شىنخۇا تورى پولشا 26–سېنتەبىر تېلېگراممىسى : 26 ــ سېنتەبىر گىرمانىيەنىڭ پايتەختى بېرلىننىڭ جەنۇبىدىكى 10–نومۇرلۇق يۇقىرى سۈرئەتلىك تاشيولدا كېتىۋاتقان پولشانىڭ بىر ساياھەت ئاپتوبۇسى بىر پىكاپنىڭ يان تەرەپتىن سوقۇلۇپ كېتىشى سەۋەبىدىن كونتروللىقىنى يوقىتىپ ، كۆۋرۈك تۈۋرۈكىگە ئۈسۈۋالغان . ۋەقەدە ئاز دېگەندىمۇ 13 پولشالىق ساياھەتچى قازا قىلغان ، 38 ساياھەتچى يارىلانغان . بۇ ، گىرمانىيەدە بۇ يىل يۈز بەرگەن ئەڭ ئېغىر بولغان قاتناش ۋەقەسى بولۇپ ھېسابلىنىدىكەن .
خەۋەرلەرگە قارىغاندا ، ئاپتوبۇستا ئىككى شوپۇر ، 47 نەپەر ساياھەتچى بار بولۇپ ، ساياھەتچىلەرنىڭ كۆپىنچىسى پولشانىڭ غەربىي شىمال قىسمىدىكى ئورمانچىلىق ئىدارىسىنىڭ ئىشچى ــ خىزمەتچىلىرى ۋە ئائىلە تاۋاباتلىرى بولۇپ ، ئۇلار ئەمدى تېخى ئىسپانىيەدىكى ساياھىتىنى ئاياغلاشتۇرۇپ قايتىپ كېلىۋاتقان ئىكەن .
نۆۋەتتە پىكاپنىڭ يۇقىرى سۈرئەتلىك تاشيولغا چىققاندىن كېيىن كونتروللىقىنى يوقىتىشىدىكى سەۋەب تېخى ئېنىقلانمىغان بولۇپ ، ساقچى تەرەپ شوپۇرنىڭ بەك چارچاپ كەتكەن بولۇشى ، يامغۇرلۇق ھاۋارايى ، يولنىڭ تېيىلغاق بولۇشى شۇنداقلا دىققىتىنى مەركەزلەشتۈرەلمەسلىك قاتارلىق تۈرلۈك سەۋەبلەرنىڭ ۋەقەنى كەلتۈرۈپ چىقارغانلىقىنى چەتكە قاقمايدىغانلىقىنى بىلدۈرگەن .
ۋەقە يۈز بەرگەندىن كېيىن ، بېرلىن ۋە براندېنبۇرگ ئىشتاتى 250 نەپەر قۇتقۇزغۇچى خادىمنى نەق مەيدانغا ئەۋەتكەن بولۇپ ، 50 نەپەر ساقچى ۋە ئالتە تىك ئۇچار بۇ قېتىمقى قۇتقۇزۇشقا قاتناشقان .
پولشا زۇڭلىسى تۇسىك شۇ كۈنى كەچتە دوختۇرخانىغا يىتىپ بېرىپ يارىدارلارنى يوقلىغان بولۇپ ، ئۇ يەنە گىرمانىيە زۇڭلىسى مېركېل بىلەن مۇناسىۋەتلىك ئىشلار توغرۇلۇق سۆھبەتلەشكەن . مېركېل بىلەن گىرمانىيە دېپلوماتىيە مىنىستىرى ۋېستىۋېل ئايرىم - ئايرىم ھالدا ۋەقەنى ئاڭلاپ قاتتىق چۆچۈگەنلىكىنى ، گىرمانىيە زۇڭتۇڭى ئۇرفنىڭ پولشا زۇڭتۇڭى كىموروفۇسىكىيغا ھال سوراش تېلېگراممىسى ئەۋەتكەنلىكىنى بىلدۈرگەن .
