جۇڭگونىڭ دياۋيۈ ئارىلىنى باشقىلارنىڭ خالىغانچە «ئېلىپ-سېتىش»ىغا يول قويۇلمايدۇ
10-سېنتەبىر ، ياپونىيە ھۆكۈمىتى دياۋيۈ ئارىلى ھەم ئۇنىڭغا تەۋە جەنۇبىي كىچىك ئارال ۋە شىمالىي كىچىك ئارالنى «سېتىۋېلىپ»، ئۇنى ئاتالمىش «دۆلەت ئىلكىگە ئۆتكۈزۈۋېلىش»نى جاكارلىدى. ياپونىيە ھۆكۈمىتىنىڭ بۇ قىلمىشى جۇڭگونىڭ زېمىن ئىگىلىك ھوقۇقىغا قىلغان ئېغىر تاجاۋۇزچىلىق، جۇڭگو ھۆكۈمىتى ۋە خەلقى بۇنىڭغا قەتئىي قارشى تۇرىدۇ ۋە قاتتىق ئېتىراز بىلدۈرىدۇ.
بۇ يىلدىن بۇيان، ياپونىيە ھۆكۈمىتىنىڭ دياۋيۈ مەسىلىسى ئۈستىدىكى ھەرىكىتى كۆپىيىپ كەتتى. بۇ يىلنىڭ بېشىدا دياۋيۈ ئارىلىغا تەۋە بىر قانچە ئارالغا «نام قويۇش» ئويۇنىنى ئوينىغاندىن كېيىن، يەنە ئوڭ قانات كۈچلىرىنى ئۆز مەيلىگە قويۇپ بېرىپ، «ئارالنى سېتىۋېلىش» پاراكەندىچىلىكىنى كەلتۈرۈپ چىقاردى ھەمدە ئاخىر ئۆزى سەھنىنىڭ ئالدىغا بىۋاسىتە سەكرەپ چىقىپ، دياۋيۈ ئارىلى ھەم ئۇنىڭغا تەۋە جەنۇبىي كىچىك ئارال ۋە شىمالىي كىچىك ئارالنى «سېتىۋېلىپ»، ئۇنى ئاتالمىش «دۆلەت ئىلكىگە ئۆتكۈزۈۋېلىش»نى ئەمەلگە ئاشۇرماقچى بولدى.
ياپون ھۆكۈمىتىنىڭ بۇ ھەرىكەتتىكى مەقسىتى شۇكى، ئاتالمىش «دۆلەت ئىلكىگە ئۆتكۈزۈۋېلىش» ئارقىلىق، دياۋيۈ ئارىلىغا بولغان «ئەمەلىي باشقۇرۇش»ىنى كۈچەيتىپ، ئاخىر دياۋيۈ ئارىلىنى ئىشغال قىلىۋېلىش. ياپونىيە ھۆكۈمىتى مەيلى قانداق چۈشەندۈرسۇن ياكى پەردازلىسۇن، بۇ قىلمىشنىڭ باشقىلارنىڭ نەرسىسىنى «ئېلىپ-سېتىش» تەك ماھىيىتىنى يوشۇرۇپ بولالمايدۇ. ئازراق ساۋادى بارلا كىشى بۇ خىل ھەرىكەتنىڭ تولىمۇ بىمەنە ۋە قانۇنسىزلىقىنى بىلىدۇ، يەنە كېلىپ جەزمەن مەقسىتىگە يېتەلمەسلىكىمۇ پېشانىسىگە پۈتۈلگەن.
خۇ جىنتاۋ جۇڭگو–ياپونىيە مۇناسىۋىتى ۋە دىياۋيۈ ئارىلى مەسىلىسى توغرىسىدىكى مەيدانىنى بىلدۈردى
شىنخۇا ئاگېنتلىقى، ۋلادىۋوستوك، 9 – سېنتەبىر تېلېگراممىسى. دۆلەت رەئىسى خۇ جىنتاۋ 9 – سېنتەبىر ئاسىيا – تىنچ ئوكيان رايونى ئىقتىسادىي ھەمكارلىق تەشكىلاتىنىڭ 20 – نۆۋەتلىك باشلىقلار بىرەسمىي يىغىنى مەزگىلىدە ياپونىيە باش ۋەزىرى نودا يوشىخىكو بىلەن سۆھبەتلەشتى. خۇ جىنتاۋ جۇڭگونىڭ ياپونىيە بىلەن بولغان مۇناسىۋىتى ۋە دىياۋيۈ ئارىلى مەسىلىسى توغرىسىدىكى مەيدانىنى بىلدۈردى.
خۇ جىنتاۋ مۇنداق دېدى: جۇڭگو – ياپونىيە مۇناسىۋىتى يېقىندا دىياۋيۈ ئارىلى مەسىلىسى تۈپەيلى جىددىيلىشىپ قالدى. دىياۋيۈ ئارىلى مەسىلىسى توغرىسىدىكى مەيدانىمىز ئېنىق، قەتئىي ئۆزگەرمەيدۇ. ياپونىيەنىڭ ھەر قانداق شەكىلدىكى ‹‹ئارال سېتىۋېلىش›› ئويۇنى قانۇنسىز، كۈچكە ئىگە ئەمەس. جۇڭگو بۇنىڭغا قەتئىي قارشى تۇرىدۇ. ھۆكۈمىتىمىز زېمىن ئىگىلىك ھوقۇقىنى قوغداش مەسىلىسىدىكى مەيدانىدىن قەتئىي ئېغىشمايدۇ. ياپونىيە ھۆكۈمىتى جۇڭگو – ياپونىيە مۇناسىۋىتىنىڭ تەرەققىيات ئومۇمىيىتىنى قوغداش ئۈچۈن، جەزمەن ۋەزىيەتنىڭ كەسكىنلىكىنى تولۇق تونۇشى، خاتا قارار چىقارماسلىقى كېرەك.
يوللىغان ۋاقتى 2012-9-12 10:52:50
