غوجىمۇھەممەد مۇھەممەد : ئەرنىڭ ئىپپىتى

maripatogli

ئەرنىڭ ئىپپىتى


غوجىمۇھەممەد مۇھەممەد

مەن شۇنداق ئويلايمەن، ئەرنىڭمۇ ئىپپىتى بولىدۇ، ئۇ- ۋەتەن. يەنە شۇنداق ئويلايمەن،ۋەتەنسىزلەرنى ئاللاھ كەچۈرمەيدۇ، ئۇلار جەننەتتىن ئۈمىد كۈتمىسۇن. جىنايەت-روھتىكى يېڭىلمەس كۈچتۇر، ھەققانىيەتنى ئاشۇ كۈچ يارىتىدۇ. يەنە شۇنداق ئويلايمەن،ۋەتەنسىز ئەرلەر ئىپپەتسىز ئەرلەردۇر، ئۇلارنى دۇنيا كەچۈرمەيدۇ، شۇڭا ئۇلارباراۋەرلىكتىن ئۈمىد كۈتمىسۇن.
بالىلىقىمدا ۋەتىنىم مەھەللەم ئىدى، چوڭ بولغاندا ئۇنى شەرقتىن تاپتىم.بالىلىقتىكى ۋەتىنىمنى قىزىل بايراق ئاستىغا كۆمۈپ قويدۇم. يەنە شۇنداق ئويلايمەن،ئىتىقاد ئوق ئۆتمەيدىغان قالغان. مەككىگە بارساڭمۇ ئىمان تېپىلمايدۇ، پەرۋانە شام ئالدىدا ئۆلدى. ھەييام بىر ئۆمۈر شاراب ئىچمەي جام ئالدىدا ئۆلدى. دىۋانە نان ئالدىدا ئۆلدى. يىڭنە قۇلىقىدىن كارۋان تارتقانلار ئاپئاق ئۇستىخانلاردىن نۇرلۇق ئايۋانلارنى قۇرۇپ، داپ ھالقىسىدىن ئەسەبىي زامانلارنى ئۆتكۈزۈپ، ساپايىسىدا باش سوڭەكلىرىنى شاراقلىتىپ جەز قىلىپ ئاخىر ۋەتىنىنى قۇملار ئاستىغا كۆمۈپ قويدى- دە،ئۆز يېرىدە سەرسانە ئۆلدى.
يەنە شۇنداق ئويلايمەن، ساقال- بۇرۇت قويغانلار مەن ئەر دېمىسۇن، بۇغداي تېرىپ زاغرا نانغا تويغانلار مەن ئەر دېمىسۇن، ئاھ خەلقىم دەپ دەرد يۇتۇپ مەيخانىداقونغانلار مەن ئەر دېمىسۇن، .ئۇلارنىڭ جەينامازدا ئىمانى نېسى، ئەل ئالدىدا ۋىجدانى نېسى.
سۆيگۈ ئۈچۈن جان بېرىمەن دەپ مەست بۆرىدەك ھۆركىرەپ، ئەرلىك غۇرۇر ئۈچۈن مۇشتلاشقانلار مەن ئەر دېمىسۇن، ئۇلارنىڭ يۈرىكىگە پىغانى نېسى، مەشرەپ كەبى زارۇ-زار چۆللەردىكى ھىجرانى نېسى.
ئىتىقاد ۋە "توغرا يول"نى سۆزلەپ، قۇياشنى تاپ دەپ، شەرققە قاراپ ماڭ دەپ،ۋەزخانلىقتا شان- شەرەپ كۆزلەپ ئىچ- ئىچىدىن قۇرۇپ ئۆتكەنلەر مەن ئەر دېمىسۇن،ئۇلارنىڭ سەپ ئالدىدا مەيدانى نېسى، تىغ ئالدىدا تەن- جانى نېسى.
ناخشا- ناۋالاردا ئازابنى ھەيدەپ، غىلجىڭ- نازلاردا يىلىكىنى قۇرۇتۇپ، ئەركىنلىكتە پۇت- قولىنى چىرماپ، «قىلىچتىن قورقۇپ بېشىنى ئېگىپ»، كاستۇم ئىچىدە تىترەپ يۈرگەنلەرمەن ئەر دېمىسۇن، ئۇلارنىڭ تومۇرىدا دولقۇنلىغان قان نېسى، ھاياتىغا ئۆلۈم ھەمدە شان نېسى.
يەنە شۇنداق ئويلايمەن، چۆلدە كارۋان ناخشىسى ئەمدى قايتا ياڭرىماس، ئەمدى يول باشلاپ ساڭا جەڭلەردە بۆرە ئۇچرىماس. قەدىمىي جەسەت، باش سۆڭەكلىرى شاھىد، لىكىن مىڭ توۋلىساڭمۇ بىر لەبزە زۇۋان چىقماس. سەن ئۆزۈڭگە قالدىڭ ئەي ئەر .
قاغا مىڭ يىل ياشىسىمۇ رەڭگى قارا، بەختى قارا. قۇش ئالتۇن قەپەزدە تۇرۇپمۇئاسمانغا ئىنتىلەر. سەن ئۆزۈڭنىڭ قۇلى ھەم زىندانىسەن. سەن ئۆزۈڭگە قالدىڭ ئەي ئەر. خوتۇنىڭغا تۆلەپ تۈگەىتكۈسىز قەرزدارسەن، بالىلىرىڭنىڭ پىشانىسىدا مۇشتلىرى تۈگۈلگەن قىسمەت سايىسىنى كۆردۈڭمۇ؟ ئەر ئەر... مەن شۇنداق ئويلايمەن .