ياشلىقتىكى مۇھەببەت

arkzat

ياشلىقتىكى مۇھەببەت


ئۇچراشساقلا تەلمۈرىسەن تىكىلىپ،
ئۈزەلمەستىن كۆزلىرىمدىن كۆزۈڭنى.
گاھ قويارسەن كالتا-كالتا يۆتىلىپ،
ئېيتالماي چىن يۈرەكتىكى سۆزۈڭنى.
ئۈزەلمەيسەن كۆزلىرىمدىن كۆزۈڭنى.

گاھ قويارسەن كالتا-كالتا يۆتىلىپ،
تىۋىشىڭدىن بەرگىنىڭمۇ  بىشارەت.
چاڭقاقلىقتا كەتتى كۆزۈم تېشىلىپ،
ۋەسلىڭ ئۈچۈن قىلىۋەرمە  بىتاقات.
سالدىڭ مېنى ھەر كويغا ھەي كاساپەت.

ۋەسلىڭ ئۈچۈن  قىلىۋەردىڭ  بىتاقات ،
ماراپ باقتىم پەنجىرەڭدىن ئۆيۈڭگە.
كۆرەلمەي ئاي يۈزۈڭنى ئاھ رىسالەت،
ئايغا باقتىم ئوخشىتىپ ئاي يۈزۈڭگە.
شۇنداق ئىكەن ياشلىقتىكى مۇھەببەت.

ئايغا باقسام ئوخشىتىپ ئاي يۈزۈڭگە،
ئاي يۈزىدە داغ بار ئىكەن تاتلىقىم.
تەڭلىشەلمەس ئىكەن ئايمۇ ئۆزۈڭگە،
پەرىزاتتەك گۈزەل قەلەم قاشلىقىم.
ئىقلىم ئارا سەنلا كۆڭۈل شادلىقىم.

تەڭلىشەلمەس تولۇن ئايمۇ ئۆزۈڭگە،
جانان سېنى بولالمايمەن  تەرىپلەپ.
تەلمۈرىمەن گۈلدەك گۈزەل يۈزۈڭگە،
يۈرىكىمنى قويدۇڭ تەكرار زەرەتلەپ.
كەلگىنە يار   قوياي تاتلىق شەرەتلەپ.

ۋەسلىڭگە رام قىلدىڭ  ئوتلۇق زەرەتلەپ،
كېتەلمەيمەن ئەتراپىڭدىن يىراققا.
ئۆتەر  ئۆمرۈم يوللىرىڭدا تەمتىرەپ،
ئىنتىلگەندەك پەرۋانىلار چىراغقا.
مەلھەم بولغىن ئاچچىق ھىجران-پىراققا.

ئىنتىلگەندەك پەرۋانىلار چىراغقا،
ئىنتىزارمەن ۋىسالىڭغا نىگارىم.
تۇتقۇن قىلما قىيناپ  دەردكە- ئازابقا،
چېچەك ئاچسۇن سۆيگۈڭ بىلەن باھارىم.
سېنى سۆيۈپ ياشاش ئەھدى-قارارىم.

1991-يىل 30-سېنتەبىر، قاراقاشتا يېزىلغان

milodiya09

yaxi xiyr  ikan dawamlik yizip turug

ADiL

شېئىرنىڭ يېزىلىش شەكلىمۇ ئۆزگىچە ئىكەن.

ئەزھەر36

ياخشى يېزىلىپتۇ ، تېخىمۇ كۆپرەك شىئىرلىرىڭىزنى يوللاپ تۇرارسىز !

نۇرلان

ئەرك زاد ئەپەندىمنىڭ  بۇندىن  24 يىل بۇرۇنقى شېئىرلىرى بىلەن يۈز كۆرۈشكىنىمدىن خوشالمەن.

ئەلتۈرگ

ياشلىقتىكى مۇھاببەت ناخشسكەنغۇ بۇ

سىھىر

ياشىسۇن مۇھەببەت،،،،،يۈرىكىڭىزدىكى شۇ ئوتلۇق ئارزۇلارنىڭ مەڭگۈ يىلىنجاپ تۇرۇشىنى چىن دىلىمدىن ئۈمۈت قىلىمەن ،،،،،

نەۋرۇز

ھاياتنىڭ ئەڭ مۇكەممەل قىسمى يەنىلا " ياشلىقتىكى مۇھەببەت" ئىپادىلىندۇ. ئەركىزات ئەپەندىنىڭ شىئېرلىرىدا بىر خىل تەبىيلىكنى سېزىپ تۇرىمەن. شۇڭا ياختۇرۇپ ئوقۇيمەن. تەبىيلىككە نىمە يەتسۇن دەيسىز. ياخشى ئەسەرلەر سىزدىن ئايلانسۇن.

شىپا

شىئىرىڭىز ياخشى چىقىپتۇ