ئىراندىكى ئۇران قويۇلدۇرۇش زاۋۇتى ( ماتېرىيال سۈرەت )
ياۋروپا ئىتتىپاقىنىڭ بىر دىپلوماتىيە باياناتچىسىنىڭ ئېيتىشىچە ، 30–نويابىر ئىراننىڭ 6– ۋە 7– دېكابىر جەنۋەدە كۆپچىلىكنىڭ دىققىتىنى قوزغاۋاتقان يادرو پىلانى توغرىسىدا ب د ت خەۋپسىزلىك كېڭىشىنىڭ بەش كېڭەشكە ئەزا دۆلىتى ھەمدە گېرمانىيە بىلەن يېڭى بىر نۆۋەتلىك سۆھبەتنى قانات يايدۇرۇشقا قوشۇلغان .
بۇ باياناتچى يەنە ئىراننىڭ باش سۆھبەت مۇتەخەسىسى جالىلىنىڭ ياۋروپا ئىتتىپاقىنىڭ باش دېپلوماتىيە ئەمەلدارى ئاستون بىلەن سۆھبەت ئۆتكۈزىدىغانلىقىنى ئېيتقان .
ئاستون ئالتە دۆلەت ۋەكىللىرىنى ( جۇڭگو ، رۇسىيە ، ئامېرىكا ، ئەنگىلىيە ، فرانسىيە ۋە گېرمانىيە ) باشلاپ ئىران بىلەن سۆھبەت ئۆتكۈزىدىكەن .
بۇ 2009 ــ يىل ئۆكتەبىردىن بۇيان ئىران بىلەن ئالتە دۆلەت ئۆتكۈزگەن تۇنجى سۆھبەت ھېسابلىنىدىكەن .
ئىلگىرى ئىككى تەرەپ ئوتتۇرىسىدىكى ئىختىلاپ سۆھبەتنىڭ ئۆتكۈزۈلۈش ۋاقتىنى كېچىكتۈرىۋەتكەن بولۇپ ، ئالتە دۆلەت سۆھبەتنىڭ مۇھىم نۇقتىسىنىڭ ئىراننىڭ قويۇلدۇرۇلغان ئۇران ئىشلەپچىقىرىش جەريانىغا قارىتىلىشنى ئۈمىد قىلسا ، تېھران سۆھبەت جەريانىدا نۇرغۇن مۇھاكىمە قىلىنىدىغان مەسلىلەر توغرىسىدا سۆھبەت ئېلىپ بېرىشنى ئارزۇ قىلىدىكەن . بۇ مەسلە يەنە خەۋپسىزلىك مەسلىسىنى ئۆز ئىچىگە ئالىدىكەن .
ئامېرىكا ، ياۋروپا ۋە ئىسرائىلىيە ئىراننىڭ يادرو تېخنىكىسى ئارقىلىق يادرو قورالى ئىشلەپچىقىرىشىدىن ئەنسىرەيدىكەن ، بىراق تېھران باشتىن ئاخىر بۇ يادرو پىلانىنىڭ كىشىلەرنى ئېنىرگىيە بىلەن تەمىنلەيدىغانلىقى ۋە تېنچلىقنى ئاساس قىلغانلىقى توغرىسىدا چىڭ تۇرغان .
ئۇنىڭدىن باشقا ، ئىران 29 ــ نويابىر ئىراندىكى تۇنجى يادرو ئېلېكتىر ئىستانىسىنىڭ ئۇران قويۇلدۇرۇش سېنترىفۇگىنىڭ كومپىيوتېر ۋىرۇسىنىڭ تەسىرىگە ئۇچرىغانلىقىنى ئېتىراپ قىلغان . ئۇنىڭدىن باشقا نەچچە سائەت بۇرۇن ئىراننىڭ پايتەختى تېھراندا ئىككى قېتىم پارتلاش ۋەقەسى يۈز بېرىپ بىر يادرو مۇتەخەسىسى قازا قىلغان ، يەنە بىر يادرو مۇتەخەسىسى يارىلانغان .
تەھلىلچىلەر بۇ ئىككى قېتىملىق پارتلىتىش ۋەقەسىنىڭ كېلەر ھەپتە ئۆتكۈزۈلىدىغان ئىران بىلەن ئالتە دۆلەت سۆھبىتىگە بەزىبىر ئوڭۇشسىزلىقلارنى ئېلىپ كېلىشى مۇمكىن دەپ قارىغان .
