ياۋروپا ئىتتىپاقىنىڭ ياۋرو زايومى تارقىتىشىنىڭ ك...

　　 ياۋروپا ئىتتىپاقى كومىتېتىنىڭ رەئىسى باروزو يېقىندا: ياۋروپا ئىتتىپاقى ھۆججەت ئېلان قىلىپ، ياۋرو رايونى ئورتاق زايومى (ياۋرو زايومى) تارقىتىش تەكلىپىنى ئوتتۇرىغا قويماقچى، دېدى. ياۋروپا ئىتتىپاقى كومىتېتىنىڭ تەكلىپى ياۋروپا قەرز كىرىزىسىنى ھەل قىلىشتىكى بازار ئەھۋالىغا ئۇيغۇن تەپەككۇر بولسىمۇ، لېكىن بۇ تەكلىپنىڭ رېئال شارائىتتا ھەقىقىي ئىجرا قىلىنىش- قىلىنماسلىقىنى ھازىرچە مۆلچەرلەش قىيىن. ئۈچ خىل لايىھە ئىتالىيە «خەۋەر» گېزىتى، فىرانسىيە ئاخبارات ئاگېنتلىقىنىڭ ئاشكارىلىشىچە، ياۋروپا ئىتتىپاقى ئېلان قىلىش ئالدىدا تۇرغان يېشىل تاشلىق كىتابتا ئۈچ خىل مۇمكىنچىلىك لايىھەسى ئوتتۇرىغا قويۇلغان: بىرىنچى، ياۋرو رايونى بىر تۇتاش زايوم تارقىتىدۇ، 17 ئەزا دۆلەت بىر تۇتاش زايومغا ئورتاق كېپىللىك قىلىدۇ ھەم ئۆز دۆلىتىنىڭ زايومىنى تارقىتىشنى توختىتىدۇ؛ ئىككىنچى، ياۋرو رايونى بىر تۇتاش زايوم تارقىتىش ئارقىلىق ئېغىر قەرزگە بوغۇلغان بەزى دۆلەتلەرنىڭ مەبلەغ يۈرۈشتۈرۈشىگە ياردەم بېرىدۇ؛ ئۈچىنچى، ياۋرو رايونى بىر تۇتاش زايوم تارقىتىپ، ئەزا دۆلەتلەرنىڭ زايومىنىڭ ئورنىغا دەسسىتىدۇ، لېكىن ئەزا دۆلەتلەر ئۆز دۆلىتىنىڭ زايومىنىڭ ئورنىغا دەسسىتىلگەن قىسمىنى كېپىللىك بىلەن تەمىنلەيدۇ. ياۋروپا ئىتتىپاقىنىڭ ھۆججىتىدە، ئەمەلىي ئۈنۈم جەھەتتىن ئېيتقاندا، بىرىنچى خىل لايىھە ئەڭ مۇكەممەل ھەم ئۈنۈملۈك، ئۈچىنچى خىل لايىھەنىڭ ئۈنۈمى ئەڭ ناچار ھەم ئىناۋەت دەرىجىسى تۆۋەنرەك دۆلەتلەرگە پايدىسىز، دېيىلدى. ئىككى لاگېر ياۋروپا ئىتتىپاقىنىڭ يېشىل تاشلىق كىتابىدا ياۋرو زايومى تارقىتىش، «ياۋروپا ئىگىلىك ھوقۇق قەرز كىرىزىسىنى تېز يېنىكلىتىشكە پايدىلىق» ھەم «ياۋرو رايونىنىڭ خەتەرگە تاقابىل تۇرۇش ئىقتىدارىنى كۈچەيتىدۇ»، دېيىلدى. بارغانسېرى كۆپ مەبلەغ سالغۇچى ۋە ئىقتىسادشۇناس: ياۋرو زايومى تارقىتىش ياۋروپا قەرز كىرىزىسىنى ھەل قىلىشتىكى بىر قەدەر ياخشى، شۇنىڭدەك بىردىنبىر لايىھە بولۇپ قېلىشى مۇمكىن، دەپ قارىدى. لېكىن قارشى تۇرغۇچىلار: ھازىر ياۋرو زايومى تارقىتىشنىڭ پۇرسىتى پىشىپ يېتىلمىدى، ياۋرو زايومى تارقىتىشنى قارىسىغا تېزلەتسە، تەسىرى زور بولىدۇ، دەپ قارىدى. ياۋرو زايومى تارقىتىشتىكى ئەڭ چوڭ توسالغۇ گېرمانىيە بىلەن فىرانسىيە. ئەگەر، ياۋرو زايومى تارقىتىلسا،　بۇ ئۇلارنىڭ گىرېتسىيە، ئىتالىيە قاتارلىق دۆلەتلەرگە ئوخشاش ئىناۋەت دەرىجىسىدىن ئورتاق بەھرىمان بولۇپ، مەبلەغ يۈرۈشتۈرۈش تەننەرخىنىڭ ئۆرلەپ كېتىدىغانلىقىدىن دېرەك بېرىدۇ، مۇبادا، بۇ دۆلەتلەردە قەرز كىرىزىسى يۈز بەرسە، ياۋروپا زايومىغا باغلىنىپ قالغان گېرمانىيە بىلەن فىرانسىيەنىڭ ئۆزىنى چەتكە ئېلىشى تەسكە توختايدۇ. شۇڭا، گېرمانىيە باش مىنىستىرى مېركىل بىلەن فىرانسىيە زپىرېزىدېنتى ساركوزى ھازىرقى باسقۇچتا ياۋرو زايومى مەسىلىسىنى ۋاقتىنچە ئويلاشمايدىغانلىقىنى كۆپ قېتىم تەكىتلىدى. باشقا تاللاش بارمۇ؟ ياۋروپا ئىتتىپاقى كومىتېتىنىڭ رەئىسى باروزو: «پۇل مۇئامىلە بازىرىدىكى داۋالغۇش ياۋروپا ئىتتىپاقى دۇچ كېلىۋاتقان خىرىسنىڭ بارغانسېرى كەسكىنلىشىۋاتقانلىقىنى ئىسپاتلايدۇ، ياۋرو رايونى كېلەر يىلى سىستېمىلىق تەخىرسىز مەسىلىگە دۇچ كېلىشى مۇمكىن، شۇڭا ياۋروپا ئىتتىپاقى بۇنداق خىرىسقا داۋاملىق تاقابىل تۇرۇشى، شۇنداقلا كىرىزىسنى ھەل قىلىدىغان ھەر قانداق مۇمكىنچىلىك لايىھەسىنى نەزەردىن ساقىت قىلماسلىقى كېرەك»، دېدى. گېرمانىيە ئىقتىساد مۇتەخەسسىسلىرى كومىتېتى ئۆتكەن ھەپتە «ياۋروپا قايتۇرۇش فوندى» قۇرۇش، قەرز سەۋىيەسى ياۋروپا ئىتتىپاقى بەلگىلىگەن يۇقىرى چەكتىن، يەنى ئىچكى ئىشلەپچىقىرىش ئومۇمىي قىممىتىنىڭ %60ىدىن ئېشىپ كەتكەن بارلىق دۆلەتلەرنىڭ نورمىدىن ئارتۇق قەرزىنى بۇ فوند ئۆتكۈزۈۋېلىش تەكلىپىنى بەردى. بېلگىيەنىڭ سابىق باش ۋەزىرى گۈي ۋېرخوفسىتاد مۇنداق دېدى: ياۋرو رايونىدا بىر تۇتاش ئىقتىسادىي ھۆكۈمەت قۇرۇلسا ھەم ئۇنىڭغا بىرلەشتۈرۈپ ياۋرو زايومى تارقىتىلسا، ياۋروپا قەرز كىرىزىسىنى ئاندىن ھەقىقىي ھەل قىلغىلى بولىدۇ.

ئىز تورىدا ئىزلىرىمىز قالسۇن!

خەتكۈچلەر:

ئىز تورى-爱智网

ياۋروپا ئىتتىپاقىنىڭ ياۋرو زايومى تارقىتىشىنىڭ ك...