قارامايلىق 21 ياشلىق يىگىت شىركەتنىڭ بىر مىليون پۇلىنى يۈتۈۋالدى
ياشىن تورى خەۋىرى، 2 - ئاينىڭ 22 - كۈنى چۈشتىن بۇرۇن، قاراماي شەھەرلىك جەرەنبۇلاق رايونى ساقچى تارماق ئىدارىسى زاڭ مال قايتۇرۇش يىغىنىدا، باغلام-باغلام رەتلىك قويۇلغان پۇللار كىشىلەرنىڭ دىققىتىنى تارتاتتى، بۇ پۇللارنىڭ سانى 1 مىليون 118.7 مىڭ يۈەن بولۇپ، كىشىلەرنىڭ ئىشەنگۈسى كەلمەيدىغىنى بۇ پۇللارنى ‹90 - يىلدىن كېيىن›تۇغۇلغان بىرسى ‹يۈتۈۋالغان› ئىدى. بۇ 21 ياشلىق كاسسىر بىر مىليوندىن ئارتۇق پۇلنى ئېلىپ قاراماي شەھىرى جەرەنبۇلاقتىن يولغان چىقىپ يىراققا قاچماقچى بولغاندا، ئۈرۈمچىدە ساقچىلار تەرىپىدىن قولغا چۈشتى.
زاڭ مال قايتۇرۇش يىغىنىدا، بۇ پۇللارنى قايتۇرۇۋالغان خې ئەپەندىم توختىماستىن ساقچىلارغا رەھمىتىنى بىلدۈرەتتى، خې ئەپەندىم قاراماي شەھەرلىك جەرەنبۇلاقتىكى بىر شىركەتنىڭ خوجايىنى بولۇپ، بۇ پۇللارنى يۈتۈۋالماقچى بولغان يىگىت ئۇنىڭ كاسسىرى ئا تاۋ (ئۆزگەرتىلگەن ئىسم) ئىدى.
خې ئەپەندىمنىڭ مۇخبىرلارغا دېيىشىچە، شىركەت ئۈچ كۈمۈش كارتا بېجىرگەن بولۇپ، ھەممسى ئا تاۋنىڭ باشقۇرۇشىدا ئىكەن، ئۇلارنىڭ ئىچىدىكى بىرسى خې ئەپەندىمىنىڭ يانفونى بىلەن باغلاقلىق ئىكەن. 2 - ئاينىڭ 3 - كۈنى باھار بايرىمى مەزگىلىدە، ئۇ يانفوندا ئۇچۇر تاپشۇرۇۋالغان بولۇپ، كارتىدىن 230 مىڭ يۈەن ئېلىنغان، بۇنىڭدىن غەلىتىلىك ھېس قىلغان خې ئەپەندىم ئا تاۋغا تېلېفون ئۇرۇپ سورىغان، ئا تاۋ بولسا بوغالتىرىنىڭ بايرامدىن بۇرۇن ئورۇنلاشتۇرۇشى بويىچە ھازىر ھېساباتتىن ئالغانلىقىنى دېگەن، بۇنداق ئورۇنلاشتۇرۇش بۇرۇنمۇ بولغاچقا، خې ئەپەندىم ئارتۇقچە ئويلىمىغان، شۇنداقلا ئا تاۋغا بوغالتىرغا تېلېفون قىلىپ ئېيتىپ قويۇشىنى دېگەن.
2 - ئاينىڭ 8 - كۈنى، زاۋۇتنىڭ بايرامدىن كېيىن ئىش باشلىغان بىرىنچى كۈنى خوجايىن بوغالتىردىن ئا تاۋنىڭ تېلېفونىنى ئالغان - ئالمىغانلىقىنى سورىغاندا، بوغالتىر ئالمىغانلىقىنى دېگەن.
بۇ چاغدا خې خوجايىن ئا تاۋنىڭ ئىشقا كەلمىگەنلىكىنى بىلگەن، ئۇنىڭغا تېلېفون ئۇرسا تېلېفونىنىمۇ ئالغىلى بولمىغان، شىركەتنىڭ ھېساباتىنى تەكشۈرگەندە بولسا، 910 مىڭ يۈەننىڭ ئېلىنغانلىقىنى بىلگەن، ئۇنىڭدىن باشقا ئىككى كۈمۈش كارتىدىكى پۇلنىڭ بار يوقلۇقىنى بىلگىلى بولمىغان، بۇ چاغدا خې خوجايننى سوغۇق تەر بېسىپ كەتكەن ھەمدە دەرھال ساقچىغا مەلۇم قىلغان، ساقچىلارنىڭ تەكشۈرۈشىچە، جەمئىي 1 مىليون 340 مىڭ يۈەن بىراقلا يۈتۈپ كەتكەن.
خوجايىننىڭ ئېيتىشىچە،ئۇ تېخى ئۆستۈرۈپ ئەتىۋارلاپ ئىشلەتمەكچى بولغان بۇ يىگىتنىڭ بۇنداق قىلىشىنى ئويلاپمۇ باقمىغان. دېلو مەلۇم قىلىنغان كۈنى جەرەنبۇلاق ساقچى ئىدارىسى مەخسۇس گۇرۇپپا تەشكىللەپ، ئا تاۋنى ئۈرۈمچىدىن ئىزلىگەن، 2 - ئاينىڭ 14 - كۈنى ئۇ ئۈرۈمچىدە بىر مېھمانخانىدا قولغا ئالغان، قولغا ئېلىنغان ئۆينىڭ ئىچىدە ئۇ ئۆزىنىڭ كاسسىرلىق خىزمەت قولايلىقىدىن پايدىلىنىپ، شىركەتنىڭ زور سوممىلىق پۇلىنى ئالغانلىقىنى ئىقرار قىلغان.
ئۇنىڭ ئىقرار قىلىشىچە، ئۇ 2 - ئاينىڭ 3 - كۈنى يولغا چىقىپتۇ، پۇلنىڭ سانى كۆپ بولغاچقا، ئۇ نەچچە قېتىمغا بۆلۈپ يۈك - تاق ساندۇقىغا سېلىپ چىققانىكەن، ئۇ شىنجاڭدىن ئايرىلىپ ماڭماقچى بولسىمۇ، نەگە بېرىشنى تېخى بېكىتمىگەن ئىكەن.
ئۇنىڭ ئىقرار قىلىشىچە، بۇنداق قىلىشىغا ئاساسلىقى 3 ئاي بۇرۇن بىر ئويۇنچۇقخانىدا قىمار ئويناشقا خۇمار بولۇپ قالغانلىقى سەۋەب بوپتۇ، بۇ ئۈچ ئايدا ھەر ئايلىق 2000 يۈەن مائاشىنى پۈتۈنلەي قىمارغا سەپ بېرىپتۇ، بۇ ئەنزىنى سادىر قىلىشتىن بۇرۇن، ئۇ قىمارخانىغا 70 مىڭ يۈەنلىك قەرز بولۇپ قالغان ئىكەن.
2 - ئاينىڭ 4 - كۈنىدىن 14 - كۈنىگىچە، ئۇ 150 مىڭ يۈەننى خەجلىگەن، بۇنىڭ ئىچىدە 70 مىڭنى قەرزىگە تۆلىگەن، 60 مىڭغا ئۆزى ۋە قىز دوستىغا نەرسە سېتىۋالغان، يانچۇقىغا سېلىۋالغان 20 مىڭ يۈەننى باشقىلار ئوغرىلىۋالغان. ئۇنىڭ قىز دوستى كۇيتۈندە بولۇپ، ئىككىسى ئارىلىشىۋاتقىلى 3 يىل بولغان ئىكەن، جەرەنبۇلاقتىن ئايرىلغاندىن كېيىن، ئۇ كۇيتۈنگە كېلىپ، قىز دوستىغا ئالتۇن بىلەيزۈك، زەنجىر، ئالماس ئۈزۈك، يانفون قاتارلىقلارنى ئېلىپ بەرگەن، قىز دوستى سورىسا، ئۆزۈم يىغقان پۇلغا ئالدىم، دەپ جاۋاب بەرگەن.
ئا تاۋ تۇتۇلغاندىن كېيىن، ساقچىلار كۇيتۈنگە بېرىپ زاڭ ماللارنى قايتۇرۇپ كەلدى، ئا تاۋ قىز دوستىنى كۆرۈۋېلىش تەلىپىنى ئوتتۇرىغا قويغاچقا ئۇلارنى ساقچىلار كۆرۈشتۈردى، قىز بولسا ئۇنى كۆرۈپلا توختىماستىن يىغلاپ كەتكەن.
ھازىر بۇ ئەنزە ئىچكىرىلەپ سوراق قىلىش باسقۇچىدا ئىكەن.
بۇ يازمىنى ئاخىرىدا نەسىمى تەھرىرلىگەن. ۋاقتى 2012-4-19 12:09 
يوللىغان ۋاقتى 2012-4-18 10:07:13
