كىتاب ئوقۇش ئادىتى كىشىلىك دۇنيانى ئەكس ئەتتۈرۈپ بېرىدۇ！！

كىتاب ئوقۇش ئادىتى بىر ئادەمنىڭ خاسلىقى، ئالاھىدىلىكى شۇنداقلا كەيپىيات ئۆزگۈرۈشىنى چۈشىنىشتە ناھايىتى چوڭ ياردىمى بار. بۇنىڭغا قارىتا FBI كىتاب ئوقۇشنى ياخشى كۆرىدىغان كىشىلەرنى تۆۋەندىكى تۈرلەرگە ئايرىغان.

1. رومانتىك ھېكايىلەرنى ئوقۇشنى ياخشى كۆرىدىغان كىشىلەر ئادەتتە ھېسسىياتقا باي، كۈزىتىش ئىقتىدارى كۈچلۈك، بىۋاستە سېزىمىدىن قىلچىمۇ گۇمانلانمايدۇ، تۇرمۇشقا ئىشەنچى يېتەرلىك، شۇنداقلا بۇ خىل كىشىلەر قىيىنچىلىققا دۇچ كەلگەندە ياكى مەغلۇبىيەتكە دۇچار بولغاندا قەتئىي ئىرادە بىلەن تىرىشچانلىق كۆرسىتىدۇ، يىقىلغان ئورنىدىن دەس تۇرالايدۇ.

2. تەرجىمىھال خاراكتېرىدىكى ئەسەرلەرنى ياقتۇرىدىغان كىشىلەر چوڭقۇر پىكىر قىلىدۇ، ئۇلارنىڭ بويسۇندۇرۇش ئارزۇسى كۈچلۈك، ھەم پۇختا، كەمتەرلىك بىلەن سوراشقا ئامراق، پايدا – زىيان، ئېرىشكىنى بىلەن يوقاتقىنى قاتارلىقلارنىڭ ھەممىسىنى ئەتراپلىق دەڭسەپ ۋەزىيەتنى كونتىرول قىلالايدۇ، شارائىت پىشىپ يېتىلمىسە، ھەرگىزمۇ ئاقىۋەتنىڭ قانداق بولۇشىدىن قەتئىينەزەر مەجبۇرىي ھەرىكەت قىلمايدۇ.

3. قىزىقارلىق كۈلدۈرگە ئەسەرلىرىنى ئوقۇشنى ياقتۇرىدىغان كىشىلەر سەل بىغەم، ئوچۇق، يۇمۇرىستىك، ھەر قانداق ئىشقا دۇچ كەلگەندە ياكى توسالغۇغا ئۇچرىغاندا قورۇقمايدۇ، ئۆزىگە بولغان ئىشەنچى كۈچلۈك.

4. گېزىت ۋە ئاخبارات خەۋەرلىرىنى كۆرىدىغان كىشىلەرنىڭ ئىرادىسى كۈچلۈك، ئەمەلىيەتچىل كېلىدۇ. ئۇلار ئادەتتە دۆلەت ئىچى – سىرتىدىكى چوڭ ئىشلارغا ناھايىتى كۆڭۈل بۆلىدۇ، دۇنيانىڭ ئۆزگۈرۈش ۋەزىيىتىگە كۆڭۈل بۆلىدۇ، ئۆزىنىڭ ھەرىكىتى ئارقىلىق زاماننىڭ قەدىمىگە يېتىشىشنى ئارزۇ قىلىدۇ. بۇ خىل كىشىلەرنىڭ ئىدىيىسى سەزگۈر، يېڭى شەيئىلەرگە تىزلىكتە ئىنكاس قايتۇرالايدۇ، شۇنداقلا ھەر خىل ئىدىيىلەرنى قوبۇل قىلىشقا ماھىر كېلىدۇ.

5. رەسىملىك ژۇرنال ياكى چوڭ تىپتىكى سۈرەت توپلاملىرىنى ياقتۇرىدىغان كىشىلەرنىڭ ئىشتىياقى ئۇرغۇپ تۇرىدۇ، بۇنداق ئادەملەر ئادەتتە قىزغىن، مېھماندوست، دوست تۇرۇشنى ياخشى كۆرىدۇ، ئەتراپىدا نۇرغۇن كىشىلەرنىڭ بولۇشغا ئادەتلىنىپ قالغان.

6. رازۋېدكا ياكى ئەنزە پاش قىلىش تۈرىدىكى كىتابلارنى كۆرىدىغان كىشىلەر ئادەتتە ئىدىيە جەھەتتىكى رىقابەتنى قوبۇل قىلىشقا جۈرئەتلىك كېلىدۇ، ئۇلارنىڭ لوگىلىكلىق تەپەككۈر ئىقتىدارى كۈچلۈك، ھەر خىل قىيىن مەسىلىلەرنى ھەل قىلشقا ماھىركېلىدۇ، باشقىلارغا نىسبەتەن ھەل قىلىش تەس مەسىلىلەرگە قارىتا ئادەتتە ئىشتىياقى تېخىمۇ كۈچلۈك، بولۇپ، قىيىن مەسىلىلەرنى ھەل قىلىش ئارقىلىق خۇشاللىق تاپالايدۇ.

7. ئەگەر فانتازىيىلىك كىتابلارنى گۆھەر دەپ قارىساق، ئۇنى ياقتۇرىدىغان كىشىلەر جەزمەن تەسەۋۋۇرغا باي، تەپەككۇر قىلىشى تەرەققىي قىلغان، شۇنداقلا مول ئىجادچانلىققا ئىگە بولىدۇ. ئۇلار دائىم ئىلىم – پەن تېخنىكىسى تەرىپىدىن جەلىپ قىلىنىپ، كەلگۈسى ئۈچۈن پىلان تۈزۈدۇ. بىراق قەتئىي داۋاملاشتۇرۇش روھىي كەمچىل بولىدۇ.

8. مالىيە – ئىقتىساد تۈرىدىكى كىتابلارنى كۆرۈشكە ئامراق كىشىلەر مەلۇم بىر ساھەدە ئۈنۈم ۋە مۇۋەپپەقىيەت قازانغان كىشىلەرگە ئېتقاد قىلىدۇ،ھەمدە ئۇلارنى ئۈلگە قىلىپ، ئۆزىنىڭ رىقابەت كۈچىنى تولۇق جارى قىلدۇرۇشنى ئارزۇ قىلىپ، ئۆزى ئارزۇ قىلغان كىشىلىك ھاياتنىڭ چوققىسىغا يېتىشنى تىرىشىدۇ.

9. زامانىۋى، مودا ژۇرناللارنى ياقتۇرىدىغان كىشىلەرنىڭ شۆھرەتپەرەسلىكى ئېغىرراق بولۇپ، ئۆزىنىڭ تاشقى قىياپىتى ۋە كېيىنىشىگە بەك ئەھمىيەت بېرىپ، ئابرويىغا دىققەت قىلىدۇ، كۈندىلىك تۇرمۇشتا ئىمكانقەدەر ئۆزىنىڭ باشقىلارنىڭ كۆڭلىدىكى ئوبرازىنى ئۆزگەرتىشكە تىرىشىپ، ئۆزىنى ھەممىدىن يۇقىرى دەپ چاغلايدۇ.

10. ناخشا – شېئىر تۈرىدىكى كىتابلارنى بەك ياقتۇرىدىغان كىشىلەر كىشىلىك تۇرمۇشنى ئىنتايىن ياخشى كۆرىدۇ، كىشىلىك دۇنيادىكى ھەممە گۈزەل نەرسىلەرنى چىن دىلىدىن ياخشى كۆرىدۇ. ئۇلار ئاڭلىق ھالدا شېئىرنىڭ تاۋلىشى ئارقىسىدا قايتا ئويلىنىپ تەپەككۈر قىلىپ، روھىيىتىنى تازىلاپ، «ھەقىقەتەن مۇكەممەل» بولۇشنى تىرىشىپ قوغلىشىدۇ.

11. مۇبادا تارىخىي كىتابلارنى زوق ئىشتىياق بىلەن ئوقۇسا، بۇ خىل كىشىلەر ئەمەلىيەتكە ھۆرمەت قىلىدۇ، ئېتىبار بېرىدۇ، ئۈنۈمگە ئەھمىيەت بېرىدۇ. ئۇلار ئادەتتە ۋاقىتنى تولۇق ئورۇنلاشتۇرۇپ، تىرىشىپ خىزمەت قىلىشقا ياكى ئەستايىدىللىق بىلەن ئۆگۈنۈش – تەتقىقاتقا زېھنىنى سەرىپ قىلىدۇ.

ئالىمجان نەسىردىن تەرجىمىسى

مەنبە:خەلق تورى