ئاپا جاپا چەككەن كۈنىڭىزگە مۇبارەك بولسۇن
بۈگۈن ئەتىگەن قىزىم سەھەردە تۇرۇپ،يۇيۇنۇپ-تارىنىپ كۈلۈپلا يۈرەتتى.
توۋا دەيمەن، بۈگۈن بۇ قىزغا نېمە جىن چاپلاشقاندۇ؟ھەر كۈنى ئەتىگەندە خىزمەتكە كېچىكىسىز،بالدۇر قوپۇڭ، ناشتىلىغىڭىزنى قىلىڭ، كۈن ئىسسىق ،ئىسسىق ئۆتۈپ قالىدۇ دەپ ۋاقىراپلا قوپتۇرالمايدىغان بالا بۈگۈن زادى نىمە بولغاندۇ؟
بىز ئۆيدىكى 4 جان ئەتىگەنلىك ناشتىلىقنى يەپلا ئۆز ئىشلىرىمىزغا راۋان بولۇشتۇق.ئۈرۈمچىدىن بىر دوستىمىز يۇرتقا كەلگەن ئىكەن،ئايالىمغا تېلېفون قىلىپ چۈشتە لەغمەن ئېتىشنى بۇيرۇپ قويۇپ دوستۇم بىلەن بازارنى ئايلىنىپ تاماق پىشۇرغا يېقىن ئۆيگە قايتىپ كەلدۇق.
تاماق ۋاقتىدا قىزىم يەنىلا شۇ شوخ كەيىپ بىلەن،بۈگۈن مېنى لەغمەن بىلەنلا تەبرىكلەمسىلەر دەپ سوراپ قالدى. شۇندىلا بىز قىزىمىزنىڭ تۇغۇلغان كۈنى ئىكەنلىكىنى ئەسكە ئېلىشتۇق.ھەممىمىز بىرلىكتە قىزىمىزنىڭ تۇغۇلغان كۈنىنى مۇبارەكلەشتۇق.ئاپىسى قىزىم سىزنىڭ تۇغۇلغان كۈنىڭىز بولغانلىقتىن لەغمەن ئېتىپ قويغان،لەغمەننى يىسە ئۇزۇن ئۆمۇر كۆرگۈدەك، دەپلا ئالدىراپ زىننەت بۇيۇم سالىدىغان ساندۇقتىن بىر كۆمۇش زەنجىرنى ئېلىپ بوينىغا ئېسىپ قويدى.
مەن ئاستا ئايالىمنىڭ كۆزىگە قارىسام كۆز چاناقلىرى لىققىدە ياش، تېخى كۈلۈپ تۇرۇپ قىزىنى مۇبارەكلەۋاتاتتى،مەن ئويلاپ قالدىم.
دېمىسىمۇ بىر ئانا بولماق نېمىدىگەن تەس ھە؟بىر بالىنى تۇغۇش ئۈچۈن 9 ئاي 9 كۈن قورساق كۆتۈرۈپ،3 كىچە كۈندۈز قوساقنى ئاغرىتىپ،3سائەت ئىنجىقلاپ بالا تۇغۇدىكەن،ئانىنىڭ تارتقان ئازابىنى ئانىدىن باشقا كىممۇ ھېس قىلالىسۇن؟دوختۇر كارىۋىتىدا يېتىپ «بالام قىزمىدۇ ئوغۇلمىدۇ »دەپ يېڭى ھاياتلىقنى كۆرۈش ئۈچۈن جان تىكىپ، ھوشىدىن كېتىپ پۈتۈن كۈچىنى يىغىپ شۇ ھاياتلىق ئۈچۈن جېنىنى قۇربان قىلىۋاتقانلىغىنى كىممۇ ھېس قىلالىسۇن؟دېمەك ئانا دېگەن ھەقىقىي قەھىرمان.ھاياتى ئارقىلىق بىر جاننى ھاياتلىققا كۆز ئاچقۇزغۇچىدۇر.بۇ نېمە دېگەن ئۇلۇق جاسارەت.
مەن يەنىلا شۇنى ئويلاپ قالدىم،بۈگۈنكى كۈننى بالىنىڭ تۇغۇلغان كۈنى دېمەي،ئانىنىڭ ئىككىنچى ھاياتلىققا ئېرىشكەن ھەم« تۇغقان كۈنى» دېسە بولغىدەك.
ئانا نېمىدىگەن بەرداشلىق ھە؟ئۆزىنىڭ ئاغرىۋاتقانلىغىنى ئۇنتۇپ بالىسىغا مېھرىنى ئاتايدىكەن،كېچە-كېچىلەپ،ئۇخلىماي بالىسىنى تەۋرىتىپ ئېمىتىدىكەن،مانا شۇنداق قىلىپ بالىسى ئۈچۈن پۈتۈن بىر ئۆمۈرىنى قۇربان قىلىدىكەن.
مانا بۇ قانداق روھ؟ بۇ قانداق ئۆزىنى بېغىشلاش ھە؟
ھازىر جەمئىيىتىمىزدە«تۇغۇلغان كۈن»نى بالىلارلا ئەمەس چوڭلارمۇ ھەشەمەتلىك ئۆتكۈزۈۋاتىدۇ،ئائىلىلەردە ئۆتكۈزىلىدىغان «تۇغۇلغان كۈن» يىغىلىشلىرى ھازىر رېستۇرانلارغا يۈزلەندى.نەچچە ئون جوزىلاپ مېھمان چاقىرىلىۋاتىدۇ.
ئەسلىدىلا مىللىتىمىزنىڭ ئولتۇرۇش، زىياپەتلىرى كۆپ ئىدى،مەن دېمىسەممۇ ھەممىمىزگە بىلىشلىك.چوڭلار تۇغۇلغان كۈن مۇناسىۋىتى بىلەن پۇل يىغماقتا.بالىلار ئاتا-ئانىسىغا سېلىق سالماقتا،مەن توردا بىر قىزنىڭ تۇغۇلغان كۈنى ئۈچۈن 60 تۈمەن خەجلىگەنلىكىنى كۆرگەن ئىدىم.بەلكىم ئۇلارنىڭ پۇلى كۆپ بولغىيتى.
بىزنىڭ مىللىتىمىزنىڭ ساپاسى بۇ باسقۇچقا بارمىدى،تېخى نامرات باسقۇچتا تۇرۇۋاتقان ئۇرۇق-تۇغقان، قان-قېرىنداشلىرىمىز تېخى كۆپ.بىزگە نېمە قويۇپتۇ بۇ دورامچىلىقنى.بىز شۇ ئىللەتلىرىمىزنى ئۆزگەرتەلمىسەكمۇ ،«تۇغۇلغان كۈن »ئادىتىمىزنى ئۆزگەرتىپ باققان بولساق شۇ« تۇغۇلغان كۈن» زىياپەتلەرگە سەرپ قىلغان پۇللارنى يىغىپ شۇ جاپاكەش ئانىلىرىمىزغا سوۋغا ئېلىپ بەرگەن بولساق،ئاپىسى بالىلىرى ئۈچۈن قۇربان قىلغان ھاياتىغا ئازراق بولسىمۇ كۆڭۈل ئوزۇقى بولۇپ قالغان بولاتتى.
«تۇغۇلغان كۈنىنى» ئۆزگەرتىپ «تۇغقان كۈنى»زىياپىتىگە ئۆزگەرتكەن بولساق نېمىدىگەن ئەھمىيەتلىك كۈن زىياپىتى بولغان بولاتتى ھە؟مېنىڭچە بۇ دورامچىلىق زىياپىتى بولماستىن،مىللىتىمىزنىڭ ئۆزى جاپاكەش ئانىلارنى ھۆرمەتلەش يۈزىسىدىن بارلىققا كەلتۈرگەن«تۇغقان كۈن» مەشرىپىگە ئايلانغان بولاتتى.
جاپاكەش ئانىلىرىمىزنىڭ «تۇغقان كۈن»ىڭلارغا مۇبارەك بولسۇن.
مەنبە:ئىجايىتىم
يوللىغان ۋاقتى 2012-9-19 00:19:14
