غوجىمۇھەممەد نەزمىي ئەسەرلىرى (توپلام)

maripatogli

	ئەسكەرتىش : مەزكۇر تېمىغا گۇما ناھىيىمىزدە تۇغۇلۇپ ، گۇما ناھىيىمىزنىڭ سۈيىنى ئىچىپ،نېنىنى يەپ چوڭ بولغان،بۈگۈنكى زامان ئۇيغۇر ئەدەبىياتى يېزىقچىلىقىنىڭ چوققىسىدا ئۆرلەۋاتقان ،كەڭ خەلققە تۇنۇشلۇق بولغان ئانا دىيارىمىزنىڭ پەخىرلىك يازغۇچىسى،شېئىرىيەتتە تويۇنغان كامىل شائىر غوجىمۇھەممەد مۇھەممەدنىڭ ئۇزۇن يىللاردىن بىرى تورلاردىن يىغىپ ساقلىۋالغان ، شۇنداقلا يېقىندىن بىرى ئىجاد قىلىپ يېزىپ،تور بەت ۋە ئۈندىدار ئارقىلىق خەلققە سۇنىۋاتقان شېئىرى ئەسەرلىرى توپلام قىلىپ يوللاندى.بۇ تېمىغا يوللانغان ھەم بۇندىن كىيىن يوللىنىدىغان مەزمۇنلار ئانا دىيارىمىزدىكى يازغۇچى-شائىرلار ھەمنەپەس بولۇپ قۇرۇپ چىقىپ بىرلىكتە تەرەققى قىلدۇرۇپ كىلىۋاتقان چىنتۈرك مۇنبىرى بىلەن چىنزات مۇنبىرىگە،شۇنداقلا ئۈندىدار سالۇن نۇسقىسىنى ئالغان مەرىپەت ئوغلى يانبىلوگىغىلا يوللىنىدۇ،ئۇندىن سىرىت ھەر قانداق توربەت ، مۇنبەر ۋە ئۈندىدار سالۇنلىرىنىڭ كۆچۈرۈپ تارقىتىشىغا قەتئى رۇخسەت يوق،كۆچۈرۈپ تارقاتقۇچىلار بايقالسا شۇ تارقاتقۇچى شەخىس ئۈستىدىن شىكايەت قىلىنىپ ،كۆچۈرۈپ ئېلان قىلىپ تارقاتقان توربەت قۇرغۇچىلىرى ھەم قانۇنىي ۋاستە ئارقىلىپ ئۆچۈرۈپ تاشلىنىدۇ. بارلىق تور ھەۋەسكارلىرىنىڭ يۇقارقى ئەسكەرتىشكە سەمىمىي شۇنداقلا سەگەكلىك بىلەن مۇئامىلە قىلىشىنى سورايمىز .تېما مەزمۇنى مەرىپەت ئوغلى تەرىپىدىن تولۇقلاپ يوللۇنۇپ تۇرىدۇ.                                                                                                                            - ئابلىمىت ئوسمان(مەرىپەت ئوغلى) روھ غەليانلىرى غوجىمۇھەممەد مۇھەممەد 1 ئۇپۇق، تۈن باغرىدا قالغان شەبىستان مۈلكىنى قايتۇر، نەزمنىڭ تەۋسىپى- پۈتمەس دىلىستان مۈلكىنى قايتۇر. يارالمىش ئەپسۇنى بىرلەن ئەجەلدە ئەملىدىڭ روھنى، قىيامەت تاڭلىرى ئاتقان شەرەپشان مۈلكىنى قايتۇر. ھامان ئاۋارىدۇر كۈيلەر قۇچالماي ۋەسلۇ- ۋەسلىڭنى، چۆلۈڭدە قاغجىراپ ياتقان سىياھدان مۈلكىنى قايتۇر. ساڭا كىم ئالدى يول، بۇندا قۇچارغا بەلكى گۆر تەييار، ئاياغىڭ ئاستىدا قالغان تالاي جان مۈلكىنى قايتۇر. يۈرەر قەلبىدە سەرسان بوپ ساڭا قول باغلىغان مىسكىن، مۇھەببەت ئەھلىنىڭ ھەقتىن ئاداشقان مۈلكىنى قايتۇر. 2 بۇيان كەل ئەي ئەي قەلەندەرلەر ئاتاسى كاتتا سۇلتانىم، ساپايەڭ نەغمىسىدىن شاد ئەيلىسۇن خەستەئى جانىم. خىرىسلار تورىدىن نەپسىم ھاۋادىن دەرگۇمان بولدى، دىداكتىك ئالىمىڭ ئۆزرە يېشىنسۇن ھەقكە ئىمكانىم. گۈزەل ئەڭگىزلىرىم كۆزلەر ئوقىدىن قەتلىئى جاندۇر، كىرەي مەن خەستە تەللەڭگە تىلىقسۇن تەكتى پىنھانىم. قىلاي ئاشىقلىقىم ئىزھار جاھانغا، بەر كۇلاھىڭنى، ئېچىلسۇن بەرق ئۇرۇپ رەڭدار سولاشقان نالە- ئەبغانىم. قېنى نۇرانە پەزلىڭ، سەن ئۇنى مىسكىنگە تەقدىم قىل، يۇيۇلسۇن كۇللى ئاسمانلار سۈيىدە زەررە ۋىجدانىم. 3 شارابسىز كۈلمىكىم نەدۇر ھاياتنىڭ بۇ پايانىدا، جانانسىز ئۆلمىكىم نە ھەم مۇھەببەت ئىنقىلابىدا. تىنىمسىز نالە- ئەبغاندىن مەگەر بۇلبۇلغا ئايلانسام قەسىدەم چاچقۇ بولغايمۇ ئىشىقنىڭ دىل زۇبانىدا. ئويغىنىپ مەۋجىدە مەينىڭ مەگەر تەڭرىمگە سۆز ئىيىتسام قىلمىشىم توغرا بولغايمۇ شىراز، ھەييام بايانىدا. تۇغۇلسام پاك پىتى روھىم تېنىدىن كۈيلىرىم بىرلە ئېتىم بولغايمۇ تەڭرىمنىڭ ياراتمىش ئول كىتابىدا. قېنى سەن كۈلكە بوپ پارلا ۋەياكى تۈلكە بول مىسكىن، قالۇرسەن بولمىسا مەڭگۈ ھاياتنىڭ زور جازاسىدا. 4 يارالدىڭ خاكى تۇپراقتىن غەيۇر قامەتلىرىڭ يالغان، بەندىسەن ئۆز- ئۆزۈڭگە بەس، شاھان ھالەتلىرىڭ يالغان. ھاياتلىق سەۋەبى بىرلە مامات تىرنايدۇ كاللاڭنى، ياشارسەن ھەر مىنۇت غەمدە، خۇشال سائەتلىرىڭ يالغان. تەبەسسۇم، ئېھتىرام پات- پات كېلەر تاڭلارنى قولتۇقلاپ، ناھات، تاڭ كۆكىدە كۈن يوق، تالاي ئامەتلىرىڭ يالغان. خۇيۇڭ پىنھانىدا زۇلمەت، تىلىڭدا مىڭ قۇياش ئاي- ھاي، چىرايلىق تەزىمىڭ ۋە ھەم رەزىل نالەتلىرىڭ يالغان. قېنى سەن ساقىيا، مىسكىن شارابقا ئاشىيان بولدى، شاراب ئەييامىدا بەلكىم ئۆرپ- ئادەتلىرىڭ يالغان. 5 شەيتىنى ئەسلاكى شەيتان، ئادىمى ئادەم يەنە، ئادىمى شەيتان بولۇشقا قىستىغان ئادەم يەنە. تەقدىرى- قىسمەتكى ئۇ بىر جۈپ پالاغى كېمنىڭ، كېمىنى ھەيدەپ بىغەم يۈرگەن ھامان ئادەم يەنە. ئۆزىنى كۆرمەك بولۇپ تەڭرى كۆزىدە بىر ئۆمۈر، تەڭرىنى بىلگەن ئۆزىدىن ئاينىغان ئادەم يەنە. مەشۇقى تۇرسا مۇھەببەتنىڭ ئۆلۈم داستانىدا، تەلمۈرۈپ يارسىز ھاياتقا يىغلىغان ئادەم يەنە. بول ئاگاھ مىسكىن، ياراتماق بوپ ئۆزىنى قايتىدىن. بىگۇناھ تۇپراقنى تىلغاپ ئالجىغان ئادەم يەنە.

maripatogli

	ئەي ئانا..... غوجىمۇھەممەد مۇھەممەد ئەي ئانا مەن بىر غىرىب، مەن بىر  غىرىب، ئەي ئانا مەن بىر ساراڭ، مەن بىر ساراڭ. ئىشەنمە تۈننى مەڭگۈ زۇلمەت  دېسە، مەغرىبتىن قۇياش چىقىپ ئاتمايدۇ تاڭ... چوققىلار يۈكسەكلىكنى  چۈشەنمەيدۇ دېڭىزلار چەكسىزلىككە ئىشەنمەيدۇ. گۈللەر ھەم بەرگى خازان توننى  كىيىپ باھارنى كىپەنلەيدۇ، كىپەنلەيدۇ. بارخانلار ئۇخلار بوران  كىرپىكىدە، توغراقلار ئۆز سازىمنى چالسام دەيدۇ. سۆيگۈدۇر مېڭىپ يۈرگەن ھەر  ئادەم، يەر مەڭگۈ ئۆز- ئۆزۈمدە ماڭسام دەيدۇ. مۇھەببەت ئۈچۈن بارچە  جىنايەت ھەم، ئەبەدىي ياشاش ئۈچۈن ئۆلىدۇ شام. توسالماس، توسالمايدۇ،  توسالمايدۇ چۈشلەرنىڭ پەرۋازىنى زۇلمەتلىك تام. ئىشەنمە چۆللەردىكى  سۇكۇناتقا، ئىشەنمە سايلاردىكى ئۆلگەن تاشقا. ئىشەنمە تۇرغىنىمغا  كۈلۈمسىرەپ، ئىشەنمە كۆزۈمدىكى تامچە ياشقا. ئىشەنمە رېۋايەتنى قايىتماس  دېسە، سەلتەنەت جەسەدلەردىن ئۆرە بولغان... ئەي ئانا مەن بىر غىرىب، مەن بىر  غىرىب، ئەي ئانا مەن بىر ساراڭ، مەن بىر ساراڭ! 1999- يىلى ئۆكتەبىر. خوتەن

maripatogli

	يار ھەققىدە ئىككى غەزەل غوجىمۇھەممەد مۇھەممەد يارنىڭ بۇلاقتەك كۆزلىرى يار، كۆزۈڭنىڭ ئەينىكىدىن ساقىغان ئاسمانمىدۇ؟ ياندۇرۇپ بىر جۈپ چىراغنى پۈۋلىگەن سۇبھانمىدۇ؟ خۇددى دەريادەك دېڭىزدا قاغجىراپ ئاققان ئۆلۈك، ياكى خىلۋەت بىر بۇلاقتىن يامرىغان ئوكيانمىدۇ؟ قاپقارا ئىشىق زۇلمىتىدە بىر قەلەم پەرياد ئېتەر، ئاھ، ئۇنىڭكى نالىسىدىن ياڭرىغان داستانمىدۇ؟ يىرتىلىپ كەتكەن ئەجەلنىڭ ۋارىقى خۇددى ھايات، ئاندىكى جانلارنى جانان قىلغۇچى ئىسيانمىدۇ؟ بىر بېقىپ ئالدىڭ جېنىمنى، ئىككى باققاندا، نىتەي، ئاھ، مېنىڭ بۇندا تىرىك يۈرگەنلىرىم يالغانمىدۇ؟ كۆزلىرىڭ چايقاپ قەدەھنى بولدى مەست دەريا، دېڭىز، كۆز يېشىڭ چىللاپ سەھەرنى چاقنىغان چولپانمىدۇ؟ كۆز- كۆڭۈلنىڭ ئەينىكى دەرلەر ئىشىق ئەھلى ھامان، ئۇندا كىم ئىزدەپ ئۆزىنى بىر ئۆمۈر سەرسانمىدۇ؟ يارنىڭ جىنەستىدەك لەۋلىرى لەۋلەرىنىڭ كاسەسىدىن مەي ئىچەي ئارمان بىلەن، مەستۇ- مۇستەغرەق كېتەي يار يانىدىن خەندان بىلەن. غۇنچەسىن ئاچىلدۇراي نەپسىم ئىلە جان چىققۇچە، گۈل ئۈزەي نازۇك بېغىدىن لالەيۇ- رەيھان بىلەن. مەي نېمە، بىر سۆيمىسە؟ يار لەۋلىرى ئابى ناۋات، نە ناۋات، ئاندىن شىرىندۇر بۇ ئۆلۈم ھەر جان بىلەن. لەززەتى بىھۇش، چىرايلىق ئاھ جىنەستە باغلىرى، شىرنىسى ئاقسۇن جېنىمغا تولغىنىپ خەندان بىلەن. ئاقسا قان ئاھ، لەختە- لەختە قىپقىزىل دەريا بولۇپ، قان ئىلە جاننى يۇيۇپ مەن نۇرلىناي ئارمان بىلەن. قەبرىگاھ ئەتسە كىپىنەكلەر بۇ يار گۈلزارىنى، ئىشقىدىن پەرياد ئۇرۇپ مەن ياش تۆكەي مارجان بىلەن. ئەي غوجى يارنىڭ لېۋىدىن ئىچ شاراب، مەستلىكتە سەن قىل ئاۋات سۆيگۈ بېغىنى جەننەتۇل رىزۋان بىلەن. كۆچۈرۈپ تارقىتىشقا بولمايدۇ ، ئەسەر ھوقۇقىغا ھۆرمەت قىلىڭ.

maripatogli

	سەن بار شەھەرگە ماڭدىم غوجىمۇھەممەد مۇھەممەد ھايات سەن تەرەپتە، خۇدا سەن بىلەن بىللە مامات مەن تەرەپتە، مەن خۇدا بىلەن بىللە سۆيگۈ ئ‍ىككىمىزنى ياراتماقتا مەڭگۈ ئ‍اخىرلاشماس جۇدالىقتا... قۇياش ئ‍اسماندا بىر ئ‍اسىي باخشى كۆڭلۈم قاچان ئ‍ېچىلار، دەردتىن قۇتۇلار؟ كۆيۈك چۆلدۇر، سۆيۈك دەريا، ئ‍ۈزۈك غۇنچىلاردىن زەنجىر سوقۇلار. تاراملاپ ئ‍اققان كۆز ياشلار بىلەن مەڭزىمدىكى خەتلەر ئ‍وقۇلار. سۆيگۈم يوقالماس، بەلكى بىردەم ئ‍ۆتۈپ ئ‍الەم يوقىلار... سەن بار شەھەرگە ماڭدىم، ئ‍ەگەشتى بۇلۇتلار ئ‍ۈستۈمدە ئ‍ەگەشتى سايلار ئ‍ارقامدىن ئ‍ەگەشتى ماشىنا چاقلىرى دۈكۈر- دۈكۈر... سەن بار شەھەردە مەن يوق؛ ئ‍ۆلۈكلەر لەيلەر كۆكتە پارچە- پارچە يېپىق يەر، ۋەتەن يوق رەستىلەردە خۇدا يوق ئ‍ۆيلەردە ئ‍وقۇلار كىتاب. ئ‍اي يىرىم يارتا قىز گۈللەر شۈمشەيگەن غىرىب، ئ‍ەنسىز كۆز ياشلار ساۋار دىلنى بولۇپ قامچا يۇندا چىراي ھاۋا تۈكۈرگەن قاندىن يىرىم قاچا سۆيگەن ئ‍اۋاز، شارقىرىغان دەريالاردەك... سۆيگۈدىن كەلگەن ئ‍ادەم يوق مەندىن باشقا ۋادەرىخا مەن بار شەھەردە سەن يوق... كېتىۋاتىمەن، سېغىنىش يىقىنلاشتى دوزاققا دوزاق يىقىنلاشتى جەننەتكە بىز جەننەتتە ئ‍ۇچرىشىمىز، ئ‍ۆلگەن ئ‍ادەم كۆزىنى ئ‍ېچىپ خۇدانى كۆرگەندىكى ھاياجان بىلەن ۋادەرىخا يەنە مىڭ يىللىق دوزاقتىن كىيىن...

maripatogli

	دادا، سىزنى چۈشۈمدە كۆردۈم غوجىمۇھەممەد مۇھەممەد دادا،سىزنى چۈشۈمدە كۆردۈم، كەتمەن چېپىۋاتقان ھالىتىڭىزگە قاراپ يەر ۋە ئادەمنىڭ بىر -بىرىگەبولغان مۇھەببىتى ۋە ئۆچمەنلىكىنىڭ پەيزىنى سۈردۈم. سىز جىمجىت ياتقان يەرنىڭ باغرىنى تىلغاپ رەھىمسىزلەرچە چاناپ قارا تەرگە چۆمۈلۈپ ئۆزىڭىزنىڭ ئاجىزلىقىنى بىلدۈرۈپ قويدىڭىز. قۇياشقا ئارقىڭىزنى قىلىپ ھەقىقەتنى كۆرمەس بولۇۋالدىڭىز. يەرنى تىللىغاچ نان يېيىش ئۈچۈن ئېتىز قىرىدىكى بىر تۈپ تېرەكنىڭ يېنىغا ماڭدىڭىز. ناننى يەپ بولۇپ سىزگە زۇلۇم سالغان كەتمەننى تىللاپ تۇرۇپ ئۇنى بېشىڭىزغا قۇيۇپ ئۇخلاپ قالدىڭىز... دادا ھازىر سىياسەت ياخشى. ئېتىزلاردا ئېشەك ئورىدا تىراكتورلار ھاڭرايدۇ. ھەممە ئادەمنىڭ قورسىقى توق كىيمى پۈتۈن، پارتىيەنىڭ شەنىگە مەدھىيلەر ياڭرايدۇ. يۇلتۇز ساناپ تۈنلەردە ھېچكىم خاماندا ياتمايدۇ. خامان ئالغاندا 《لاي-لاي...》دەپ ناخشا ئېيىتمايدۇ. سىز يەرنى تىللاپ تۇرۇپ كۆزىڭىزگە سۈرەتتىڭىز، ھازىر ئادەملەر توپىدىن قاچىدىغان بولۇپ كەتتى. يەرنى ئانا!دەپ تۇرۇپ، ئۇنىڭ باغرىدىن يىراقلاپ كەتتى. دادا!....... 2008-يىلى 6 -ئىيۇن ،خوتەن . ئاپتورنىڭ <<بەرگى خازان>> ناملىق شېئىرلارتوپلىمىدىن خاتىرلەندى

maripatogli

	يىراقلاردا يامغۇر تامچىلار غوجىمۇھەممەد مۇھەممەد 1 باغلار كاككۇك، چېچەكلەر دەريا سۇلار ئاقار مامۇق بەدەندە. ئۇسۇل ئوينار دەشتى- باياۋان جەندىسىنى تاشلاپ چىمەندە. كىرپىكلەردىن ئۇزۇن كېچىگە كارۋان تارتىپ ماڭدى كۆك ئاسمان. ھەسرىتىدە يالغۇز ئولتۇرۇپ ناخشا ئىيتار غەمكىن بىر جانان. يىراقلاردا يامغۇر تامچىلار يالغۇز يۈرەك ئاتنى قامچىلار... 2 ئەينەكلەرنىڭ ئاسمانلىرىدا چاقنار يارنىڭ ھۆسنى- جامالى. ئەينەكلەرنىڭ دەريالىرىدا ئاقار يارنىڭ دەردى- خىيالى. ئەينەكلەرنىڭ ئېتىزلىقىدا پورەكلىگەن بىر تال قىزىل گۈل. ئۈزۈش ئۈچۈن ئاشۇ گۈلنى ئاھ پارە- پارە سۇندى بىر كۆڭۈل. يىراقلاردا يامغۇر تامچىلار يالغۇز يۈرەك ئاتنى قامچىلار... 3 غىرىبلىقى چۆلنىڭ بىر كۆڭۈل شىلدىرلايدۇ دەردى- بالالار. ئەجەل كەلگەن ماۋى پەلەكتىن جاراڭلايدۇ ناخشا- ناۋالار. تەڭرىگىچە تاكى ئادەمدىن تۈگىمەيدۇ ئىشقىي- مۇھەببەت. چاقىرىدۇ يارىنى زار- زار قەبرىسىدە يالغۇز بىر جەسەد. يىراقلاردا يامغۇر تامچىلار يالغۇز يۈرەك ئاتنى قامچىلار...

maripatogli

	غەزەل غوجىمۇھەممەد مۇھەممەد ئ‍ەر يىگانە- ھايۋاندۇر، ئ‍ايال- تەنھا شەيتاندۇر، قوشۇلۇشى ئ‍ۇلارنىڭ نىچۈن يورۇق ئ‍ىماندۇر؟ ئ‍ىچسە كۆڭۈل مۇرادى، زەھەر ئ‍ىرۇر شارابى، مۇھەببەتنىڭ ئ‍اۋادى نىچۈن ئ‍اخىر زاماندۇر؟ تۇپراق قاتۇر ئ‍ەرزىدە، ئ‍اسمان ياتۇر لەرزىدە، ھەقىيقەتنىڭ قەلبىدە نىچۈن بۈيۈك گۇماندۇر؟ ھەق قۇياشى تەندە جان، جان چىققۇچە ھېچقاچان سۈزۈلمەستۇر بۇ جاھان، بەلكى ھايات تۇماندۇر.

maripatogli

	ئىشىقنامە - «جالالدىن رۇمى» رومانىدىن تەسىرات غوجىمۇھەممەد مۇھەممەد سۆيەرمەن، ئۇنى ئۆزۈمدە سۆيەرمەن، بار ئۇ ھەر تىنىقىمدا، جان مېنى تەرك ئەتمە. ئىزدەرمەن، ھەر نەپەس ئۇندىن جۇدامەن، ۋېسال ئىستەرمەن، ھېجران مېنى تەرك ئەتمە. يەردە تۇپراق ئۇ، كۆكتە ئاسمان، يەر مېنىڭ تاپىنىمدا تۇر، ئاسمان مېنى تەرك ئەتمە. كۆرەرەمەن، ھەر ئادەمدە بولۇر ئۇ ئايان، مۇھەببەت ئەينىكى- ئىنسان مېنى تەرك ئەتمە. كىرەي ۋۇجۇدۇمغا، ئۇ ھەم ئۇندىدۇر تەن ئىشتىياقى- ھايۋان مېنى تەرك ئەتمە. بۇزۇپ قىرغاقلىرىمنى ئاقاي ئاڭا، ئۇ ھەم سەندىدۇر، سۇبھان مېنى تەرك ئەتمە... يوقالدى دىلدىكى مۇقەددەس گۇمان چېكىگە يىتەلمەس ھېچبىر ھاياجان ئەي ئۆزىدىن ئۆزىگە قاراپ ماڭغان دەقىقىلەردىكى مەڭگۈلۈك كارۋان مېنى تەرك ئەتمە! 2 گۈل ئېچىلدى، تاڭدا ئۇخلار بۇلبۇلى تال يېشىندى، سۇدا ئوينار سۇمبۇلى. ئەر بالاغەت دەشتىدە پىيادىدۇر، ئىنتىزار، باغلاقتا كىشنەر دۇلدۇلى. كۈلپەت مەشرەپ ئوينار ئەس- يادىمدا ياڭرار ھەر قەدىمىمدىن ئۇنىڭ مەرغۇلى. ئۇ ھەم ئاياندۇر زۇۋانسىز رىيازەتلەردە رەسۋايى زامان مېنى تەرك ئەتمە. ئىبادەت پەيتىدە بولكى «كاپىر»، مۇڭ- زار لازىم ئەمەس، تۆككىن قېنىڭنى شىرىن- سۇخەن ئىزھار لازىم ئەمەس. ئۇ ھەم ئىبادەتتىن مۇھەببەتكە كۆچكەن ئادەمدۇر، چۆكەي گۇناھلىرىمغا، كۆيەي گۈرۈلدەپ ئىشىق پەرۋىشكارى- شەيتان مېنى تەرك ئەتمە. دىلىمدا تاش- چالمىلار كۈرمىڭ، گۈل- گۈلزار لازىم ئەمەس، ئۆلۈپ تىرىلەرمەن كۈندە مىڭ رەت، دار لازىم ئەمەس. مېنىڭ بۇ ئاھۇ- پىغانىمدىن زۇۋانغا كىرسە تاش بولدى، يەرۇ- ئاسماننى سورۇغۇچى ئەشئار لازىم ئەمەس. مېنىڭ بۇ غىرىبلىقىمنى ئوخشىتار بىر كىم ئۆزۈمگە، ئوخشىسام ئۆزۈم ئوخشاي بەس، گۇناھكار لازىم ئەمەس... ئۇ ھەم ھەقىقەتتىن جىنايەتكە ئۆتكەن ئادەمدۇر، سۆيەرمەن، ئۇنى ئۆزۈمدە سۆيەرمەن روھ قايىمى- ئىسيان مېنى تەرك ئەتمە! 2002- يىلى ئىيۇل. خوتەن

ئەھەدى

	نەئۇزۇبىللاھ !