ھايات ھېكمىتى

arkzat

      ھايات ھېكمىتى


   ياسىنجان ئوسمان ئەركزات


ئاخشىمى دەرىزەڭنى چېكىمەن يار،
ھوجراڭدىن ئاڭلىيالماي  تونۇش سادا.
چىشلەيدۇ پاچىقىمنى  غالجىر ئىتىڭ،
رازىمەن مەيلى بولاي مېيىپ-ناكا.

شۇنچە يىل سەۋرى بىلەن كۈتتۈم سېنى،
چىدىدىم ھىجران ئاتلىق تايىقىڭغا.
ئالۋۇندەك ئۆتۈپ قالساڭ يىقىلارمەن
جانانىم  سەۋرى بويۇڭ -ئايىقىڭغا.

گۈل پەسلىم تالىق ئىدى ۋىسالىڭغا،
قىرانلىق يەتتى ئەمدى يېشىم ھالقىپ.
ئەقىدەم پارلاپ تۇرار دىل خانەڭدە،
زەر قۇياش چىقسا تاڭدا  ئۇپۇق بالقىپ.

كۆيمىدىڭ باشقىلارغا، ھەتتا ماڭا ،
ئەگەشسەم سايەڭ بولۇپ، قوغلىمىدىڭ.
توۋا دەي! ئوتلۇق بېقىپ بۈگۈن يەنە ،
يۈرىكىم-دىل ئەركىمنى ئوغۇرلىدىڭ.

چىن سۆيگۈم  رەت قىلىندى تالاي-تالاي،
يېگانە  ياشاۋەردىڭ ماڭا ئوخشاش.
ئەقىدە جاملىرىدا  سۇنىمەن قەدەھ،
سامادا پارلاپ تۇرسا ئالتۇن قۇياش.

ۋەسلىڭسىز تەنھا ياشاپ ئۆتتى ئۆمرۈم،
ئەقىدە گۈلخانلىرىم ئۆچمىدى ھەم.
بوينىمىز ئېگىلمىدى سۆيگۈ تىلەپ،
يۈرەكلەر ئىنتىلسىمۇ بولۇشقا جەم.

دىل بايان قىلالىسام  داۋان ئاتلاپ،
ناز بىلەن  كۈلۈپ باقار  ئىدى ئىقبال.
ئىزتىراپ پارىلىدى يۈرىكىمنى،
تىللىرىم ھىجرانىڭدا  تۇتۇلدى-لال.

سامادا سۆيگۈم قۇشى قاقسا قانات،
چاڭقىغان  يۈرەكلىرىم كېتەر يايراپ.
ۋەسلىڭسىز ئۆمۈر بېغىم خازان گويا،
چۆللەرگە ئوخشاپ قالدى زاغلار سايراپ.

دىل ئەركىم مەھكۇم بولدى  پىراقىڭىغا،
ۋىسالىم بۇلبۇللىرى چەكتى پەريات.
شۇم ھىجران لىباسلىرى يايدى ئېتەك،
يىگانە  تۇرمۇشۇمدىن دېدىم:«ۋاي،دات..»

     ***   ***   ***

نىھايەت، ئەۋزەل كۆردۈم تەنھالىقىنى،
تويلۇشۇپ جېدەل-غەليان كۆتۈرۈشتىن.
خۇمارى تۇتسا يايراپ- ئىچىپ شاراپ ،
مەستلىكى يېشىلسىلا ئۆكۈنۈشتىن.


1989-يىل باھار، قەشقەر

ئەلتۈرگ

نەقەدەر ھىكمەتكە تۇيۇنغان يازمىكەن ! ياشلىقتىكى ھىكمەت ئوخشمامدۇ؟!

ئەزھەر36

ھايات ھىكىمەتلىرىڭىز ناھايىتى ياخشى چىقىپتۇ ، قەلىمىڭىزگە بەرىكەت تىلەيمەن .

نۇرلان

ئەرك زاد ئەپەندىمنىڭ قەلىمى يەنىمۇ ئۆتكۈر بولغاي.

نەۋرۇز

شىئېرىڭىز تەبئى ھېسياتتا يېزىلىپتۇ. تەكلىۋېم : -  شىئېرى تىل ئىشلىتىشكە دىققەت قىلغان ئاساستا يېزىڭ. شىئېردا ئادەتتىكى سۆزلەر بەك كۆپ بوپ كەتسە شىئېرنىڭ ئويناقلىقىغا نوقسان يېتىدۇ.