جالاپ ئەرلەر
مەمىتمىن غوپۇر (يادىكار)
ئەل ئۈچۈن باغرى ئاتەش كاۋاپ ئەرلەر ،
بار لېكىن تۈگەتكۈسىز ساناپ ئەرلەر .
تېكىنى بولغىنىدەك قىزىلگۈلنىڭ ،
يوق ئەمەس ئارىمىزدا جالاپ ئەرلەر …
بىر ئوبدان ئائىلىسى ، ئۆيى تۇرۇپ ،
بېغىدا پۇرايدىغان گۈلى تۇرۇپ .
قاترايدۇ ھەممە ياققا جالاپ ئەرلەر،
چاڭقىسا ئىچىدىغان سۈيى تۇرۇپ …
سۆزلىرى شېرىن – شىكەر بالدىن تاتلىق ،
ئىزلەيدۇ شاختىن- شاخقا قونۇپ شادلىق .
ئۆكۈنمەس مەنزىلىگە جالاپ ئەرلەر ،
پىيادە قايتىپ كەلسە بېرىپ ئاتلىق …
بىر دەملىك خوش قىلماقلىق كۆڭلىنى ئۇ ،
چۈشەنمەس چىن ئەقىدە ،سۆيگۈنى ئۇ .
رەزىلدۇر ھايۋاندىنمۇ جالاپ ئەرلەر ،
مىكىردە تۇتقان ئۇستاز تۈلكىنى ئۇ …
ئويلىماس مىللەت نېمە ، ئىززەت نېمە ،
ئىنسانغا كېرەك بولغان قىممەت نېمە .
بىلمەيدۇ ۋىجدان نېمە جالاپ ئەرلەر ،
غۇرۇرنى ساقلايدىغان زىننەت نېمە …
پوق يەيدۇ ئىتمۇ تاللاپ ئۇ تاللىماس ،
ئۇ ياخىشى بۇ يامان دەپ يا ئايرىماس .
بۇلغانغان تامام ئەقلى جالاپ ئەرلەر ،
كىم كېرەك ، كىم كېرەكسىز ئۇ شاللىماس …
بىلمەيدۇ ئار- نومۇسنى ھاياسى يوق ،
پەسلىكتە يېتىدىغان باھاسى يوق .
ئوخشايدۇ بىر ئىبلىسقا جالاپ ئەرلەر ،
كېسەل ئۇ ساقايمايدۇ ، داۋاسى يوق …
ئاتقاندا خەقنىڭ خوتۇن -قىزىغا قاش ،
ئاتقاندۇر دېمەس كىملەر ئۆگزەمگە تاش .
زەھەرلىك بىر يىلاندۇر جالاپ ئەرلەر ،
ئاپىرار گۆرگە سۆرەپ شۇنداق ياشاش …
ئويلىماس ئوينىغاندا ئانىسنى،
سىڭلىسى ،ئوماق قىزى -بالىسىنى .
يۈزلىرى تۆكۈلىسىمۇ جالاپ ئەرلەر ،
سىلكىمەس يەنە قاتتىق كاللىسىنى …
سورىساڭ دەيدۇ ئويۇن ياشاش دېگەن ،
كۆڭلىدە يوقتۇر ئۇنىڭ ئاياش دېگەن .
يوق ئۇندا ئادىمىيلىك، جالاپ ئەرلەر ،
چاڭ سالار دوست رىسقىغا ئاداش دېگەن …
قارىساڭ دىدارىغا شۇنچە خۈنۈك ،
كېتىدۇ تۇرۇپ كۆرسە ،گۆردە ئۆلۈك .
ئوخشايدۇ گاھ چايانغا جالاپ ئەرلەر ،
سالىدۇ شەيتانغىمۇ نۇقتا – چۈلۈك…
قىلىقى ھايۋاندنىمۇ بەتتەر ئۇنىڭ ،
قوينىدا باردۇر بسسىز خەنجەر ئۇنىڭ .
بولمايدۇ ئەمما ئاگاھ جالاپ ئەرلەر ،
يولىمۇ ماڭغان ئەسلى خەتەر ئۇنىڭ …
خوتۇنى قالار يالغۇز تالاي تۈنلەپ ،
تەڭرىگە قىلىپ نالە ئاچچىق ئۈنلەپ .
بولغاچقا ئالا كۆڭۈل جالاپ ئەرلەر ،
سوقۇشار ئۆزگىلەردىن كۈندە كۈنلەپ …
بۇزدى ئۇ چاڭگىسىنى تالاي قۇشنىڭ ،
ياكى ئۇ ئەۋلادىمۇ شۇ ھۇقۇشنىڭ .
پۈتكەنمۇيا ھارامدىن جالاپ ئەرلەر ،
مەھسۇلى بولۇپ ئاشنا ئاھ تۇتۇشنىڭ …
ھەيرانمەن ھەتتا نەۋرە كۆرگەندىمۇ ،
ئاتمىشقا يېقىنلىشىپ يۈرگەندىمۇ .
قالماسكەن خۇي -پەيلىدىن جالاپ ئەرلەر ،
ئەزرائىل رەنجىپ قاپاق تۈرگەندىمۇ …
توۋا دەپ تالاي قېتىم تۇتتۇم ياقا ،
دېدىم ھەم شۇنداق ياشاپ نېمە جاپا .
شۈركەندىم قىلمىشىدىن جالاپ ئەرلەر ،
سوققاچقا چوتىنى دائىم شۇنداق خاتا …
قىلمايدۇ پېسەنت ئەلنىڭ نەپرىتىگە ،
زوقلىنار قاراپ قىلغان پەسلىكىگە .
خۇمسىدۇر تەڭدىشى يوق جالاپ ئەرلەر ،
ئوخشايدۇ بۇ دۇنيانىڭ ئەخلىتىگە …
يوقتەكلا بۇ ئالەمنىڭ تارازىسى ،
بىر كۈنى سورايدىغان ھەم قازىسى .
يۈرۈيدۇ شىلتىڭ ئېتىپ جالاپ ئەرلەر ،
يوقتەكلا ھەم تەڭرىنىڭ ئارغامچىسى …
يامرىدى ھەممە ياقتا مانا ئەيدىز ،
يانمىدى ئارقىسىغا ئۇلار ھەرگىز .
ياشايدۇ ئۆلۈم يوقتەك جالاپ ئەرلەر ،
ئويلىماس بۇلارنى ھەم قەدىرسىز …
خۇلاسە :ئەجەل كەلسە باشلىرىغا ،
قىلمايدۇ ئەلمۇ پېسەنت ياشلىرىغا .
شۇمبۇيا ئەلگە ئۈنگەن جالاپ ئەرلەر ،
لايىقتۇر مەڭگۈ لەنەت تاشلىرىغا ….
2012-8
باشقا مۇنبەرلەرگە رۇخسەتسىز كۆچۈرمەڭ.
يوللىغان ۋاقتى 
