غۇلجا شەھەرلىك 7 - ئوتتۇرا مەكتەپنىڭ پېشقەدەم ماتېمات...

　　 36 يىللىق ئوقۇتقۇچىلىق ھاياتىمنى مىللەتنىڭ، كەلگۈسىنىڭ ئىز باسارلىرى − ئوقۇغۇچىلارنى ياراملىق ئەۋلادلاردىن قىلىپ يېتىشتۈرۈشكە ئاتاپ، ئۇلارغا سىڭدۈرگەن ئەجرىمدىن تولىمۇ رازىمەن، -　غۇلجا شەھەرلىك 7 - ئوتتۇرا مەكتەپنىڭ پېشقەدەم ماتېماتىكا ئوقۇتقۇچىسى سەرۋەر سەيدالىم قەلب سۆزىنى شۇنداق ئىزھار قىلدى. سەرۋەر سەيدالىم　1958-يىلى سابىق شىنجاڭ ئىنستىتۇتىنىڭ فىزىمات فاكۇلتېتىنى پۈتكۈزۈپ، ئىلى قىزلار تولۇق ئوتتۇرا مەكتىپىگە ئوقۇتقۇچىلىققا ئورۇنلاشقانىدى. ئۇ ئىشقا چۈشۈپلا، فىزىكا ئوقۇتقۇچىسىلىق ۋەزىپىسىنى زىممىسىگە ئېلىپ، پېشقەدەم ئوقۇتقۇچىلاردىن ئۆگىنىپ، ۋەزىپىسىنىڭ ھۆددىسىدىن چىقىشقا تىرىشىش بىلەن بىللە، مېھرىنى ئوقۇغۇچىلارغا بېرىپ، مەكتەپ رەھبەرلىرىنىڭ دىققىتىنى تارتتى. ئۇ ئىزچىل ماتېماتىكا، فىزىكا دەرسى بېرىپ، ھەر سائەتلىك دەرسنى ئەتراپلىق ماتېرىيال كۆرۈپ، پۇختا تەييارلىق بىلەن چۈشىنىشلىك ئۆتكەچكە، ئۇنىڭ دەرسىنى ئاڭلايدىغان ئوقۇغۇچىلار دەرستىن زېرىكىش ھېس قىلمايدىغان، ئەكسىچە ماتېماتىكا دەرسىگە ئالاھىدە قىزىقىدىغان كەيپىيات شەكىللەندى. ئۇ　مەسئۇل بولغان سىنىپتىكى ئوقۇغۇچىلارنىڭ ماتېماتىكا نەتىجىسى مەكتەپ بويىچە ئىزچىل ئالدىنقى قاتاردا تۇردى. مەكتەپ رەھبەرلىرى ئۇنى ھەر يىلى ئالىي مەكتەپكە ئىمتىھان بېرىدىغان سىنىپلارنىڭ ماتېماتىكا دەرسنى تەكرار قىلىپ بېرىشكە ئورۇنلاشتۇردى. ئۇ بۇ سىنىپلارغا دەرس ئۆتۈشتە ئەتراپلىق بىلىمگە ئىگە بولۇشنىڭ زۆرۈرلۈكىنى ھېس قىلدى. بۇنىڭ ئۈچۈن خەنزۇچە ماتېرىياللاردىن پايدىلىنىشقا توغرا كېلەتتى.　سەرۋەر سەيدالىم دەسلەپتە بۇ جەھەتتە قىينىلىپ، خەنزۇ تىلىنى ئۆگىنىش نىيىتىگە كەلدى. لېكىن، ئەينى چاغدا ئۇنىڭ ئىككى پەرزەنتى كىچىك بولۇپ، ياشىنىپ قالغان ئانىسىنىڭ ھالىدىن خەۋەر ئېلىشمۇ ئۇنىڭ زىممىسىدە ئىدى. ئۇ كۈندۈزى دەرس ئۆتسە، كەچتە ئائىلىسىدىكىلەرنىڭ تامىقىنى بېرىپ بولۇپلا، كەچلىك كۇرسقا ماڭاتتى. ئۇ شۇ تەرىقىدە ئىككى يىل كەچلىك كۇرستا خەنزۇ تىلى ئۆگىنىپ، خەنزۇچە ماتېماتىكا دەرسلىك ماتېرىياللىرىدىن پايدىلىنالايدىغان سەۋىيەگە يەتتى. بۇنىڭ بىلەن ئۇنىڭ دەرس ئۆتۈش سەۋىيەسى يەنە بىر بالداق ئۆستى. سەرۋەر سەيدالىم ئوقۇتقۇچىلىق ھاياتىنىڭ كۆپ قىسمىدا ھەم سىنىپ مۇدىرى، ھەم ماتېماتىكا　ئوقۇتقۇچىسى بولدى. بۇ جەرياندا ئۆزى مەسئۇل بولغان سىنىپتىكى ئوقۇغۇچىلارنىڭ ھەر بىرىگە ئارخىپ تۇرغۇزۇپ، ئوق−ۇغۇچىلارنىڭ ئايلىق، پەسىللىك، مەۋسۇملۇق ئۆگىنىش نەتىجىلىرىدىن تارتىپ، ئۇلاردىكى ئۆزگىرىشلەرنى تەپسىلىي خاتىرىلەپ، ئاتا -　ئانىلار بىلەن سۆھبەتلىشىپ، دەرستە ئارقىدا قالغان ئوقۇغۇچىلارغا نۇقتىلىق ياردەم بەرگەچكە، بۇ ئوقۇغۇچىلار ۋە ئۇلارنىڭ ئاتا - ئانىلىرىنىڭ ئالقىشىغا ئېرىشتى. سەرۋەر سەيدالىم 1992-يىلىدىن ئېتىبارەن ئوقۇتقۇچىلىق ھاياتىدىكى تەجرىبىلەرنى توپ−لاپ، گېزىت - ژۇرناللاردا «بىر سائەتلىك ئوچۇق دەرس»، «ئاتا - ئانىلارغا مەسلىھەت» قاتارلىق ئوقۇتۇش تەتقىقاتىغا ئائىت ماقالىلەرنى ئېلان قىلدۇردى. ئۆزىمۇ ئەجرىگە يارىشا كۆپ قېتىم غۇلجا شەھىرى، ئىلى قازاق ئاپتونوم ئوبلاستى ۋە ئاپتونوم رايون بويىچە «ئىلغار ئوقۇتقۇچى» بولۇپ باھالاندى. سەرۋەر سەيدالىم پېنسىيەگە چىققاندىن كېيىنمۇ، ئەۋلادلارغا كۆڭۈل بۆلۈشنى ئۇنتۇماي، غۇلجا شەھىرىدىكى «مېھرىبان ئانا»لار سېپىگە قوشۇلۇپ، قىيىنچىلىقى بارلارغا ياردەم قولىنى سۇنۇپ كەلمەكتە.

ئىز تورى www.iz.la



خەتكۈچلەر:

ئىز تورى-爱智网

غۇلجا شەھەرلىك 7 - ئوتتۇرا مەكتەپنىڭ پېشقەدەم ماتېمات...