ئىز تورى-爱智网

　　   لىۋىيە «مەملىكەتلىك ئۆتكۈنچى كومىتېتى» ئىجرائىيە كومىتېتىنىڭ رەئىسى ئابدۇللا ھاشىم كېيب 22-نويابىر پايتەخت تىرىپولىدا ئۆتكۈنچى ھۆكۈمەت قۇرۇلغانلىقىنى جاكارلىدى، ئۆزى باش مىنىستىرلىقغا تەيىنلەندى. تەھلىلچىلەرنىڭ قارىشىچە، ئىچكى قىسىمدىكى ئىختىلاپ ۋە يەرلىكنىڭ مەنپەئەت توقۇنۇشى تۈپەيلىدىن، لىۋىيە ئۆتكۈنچى ھۆكۈمىتىنىڭ قۇرۇلۇشى نۇرغۇن ئوڭۇشسىزلىققا دۇچ كەلدى. ھازىر ھەر قايسى تەرەپلەر ۋاقتىنچە كېلىشىم ھاسىل قىلغان بولسىمۇ، بىراق ھەر قايسى تەرەپلەرنىڭ سىياسىي، ئىقتىسادىي جەھەتلەردىكى مەنپەئەت توقۇنۇش كۈرىشى تېخى ئاخىرلاشمىدى، ئۇنىڭ ئۈستىگە خەۋپسىزلىك ۋەزىيىتىنىڭ مۇقىمسىزلىقى سەۋەبىدىن ئۆتكۈنچى ھۆكۈمەت يەنە نۇرغۇن ئەگرى-توقايلىقلارغا ئۇچرىشى مۇمكىن. كابىنېت تىزىملىكى چىقىرىلدى كېيب 22-نويابىر ئۆتكۈزۈلگەن ئاخبارات ئېلان قىلىش يىغىنىدا مۇنداق دېدى: يېڭىدىن قۇرۇلغان ئۆتكۈنچى ھۆكۈمەت باش مىنىسىرى، ئىككى مۇئاۋىن باش مىنىستىر ۋە 24 مىنىستىرنى ئۆز ئىچىگە ئالىدۇ. مۇستافا بۇشاگۈل ۋە ئوسما كېرىم مۇئاۋىن باش مىنىستىرلىققا، غەربىي قىسىمدىكى زىنتان شەھىرىنىڭ يەرلىك قوراللىقلىرىنىڭ قوماندانى ئوسما جۇۋالى دۆلەت مۇداپىئە مىنىستىرلىقىغا، ئاشۇرا بېن ھايران دىپلوماتىيە مىنىستىرلىقىغا، ھەسەن زىھلام مالىيە مىنىستىرلىقىغا تەيىنلەندى. ھەر قايسى تەرەپلەر تەسلىكتە كېلىشىم ھاسىل قىلىشتى مەملىكەت ئىچىدىكى ھەر قايسى تەرەپلەرنىڭ ماجىراسى سەۋەبىدىن، ئۆتكۈنچى ھۆكۈمەتنىڭ تەركىبىي قىسمى تىزىملىكى ئەسلىدىكى بېكىتىلىگەن ۋاقىتتىن بىر ھەپتە كېچىكتۈرۈپ ئېلان قىلىندى. 22-نويابىر ئېلان قىلىنغان كۈنى ئابدۇللا ھاشىم كېيب ئەسلىدە بېكىتىلگەن ۋاقىتتىن ئىككى سائەت كېيىن جامائەتچىلىك ئالدىدا پەيدا بولدى. ئەمەلىيەتتە، تىزىملىكنى ئېلان قىلىنغىچە، ھەر قايسى كۈچلەرنىڭ ئېلىشىشى ئاخىرلاشمىغانىدى. ئاخبارات ئېلان قىلىش يىغىنى ئېچىلىشقا يېرىم سائەت قالغاندا، سابىق مالىيە مىنىستىرى شامام مۇخبىرلارغا ئابدۇللا ھاشىم كېيبنىڭ بىر مۇئاۋىن باش مىنىستىر ۋە 23 مىنستىر تەسىس قىلغانلىقىنى ئېيتقان. ئەمما، ئاخىرىدا ئېلان قىلىنغان تىزىملىكتە ئىككى مۇئاۋىن باش مىنىستىر ۋە 24 مىنىستىر تەسىس قىلىنغان. ئۆتكۈنچى ھۆكۈمەت كومىتېتىنىڭ ئەسلىدىكى ئون نەچچە مىنىستىردىن پەقەت ئۈچىلا قېپقالغان. تىرىپولىدىكى تەھلىلچىلەر مۇنداق قارىدى: ئۆتكۈنچى ھۆكۈمەت كومىتېتىدىكى ئەسلىدىكى كۆپ ساندىكى مىنىستىر بەنغازى ۋە تىرىپولىدىن كەلگەن بولۇپ، كېيب ھەر قايسى تەرەپلەرنىڭ مەنپەئىتىنى تەڭپۇڭلاشتۇرۇش ئۈچۈن، ئەسلىدىكى كۈچىدىن ۋاز كەچتى. بىراق يېڭى ئەزالارغا قارىغاندا، سايلىنالماي قالغانلار لىۋىيەنىڭ ھازىرقى دۆلەت ئەھۋالى بىلەن تېخىمۇ تونۇش، شۇنداقلا تېخىمۇ كۆپ ھاكىمىيەت يۈرگۈزۈش تەجرىبىسىگە ئىگە. تېخىمۇ كۆپ يېڭى كىشىلەردىن تەشكىللەنگەن يېڭى ھۆكۈمەتنىڭ قىسقا مۇددەت ئىچىدە خىزمەتكە كىرىشەلىشىنى يەنىلا كۆزىتىشكە توغرا كېلىدۇ. ئىستىقبالدىن ئانچە ئۈمىد كۈتۈپ كەتكىلى بولمايدۇ كېيبنىڭ سۆزى بويىچە ئېيتقاندا، ئۆتكۈنچى ھۆكۈمەتنىڭ مۇھىم ۋەزىپىسى ئىجتىمائىي مۇقىملىقنى ئەسلىگە كەلتۈرۈپ، ئەدلىيە سىستېمىسىنى قايتىدىن تەشكىللەپ، پۈتۈن مەملىكەتنىڭ قوراللىق كۈچىنى تەرتىپكە سېلىش، شۇنداقلا ئۆز ئارا ھۆرمەت قىلىش ۋە ئورتاق مەنپەئەتنى قوغداش ئاساسىدا، باشقا دۆلەتلەر بىلەن ھەمكارلىق مۇناسىۋىتىنى ئورنىتىشتىن ئىبارەت. بىراق بەزى تەھلىلچىلەر مۇنداق دېيشتى: لىۋىيەنىڭ ھازىرقى ۋەزىيىتىدە يەنە نۇرغۇن مۇقىمسىز ئامىللار مەۋجۇت بولۇپ، ئۆتكۈنچى ھۆكۈمەتنىڭ ھاكىمىيەت يۈرگۈزۈش يولىدا تېخى قىيىنچىلىق كۆپ. قورال-ياراغلارنىڭ تارقىلىپ كېتىشى− ئۆتكۈنچى ھۆكۈمەت خەۋپسىزلىك ئىشلىرى جەھەتتە دۇچ كەلگەن ئەڭ چوڭ مەسىلە. سىياسىي جەھەتتە ھەر قايسى تەرەپلەر ئۆتكۈنچى ھۆكۈمەت ئەزالىرى مەسىلىسىدە ۋاقتىنچە كېلىشىم ھاسىل قىلغان بولسىمۇ، بىراق ئىختىلاپ تېخى تۈگىمىدى. شۇڭا، قىسقا مۇددەت ئىچىدە پۈتكۈل مەملىكەتتە ئىناقلىقنى ئىشقا ئاشۇرۇش قىيىن. ئىقتىسادىي جەھەتتە، لىۋىيەنىڭ خەلق ئىگىلىكى قىيىنچىلىق ئىچىدە ئەسلىگە كېلىش باسقۇچىدا تۇرۇۋاتىدۇ. چەت ئەللەردىكى نۇرغۇن مەبلەغ توڭلىتىۋېتىلىگەنلىكتىن، مەملىكەت ئىچىدىكى بانكا سىستېمىسىنىڭ كۆچمە مۈلۈكى يېتەرسىز بولۇۋاتىدۇ. ھالبۇكى، ئاۋامنىڭ يېڭى ھۆكۈمەتتىن كۈتكەن خەلق تۇرمۇشىنى ياخشىلاش ئۈمىدى كۈچلۈك بولۇپ، ھۆكۈمەتنىڭ بەرداشلىق بېرىش ئىقتىدارىدىن ئېشىپ كەتكەن. خەلق تۇرمۇشىنى قانداق ياخشىلاش، ئىقتىسادنىڭ ياخشى ئايلىنىشىغا تۈرتكە بولۇش كېيب ھۆكۈمىتى دۇچ كەلگەن زور خىرىس ھېسابلىنىدۇ.　　

بۇ مەزمۇن ئىز تورىدىن كۆچۈرۈلگەن

　　　　　　