ساداقەت

ئاپتورى:ماھىنۇر ئابدىلىم

باھاسى:18.00

2009-يىلى 4-ئاي 1-نەشرى

2009-يىلى 4-ئاي 1-بېسىلىشى

تىراژى:1-3000

ISBN:9787537161251

نەشرىياتتىن

ئايال ئاپتورلىرىمىز ئىچىدە ئۆز ئىجتىھاتى بىلەن بارغانسېرى ئوقۇرمەنلەرنىڭ دىققىتىگە سازاۋەر بولۇۋاتقان ياش يازغۇچى ماھىنۇر ئابدىلىم 1973-يىلى 18-فېۋرال كورلا شەھىرىدە ئوقۇتقۇچى ئائىلىسىدە دۇنياغا كەلگەن . 1990-يىلى كورلا شەھەرلىك 6-ئوتتۇرا مەكتەپنى پۈتتۈرۈپ ، شىنجاڭ ئەدلىيە مەكتىپىگە قوبۇل قىلىنغان . ھازىر كورلا شەھەرلىك خەلق سوت مەھكىمىسىدە ئىشلەۋاتىدۇ .

بالىلىق دەۋردىن باشلاپ ئەدەبىياتقا ھېرىسمەن ماھىنۇر 1989-يىلى «بوستان» ژۇرنىلىغا ئېلان قىلىنغان «ساقلىنىپ قىلىنغان بايلىق » ماۋزۇلۇق ھېكايىسى بىلەن ئەدەبىي ئىجادىيەت سېپىگە كىرىپ كەلگەن . شۇنىڭدىن تارتىپ ئاپتورنىڭ گېزىت – ژۇرناللاردا 100 پارچىدەك ھېكايە ، ئوچېرك ، ئەدەبىي ئاخباراتلىرى ئېلان قىلىندى . 1989-يىلى ئۇنىڭ «مېنىڭ ئانام» ماۋزۇلۇق ئوچېركى ئاپتونوم رايون بويىچە 1- دەرىجىلىك بالىلار ئەدەبىياتى «ياخشى ئەسەر» مۇكاپاتىغا ئېرىشكەن . 1990-يىلى «رېمونتچىنىڭ ئوغلى » ماۋزۇلۇق ھېكايىسى ئاپتونوم رايون بويىچە 3-دەرىجىلىك «غۇنچە مۇكاپاتى» غا ئېرىشكەن.

ھېكايە ژانىرى ئۇنىڭ ئىجادىيىتىدە ئەڭ مۇھىم ئورۇن تۇتۇپ كەلدى . ئۇنىڭ «مۇھەببەت ۋە ئازاب» ناملىق ھېكايىسى 1997-يىلى بايىنغولىن ئوبلاستى بويىچە ئۆتكۈزۈلگەن «تەكلىماكان روھى» ئىجادىيەت مۇسابىقىسىدە 2-دەرىجىلىك مۇكاپاتقا ، 1988-يىلى «يېشىل ياقۇت كۆزلۈك ئۈزۈك» ناملىق ھېكايىسى «قۇياش مېھرى» ئەدەبىي ئىجابىي مۇسابىقىسىدە 2-دەرىجىلىك مۇكاپاتقا ، «يېزىدىن كەلگەن قىز» ناملىق ھېكايىسى «كروران» ژۇرنىلى تەرىپىدىن «20 يىلدىن بۇيانقى نادىر ئەسەرلەر» 1- دەرىجىلىك مۇكاپاتىغا ئېرىشكەن .

ئۇنىڭ يەنە «تارىم» ژۇرنىلىدا ئېلان قىلىنغان «كۆمۈلگەن چوغ» ناملىق پوۋېستى ، «ئەتىرگۈل ھېكايىسى» ، «سېرىق چاچلىق ئايال» ، «ھاردۇق يەتكەن ئايال» ناملىق ھېكايىلىرى ئوقۇرمەنلەرنىڭ ياخشى باھاسىغا سازاۋەر بولدى .

ئاپتورنىڭ يەنە «شىنجاڭ قانۇنچىلىق گېزىتى» دىمۇ ئۆز كەسپىگە مۇناسىۋەتلىك نۇرغۇنلىغان دېلو خەۋەرلىرى ، دېلو تەھلىللىرى ۋە قانۇنغا دائىر ھېكايىلەرنى ئارقا – ئارقىدىن ئېلان قىلىپ بۇ ساھەدىكى ئۆز تالانتىنى نامايان قىلدى . شۇ سەۋەبتىن 2006-يىلى «شىنجاڭ قانۇنچىلىق گېزىتى» تەرىپىدىن مۇنەۋۋەر «تەكلىپ مۇخبىر» بولۇپ باھالاندى.

2006-يىلى ئاپتورنىڭ نەشرىياتىمىز تەرىپىدىن «تۇمان تارىغان سەھەر» ناملىق رومانى ئېلان قىلىنىپ بازارلىق رومانلار قاتارىدىن ئورۇن ئالدى.

«ساداقەت» ناملىق بۇ رومانى ئاپتورنىڭ ئىككىنچى رومانى بولۇپ ، بۇ رومان ئاپتورنىڭ ئۇزۇن يىللاردىن بۇيانقى قانۇن كەسپى بىلەن شۇغۇللىنىش جەريانىدا كۆزەتكەن ، توپلىغان ، تۇرمۇش ماتېرىياللىرىدىن تاۋلاپ يېزىپ چىققان رومان ئىجادىيىتىدىكى تەسىرلىك رومان بولۇپ ، ئاپتورنىڭ رومان ئىجادىيىتىدىكى يەنە بىر مۇۋەپپەقىيىتى ھېسابلىنىدۇ .

ئاپتور ھازىر شىنجاڭ يازغۇچىلار جەمئىيىتى ۋە بايىنغولىن ئوبلاستلىق يازغۇچىلار جەمئىيىتىنىڭ ئەزاسى.