ئامېرىكا تاراتقۇلىرىنىڭ خەۋىرىگە قارىغاندا، يېڭى بىر يىلنىڭ تۇنجى خىزمەت كۈنى نيۇ يورك شەھىرىنىڭ باشلىقى ۋە ساقچى ئىدارىسىنىڭ باشلىقى تاراتقۇلار ۋەكىللىرىنى شەھەرلىك ساقچى باش ئىدارىسىدىكى يۇقىرى پەن-تېخنىكا مەركىزىگە تەكلىپ قىلغان بولۇپ، نيۇ يوركنىڭ ئۆتكەنكى ئىككى يىلدىن بۇيان جىنايەت ئۆتكۈزۈش نىسبىتىنىڭ ئۇدا تۆۋەنلەپ، داۋاملىق ھالدا پۈتۈن ئامېرىكا بويىچە ئەڭ بىخەتەر چوڭ شەھەرلىك ئورنىنى ساقلاپ كەلگەنلىكىنى جاكارلىغان.

   خەۋەردە دېيىلىشچە، نيۇ يورك شەھىرىنىڭ ساقچى باشلىقى مۇنداق دېگەن: 2015- يىلى نيۇ يوركنىڭ ئومۇمىي جەھەتتىكى جىنايەت سادىر بولۇش نىسبىتى 2014- يىلىغا قارىغاندا %1.7 تۆۋەنلىگەن، ئۇنىڭدىن باشقا بۇ نۆۋەتلىك ھۆكۈمەت ۋەزىپىگە ئولتۇرغان ئىككى يىلدىن بۇيان جىنايەت سادىر بولۇش نىسبىتى %5.8 تۆۋەنلىگەن. بۇنىڭ ئىچىدە، 2014-يىلى نيۇ يوركتىكى قەسىتلەپ ئۆلتۈرۈش ۋە بۇلاڭچىلىق قىلىش ۋەقەلىرىنىڭ نىسبىتى 50 يىلدىن بۇيان ئەڭ تۆۋەن بولغان بولۇپ، 2015-يىلىدىكى ئۆيگە ئوغرىلىققا كىرىش ۋە ئېغىر دېلو سادىر قىلىش جىنايى قىلمىشلىرىنىڭ نىسبىتىمۇ يېرىم ئەسىردىن بۇيانقى ئەڭ تۆۋەن نۇقتىغا يەتكەن.

     نيۇ يورك ساقچى باشلىقى يەنە شەھەر باشلىقى ۋە شەھەرلىك پارلامېنىتنىڭ شەھەرلىك ساقچى باش ئىدارىسىنى خىراجەت ۋە سىياسەت بىلەن قوللىغانلىقىغا رەھمىتىنى بىلدۈرگەن بولۇپ، ئۇ مۇنداق دېگەن: 2016-يىلى 2000 نەپەر ساقچى يېڭىدىن كوچا چارلاش ئەترىتىگە كىرىدۇ، ھەمدە ھەر بىر ساقچى خادىمى ئۈچۈن يۇقىرى پەن- تېخنىكىلىق ئېلېكتىرونلۇق ئەسۋاب سەپلىنىپ بېرىلىدۇ، مەسىلەن 911 ساقچىغا مەلۇم قىلىش مەزمۇنىدىكى قىسقا ئۇچۇر سىستېمىسى ۋە قوراللىق ھۇجۇم ئاۋازىنى كونتىرول قىلىش سىستېمىسى قاتارلىقلار. 2016- يىلىدىكى خىزمەتلەرنىڭ مۇھىم نۇقتىسى يېنىك جىنايەتلەرگە بولغان قانۇن ئىجرا قىلىش ۋە قولغا ئېلىشنى ئازايتىشقا مەركەزلىشىدۇ، ساقچى ئورگانلىرى بىلەن ئاھالىلەرنىڭ  مۇناسىۋىتىنى ياخشىلاشتا، تېخىمۇ يېقىن ۋە ئىناق ساقچى-پۇقرا مۇناسىۋىتى بەرپا قىلىنىدۇ.

  نيۇ يورك شەھەر باشلىقى مۇنداق دېگەن: جىنايەت سادىر قىلىش نىسبىتىنىڭ ئۈزلۈكسىز چۈشۈشى نيو يوركتا دۇنيا بويىچە ئەڭ مۇنەۋۋەر ساقچى ئەترىتىنىڭ بارلىقىنى كۆرسىتىپ بەردى، ئۇلارنىڭ تىرىشچانلىقى نيۇ يوركنى پۈتۈن ئامېرىكا بويىچە ئەڭ بىخەتەر چوڭ شەھەرگە ئايلاندۇردى، شەھەرلىك ھۆكۈمەت يېڭى بىر يىلدا شەھەرلىك ساقچى ئىدارىسىنىڭ خىزمىتىنى پۈتۈن كۈچى بىلەن قوللايدۇ.