«ياپونىيە پەقەت بىر ‹قەغەز يولۋاس›، گومىنداڭ بىلەن كومپارتىيە ھەمكارلىشىپ ياپون باسقۇنچىلىرىغا بىردەك قارشى تۇرسا جۇڭگو چوقۇم قولدىن كەتكەن يەرلەرنى قايتۇرۇۋالىدۇ، جۇڭگوغا ياردەم بەرگەنلىك، ئۆزىمىزگە ياردەم بەرگەنلىك...» يەتمىش يىل بۇرۇن سۇڭ چىڭلىڭنىڭ جاراڭلىق سۆزلىرى، جۇڭگونىڭ ياپون جاھانگىرلىكىنىڭ تاجاۋۇزىغا قارشىلىق كۆرسىتىش ساداسىنى دۇنياغا ياڭراتتى. بۇ يىلنىڭ كېيىنكى يېرىمىدا «ياپون باسقۇنچىلىرىغا قارشى ئۇرۇش مەزگىلىدىكى سۇڭ چىڭلىڭ بىلەن خەلقئارادىكى دوستلارنىڭ مەدەنىيەت سۈرەتلەر كۆرگەزمىسى» شاڭخەيدىكى سۇڭ چىڭلىڭنىڭ بۇرۇنقى تۇرالغۇسى خاتىرە سارىيىدا باشلىنىپ، بۇ قىممەتلىك ئەسلىمىلەرنى قايتا ئەسكە ئالدى.

       بۇ قېتىمقى كۆرگەزمە «ئادالەت تەلىپى»، «ياردەم بېرىش كۆۋرۈكى» دېگەن ئىككى قىسىمغا بۆلۈنىدۇ. كۆرگەزمە بۇيۇملىرى ئىچىدە 1936-يىلى خەلقئارالىق دوستلار بىلەن سۇڭ چىڭلىڭنىڭ قوللىشى ئارقىسىدا نەشر قىلغان «جۇڭگونىڭ ساداسى» ژۇرنىلىنىڭ ئەسلى نۇسخىسى، 1937-يىلى سۇڭ چىڭلىڭ ئامېرىكا خەلقىگە رادىيودا سۆزلىگەن خەۋىرى، 1938-يىلى نەشر قىلىنغان سۇڭ چىڭلىڭ «جۇڭگو مەغلۇب بولماسلىق نەزەرىيەسى»، 1941-يىلى ئامېرىكا كالىفورنىيە «بىر قاچا ئاش ھەرىكىتى» خاتىرە ئىزنىكى قاتارلىقلار بار.