غەزەللەر(كۈيزار)

huxhuy

غەزەللەر

ئابلەت مۇھەممەد كۈيزار
1
ئەدەب شەمئىيلىرى بىرلە ۋاپادارسەن،
ۋىسال شەربەتلىرى بىرلە ۋاپادارسەن.
سېنى سۆيمەك بۈيۈك ئارمان تىلەك بىلسەڭ،
مېھىر سۆھبەتلىرى بىرلە ۋاپادارسەن.
لىۋىڭگە لەۋ ئۇزاتقاندا يېگانە قۇش،
بەخىت تاقەتلىرى بىرلە ۋاپادارسەن.
يۈرەكتە ئاقسىمۇ دولقۇن ھاياجانلار،
نىكاھ ھۆرمەتلىرى بىرلە ۋاپادارسەن.
ھاياتلىق بەرمىسە كۈيزار تېنىچ كۆلبە،
شۈكۈر ئۈلپەتلىرى بىرلە ۋاپادارسەن.
2
چەرخنىڭ زۇلمىدىن رەنجىش راۋا بولماس،
جۇنۇنلۇق دەشتىدىن رەنجىش راۋا بولماس.
ھىجىر خەنجەرلىرى جانغا بېسىم ئەتسە،
ئەتىرگۈل بەرگىدىن رەنجىش راۋا بولماس.
شۈكۈرلەر باغرىدا دەستە سۇنۇق نۇر بوپ،
سەھەرنىڭ ۋەسلىدىن رەنجىش راۋا بولماس.
پەرىشانلىق ئېقىپ ئالەم پايانىدا،
ئۆمۈرنىڭ پەرقىدىن زەنقىش راۋا بولماس.
ئازابنىڭ شېخىدا كۆيسە چېچەكلەر ئاھ!
ۋىسالنىڭ كەيپىدىن رەنجىش راۋا بولماس.
مۇھەببەت دارىغا كۈيزار ئېسىلغاندا،
نېسىۋە باغىدىن رەنجىش راۋا بولماس.
3
كۆك تىلەكتىن كۈلدى كۆكلەم نەۋباھار،
كۆك يۈرەكتىن كۈلدى كۆكلەم نەۋباھار.
يېشىللىققا چۆمگەن بارچە جاھاندا،
كۆك چېچەكتىن كۈلدى كۆكلەم نەۋباھار.
كوچا- كويدا نەغمە- ناۋا جاراڭلاپ،
كۆك مېھرىدىن كۈلدى كۆكلەم نەۋباھار.
تۇتاش بولۇپ يۈرەكلەرگە يۈرەكلەر،
كۆك ھىدىدىن كۈلدى كۆكلەم نەۋباھار.
نەزمە پۈتۈپ، ناخشا توۋلاپ كۈيزاربەگ،
كۆك ئىشقىدىن كۈلدى كۆكلەم نەۋباھار.
مەنبە:شىنجاڭ يازغۇچىلىرى