىكەن . نۆۋەتتە ، ھەربىي تەرەپ بارلىق يوللارنى قامال قىلىپ ، شۇ ئەتراپتا تۇرۇۋاتقان 540 دىن ئارتۇق ئاھالىنى قوغداشنى كۈچەيتكەن .

ھەربىي تەرەپ ئەمەلدارىنىڭ بىلدۈرۈشىچە ، ئىككى تەرەپ كورىيە–چاۋشيەن ھەربىي ھەرىكەتسىز رايوننىڭ جەنۇبىدىكى پۇقرالار كىرىش چەكلەنگەن مۇداپىئە رايوننىڭ شىمالىغا توغرا كېلىدىغان جايدا تىركىشىپ قالغان . نۆۋەتتە ھەربىي تەرەپ لىن X نى مۇھاسىرىگە ئېلىۋېلىپ ، ئۇنىڭدىن قورال تاشلاشنى تەلەپ قىلغان . ئوق ئاۋازىنى ئاڭلىغان يەرلىكتىكى ئاھالىلەر رادىيو ئارقىلىق باشقىلارغا ئەھۋالنى ئۇقتۇرغان ھەمدە تاساددىپىيلىق يۈز بېرىشنىڭ ئالدىنى ئېلىش ئۈچۈن ئامال بار سىرتقا چىقماسلىقىنى ئەسكەرتكەن .