ھىندىستاننىڭ يېڭى دېھلى، راھەت مېھمانسارىيىنىڭ ئايال خىزمەتچىلىرى 10 كۈن مەركەزلىك ئۆگەنگەن ئۆزىنى قوغداش ماھارىتىنى نامايەن قىلماقتا.

      ھىندىستاننىڭ يېڭى دېھلى، راھەت مېھمانسارىيىنىڭ ئايال خىزمەتچىلىرى 10 كۈن مەركەزلىك ئۆگەنگەن ئۆزىنى قوغداش ماھارىتىنى نامايەن قىلماقتا.

   ئەنگلىيە تاراتقۇلىرىنىڭ 22-نويابىر خەۋەر قىلىشىچە، ھىندىستاننىڭ پاختەختىدىكى ئاياللار بەس-بەستە ئۆزىنى قوغداش ماھارىتى ئۆگىنىش سىنىپىغا قاتنىشىپ، قارىمۇچ تۇمانلاشتۇرۇش دورىسى سېتىۋالغان. ئالدىن زاكاس قىلىنغان ئايال شوپۇر ھەيدىگەن تاكسىلارمۇ بالدۇر ئىشتىن چۈشۈشى مۇمكىن. بۇ ئەھۋاللار ئالدىنقى ئايدا يامان خاراكتېرلىك مەجبۇرىي باسقۇنچىلىق دېلوسى يۈز بەرگەندىن كېيىن، ئۇلاردىكى بىخەتەرلىك تۇيغۇسىنىڭ بارغانسېرى يوقاۋاتقانلىقىنى چۈشەندۈرىدۇ.

   ئۆتكەن يىلى 12-ئايدا، 23 ياشلىق بىر قىز ئوقۇغۇچى بىر ئاممىۋى ئاپتوبۇستا 6 نەپەر ئەرنىڭ نۆۋەتلىشىپ باسقۇنچىلىق قىلىشىغا ئۇچرىغان، ئارقىدىن يەنە يۇقىرى سۈرئەتلىك يولغا تاشلىۋېتىلگەن. بۇ ۋەقە پۈتۈن ھىندىستاننى چۆچۈتۈپلا قالماي، يەنە مىسلىسىز دەرىجىدىكى ئاياللار بىخەتەرلىكىنى قوغداش نامايىش دولقۇنىنى قوزغىدى.

   خەلقنىڭ غەزىپىنى بېسىش ئۈچۈن، ھىندىستاندىكى ئالاقىدار تەرەپلەر بىرقاتار تەدبىرلەرنى قوللاندى، ئەمما كۆپلىگەن ئاياللار يەنىلا «ساقچىلارنىڭ بىزنىڭ جىسمانىي بىخەتەرلىكىمىزنى قوغدىشىدىن ئۈمىد كۈتكىلى بولمايدۇ» دەپ قارىدى.

   18 ياشلىق بىر قىز ئالىي مەكتەپ ئوقۇغۇچىسى «يېڭى دېھلىنىڭ ئاياللارغا نىسبەتەن بىخەتەر بولماسلىقى ئاللىقاچان ھەممە بىلىدىغان ئىشقا ئايلاندى. كۆپچىلىكنىڭ ھەممىسى بۇرۇنلا بىلەتتى، بۇ دېلو پەقەت ھەقىقەتنى ئاشكارە قىلدى» دېدى. ئۇ ھازىر تۇنجى قارارلىق ئۆزىنى قوغداش بويىچە تەربىيەلەش كۇرسىغا قاتنىشىۋاتىدۇ.

   ئۇ مۇنداق دېدى:«بۇ ئىش ئاياللارنىڭ ئىشەنچىسىگە قاتتىق زەربە بەردى، بىزمۇ بۇنداق تۇيغۇدا بولۇشنى خالىمايمىز، بىز مەيلى كۈندۈزى بولسۇن ياكى كېچىسى بولسۇن قەيەرنى خالىساق شۇ يەرگە بېرىشنى، بىزدە بىخەتەرلىك تۇيغۇسى بولۇشىنى ئۈمىد قىلىمىز، شۇڭا ئۆزىمىزنى قوغداشنى ئۆگەنمىسەك بولمايدۇ.»

   ئىگىلىنىشچە، يېڭى دېھلىغا «باسقۇنچىلىق شەھىرى» دېگەن نومۇسلۇق نام بېرىلگەن، بۇ شەھەردىكى ھەر يىلى يۈز بېرىدىغان باسقۇنچىلىق دېلوسى ھىندىستاندىكى باشقا شەھەرلەردىن كۆپ ئېشىپ كەتكەن. شەخسىي تاكسى زاكاس قىلالمىغان ياكى ئۆزىنى قوغداش دەرسىگە قاتنىشىشقا پۇلى يوق قىزلار ئۈچۈن ئېيتقاندا، قارىمۇچ تۇمانلاشتۇرۇش دورىسىمۇ خېلى يامان ئەمەس تاللاش ھېسابلىنىدۇ.