بەخىتسىزلەر

بەخىتسىزلەر

ئاپتورى:يۈسۈپجان قېيۇم

باھاسى:40.00

تىراژى:1-3000

2010-يىلى 11-ئاي 1-نەشرى

2010-يىلى 11-ئاي 1-بېسىلىشى

ISBN:9787537190046

                                                                                   مۇقەددىمە

    ئاقئۆستەڭ بوستان مەھەللىنىڭ شىمالىي قىسىمىدىكى دۆڭلۈكتىن ياقىلاپ ئۆتىدۇ . بوستان مەھەللە قارىماققا ئەنە ئاشۇ دۆڭلۈككە بېشىنى قويۇپ كۈلۈمسىرەپ ياتقان پەرىزاتقا ئوخشىسا ، بەزىدە ئۇ ئاقئۆستەڭ قۇچىقىغا ئېلىۋېلىپ ئەركىلىتىۋاتقان بالىغا ئوخشىشىپمۇ قالىدۇ .

     ئۇزاق يىللاردىن  بۇيان ئادەملىرىنى ، مال – چارۋىلىرىنى ، كۆز يەتكۈسىز ئېتىزلىرىنى ، ھەر كۈنى كەلگەندە «ئېچىل داستىخىنىم» دەك نېمەت تۆكۈلىدىغان باغلىرىنى سۇغىرىپ ، ئالقىنى ئوچۇق دېھقاندەك ھەممىنى بېقىپ كېلىۋاتقان ئاقئۆستەڭ مۇشۇ كەمگىچە بوستان مەھەللىدە ياشاپ ئۆتكەن ئادەملەرنىڭ بالىلىقتىكى ۋاڭ چۇڭلىرىنى ، قېرىلىقتىكى تەنھالىقنى كۆرگەن ، تالاي ئادەملەرنىڭ قىرغىقىغا كېلىپ يىغلاپ تۇرۇپ ئېيتقان يۈرەك سۆزلىرىنى دۇلقۇنلىرىغا سىڭدۈرۈپ ئۇلارغا ئۈنسىز تەسەللىي بەرەئەن . جاھان ئىئوپلۇقىنى كۆرمىگەن ، بۇ ئالەمنىڭ دەرد – ئەلەملىرىدىن خالاس قىلىشنى ئۆتۈنۈپ باغرىغا ئۆزىنى ئاتقان بالىلىرىنىمۇ مۇرادىغا يەتكۈزۈپ ، ئۇلارنى ھەسرەت – نادامەت چاڭگىلىرىدىن قۇتۇلدۇرغان .

    ئاقئۆستەڭ يېقىملىق كۈيلىرى ، ئۈزۈلمەس ئېقىنلىرى بىلەن ھاياتلارغا مۇھەببەت ۋە ئۈمىد ئاتا قىلغان بولسا ، ئۆزىدىن ئانچە يىراق بولمىغان يەرگە جايلاشقان ، كۈندىن – كۈنگە كۆپىيىۋاتقان قەبرىلەرنى سېھىرلىك ئەللەي  ناخشىسى بىلەن پەپىلەيدۇ .

    ھەر كۈنى سەھەر قۇياش سۈزۈك ئېقىنلىرىدا يۇيۇنۇپ ، بوستان مەھەللىگە سالام قىلغان چاغدا ، قوي – كالا پادىلىرى ئڭنىڭ مەغرىب تەرىپىدىكى ئۇپۇققا تۇتۇشقان سازلىققا ئۇزايدۇ .

    بۇ ئىش بۇ تۇپراققا قىش پەسلى كېلىپ تەبىئەت ئاق توننى كىيگۈچە بىر خىل رېتىمدا داۋاملىشىپ تۇرىدۇ .

    باھار ئايلىرىنىڭ ئادەمنى زوقلاندۇرىدىغان ، قۇياش كۈلۈپ تۇرىدىغان كۈنلەردە بولسۇن، ياكى يامغۇر چېچەكلەپ  جۇدۇن – چاپقۇنلۇق كۈنلەردە بولسۇن ، ياكى قىش پەسلىنىڭ جفندىن ئۆتىدىغان سوغۇق كۈنلىرىدە بولسۇن ، بىر قىز ئاقئۆستەڭ بۇيىغا دائىم كېلىدۇ . بەزىدە بىر كۈندە بىر نەچچە قېتىملاپ كېلىدۇ . ئاقئۆستەڭ ساھىلىغا ، قەبرىستاندىن ئانچە يىراق بولمىغان ئاۋۇ دۈمچەك ئاددىي قەبرە ئۇنىڭ دائىم يۇقلايدىغان جايى ، ئۇ قەبرىگە قۇيۇلغان زادى كىم ؟ بۇ قىز بىلەن ئۇنىڭ نېمە باغلىنىشى بار؟