ھەققانىي: توردا بار(ئېنتىرنېت تەسىراتىم)

akkani

	توردا بار (ئېنتىرنېت تەسىراتىم) كۆرۈپ تۇردۇم ھەر كۈنى تۈرلۈك خەۋەر توردا بار، ئۆگەنمەككە بەل باغلاي بىلىم-كەۋسەر توردا بار، ھىدى تېگەر دىماققا مۇشكى ئەنبەر توردا بار، ئوكيانىدۇر ئىلىمنىڭ سۈزسە جەۋھەر توردا بار، كۈلكە،ئەبجەش كەيپىيات،قايغۇ-دەرتلەر توردا بار. زىيارەت قىپ ئۆيۈمدە ئايلىنىمەن دۇنيانى، يەلكەن بولۇپ ئۈزەرمەن خىيالىمدا دەريانى، بەردى ماڭا ئېنتىرنېت ئەقىل-ئىدراك،دەرماننى، دەل شۇ كۈنى ئاڭلايمەن بۈگۈن كەلگەن پەرماننى، ئارىلايمەن كۈندە مىڭ سەھرا-شەھەر توردا بار. تەسىرلەنمەي تۇرامدىم يازمىسىدىن ئاقىلنىڭ، چۇۋۇپ تۇرار مېزىنى مۇناپىقنىڭ-قاتىلنىڭ، ماھىيىتىنى بىلدۈردى مۇتىھەمنىڭ-ئاجىزنىڭ، بىلىۋالدۇق ئەپتىنى مۇتەئەسسىپ جاھىلنىڭ، دېمەك ئويغاق زىيالىي ۋەتەنپەرۋەر توردا بار. ھەق دېگەنكەن كىم دېسە تورنى<< جاھان ئەينىكى>>، بولار ئۇندا نامايەن ئىزدەنگەننىڭ ئەمگىكى، ئىكەن گاھى بىكارچى زېرىككەننىڭ ئەرمىكى، يازما يازساق ماختىنىپ باركەن تەنبىھ -تەستىكى، چالما-كېسەك،تاش-توقماق،سېسىق گەپلەر توردا بار. شېئىر-قوشاق،فىليەتۇن،ماقال،رومان،ھېكايە- يازار ئىكەن يازغۇچى بەكمۇ سىلىق-سىپايە، تەسىر قوزغاپ قوياركەن ئۆتكۈر ھەجۋىي-كىنايە، بەك قوپالكەن ئوقۇسام بەزى ئىنكاس-ئىبارە، ئەپسۇسلىنىپ قارايمەن ئوغا-زەھەر توردا بار. باركەن بىلسەم توردىمۇ نادانلىرى-لۈكچىكى، ئاللا چۇقان سۈرەركەن چاقچاق قىلسا شۇنچىكى، تىللايدىكەن ئەسەرنى ياخشى يازساڭ قانچىكى، سايرايدىكەن يېقىمسىز ھۇقۇش بولۇپ تۈندىكى، كۆرەلمەسلىك،يالقاۋلىق دىلغا زەرەر توردا بار. توردا تەركىپ مۇرەككەپ ياخشىلارمۇ كۆپ ئىكەن، سۆزى قايماق،كۆڭلى ئاق،پاختىلارمۇ كۆپ ئىكەن، كىنو،ئېتوت،كۈلدۈرگە،ناخشىلارمۇ كۆپ ئىكەن، سۇپى،ئىشان،داموللا،باخشىلارمۇ كۆپ ئىكەن، گاھى شەربەت،گاھ شېكەر،بەلكى نەشتەر توردا بار. پات-پات قىزىپ قالىمەن توردا تېما يازاي دەپ، چىرىكلىكنى پاش قىلىپ يىلتىزىدىن قازاي دەپ، نەيزە قىلىپ قەلەمنى ياۋ كۆكسىنى ياراي دەپ، ئاچكۆزلەرنى مات قىلىپ نەگە بارسام باراي دەپ، لېكىن ماڭغا كۆز-قۇلاق خېيىم-خەتەر توردا بار. مەۋھۇم دۇنيا بولسىمۇ قىلماق زۆرۈر ئېھتىيات، دەۋەتتىغۇ كىم-كىملەر:<< تور كۆرگەنگە پەندىيات>>، زىيان سالدى بەزىگە تەرەققىيات-كەشپىيات، بىز تاپمايلى بىھۇدە ئۆزىمىزگە مۈشكىلات، ھەر جۈملىگە بىر تەھلىل،ساقچى-لەشكەر توردا بار. ******** مەنبە:ئۆزقەلىمىم(ئابدۇۋەلى راخمان ھەققانىي)

manglisa

	بەك توغرا يىزىپسىز

turknaz

	مەۋھۇم دۇنيا بولسىمۇ قىلماق زۆرۈر ئېھتىيات، دەۋەتتىغۇ كىم-كىملەر:<< تور كۆرگەنگە پەندىيات>>، زىيان سالدى بەزىگە تەرەققىيات-كەشپىيات، بىز تاپمايلى بىھۇدە ئۆزىمىزگە مۈشكىلات، ھەر جۈملىگە بىر تەھلىل،ساقچى-لەشكەر توردا بار. بۇ كۇبلىت بەك ياقتى.رەھمەت ،ئىسىل يازمىلىرىڭىز ئۈزۈلمىگەي. ********

tewip

	ھەققانىينى ئامرىكا تىرورلۇق تىزىملىكىگە كىرگۈزۈپتۇ دىققەت قىلارسىلەر ھەققانىي ئەپەندىم!!

ئارتۇچ

	ئايرىش كىرەك مېغىزنى   شاكىلىدىن يىمىشنىڭ ، ۋاختى ئۆتتى ئورۇنسىز  غەيۋەت -نىزا قىلىشنىڭ ، سىنىلىدۇ  باتۇرلار   مەيدانىدا  چېلىشنىڭ ، نېمە مەنا مىكرىدىن  ئەلگە داۋراڭ سېلىشنىڭ ، توققۇزى رەڭ بىرى جەڭ مەنزىل ،سەپەر توردا بار .

哈密瓜525

	بەك ياخشى يېزىپسىز دوستۇم ، باركەن بىلسەم توردىمۇ نادانلىرى-لۈكچىكى، موشۇنداق ناكەسلەرنى توردىن ھەيدىۋەتسەك دەيمەن.

koraxqan

	ئىنتېرنىت ئىنقىلابى!

xohtekin

	توردا تەركىپ مۇرەككەپ ياخشىلارمۇ كۆپ ئىكەن، سۆزى قايماق،كۆڭلى ئاق،پاختىلارمۇ كۆپ ئىكەن، كىنو،ئېتوت،كۈلدۈرگە،ناخشىلارمۇ كۆپ ئىكەن، سۇپى،ئىشان،داموللا،باخشىلارمۇ كۆپ ئىكەن، گاھى شەربەت،گاھ شېكەر،بەلكى نەشتەر توردا بار. بۇ مىسرالار تور دۇنياسىنى ناھايتى ئېنىق،جانلىق ئىپادىلەپ بىرىپتۇ. ھەققانىي ئەپەندى تىللىرىدىن شىئېر پۇراق جۇش ئۇرۇپ تۇرىدىكەن!!!

(نۇر)

	ئەسىرىڭىز نادەرلانغانلىغىغا مۇبارەك بولسۇن.

uygari

	بەك ياخشى يېزىپسىز ، يازغانلىرىڭىزنىڭ ھەممىسى ئەمەلىيەت . قەلىمىڭىز ھەرگىز توخــتاپ قالمىغاي !