ئويلىما--- نۇرىيە ئېلاخون

muhemmed

                         ئويلىما
                    نۇرىيە ئېلاخون
تۇغۇلدۇڭمۇ دۇنياغا ئۆلۈممۇ بار بىر كۈنى،
بۇ تەبىئەت ھۆكۈمىدىن قاچىمەن، دەپ ئويلىما.
ئەجەل يەتسە خوشلاشماي، ھەددىڭ ئەمەس ھاياتتىن،
بۇ دۇنياغا تۈۋرۈك بوپ قالىمەن، دەپ ئويلىما.

تۇرمۇش يولى مۇرەككەپ، داۋانلىرى ئاز ئەمەس،
ئويناپ يۈرۈپ بۇ يولنى باسىمەن، دەپ ئويلىما.
ئەجىر قىلماي، تەر تۆكمەي، ھالاۋەت يوق جاھاندا،
ئۈجمە پىشسا ئاغزىمنى ئاچىمەن، دەپ ئويلىما.

ھەممە ئىشقا پەم كېرەك، ئىلىم-ھېكمەت، پەن كېرەك،
شۇ ئاچقۇچسىز تىلسىمنى ئاچىمەن، دەپ ئويلىما.
جاپا چەكمەي تېرىشماي، ھەييار بولۇپ تەييارغا،
چىقىپ قالسا سورىقى قاچىمەن، دەپ ئويلىما.

ئۆمۈر گويا ئاتقان ئوق، قايتماس ھەرگىز كەينىگە،
ئۇچقۇر يوللار يولىنى توسىمەن دەپ ئويلىما.
ئىنسان ئۈچۈن بىر كىلىپ، بىر كېتىدۇ ھاياتلىق،
بۈگۈن كەتسەم ئەتە كېپ ياشايمەن، دەپ ئويلىما.

ۋاقىت شۇنداق رەھىمسىز، بىلمەس مىھرى-شەپقەتنى،
چىڭ تۇت ئۇنى،خام-خىيال دەرياسىنى بويلىما.
تۇتماي تۇرۇپ ۋاقىتنىڭ تىزگىنىنى قولۇڭدا،
سەن ئۇنىڭدىن ئىلتىپات كۈتىمەن دەپ ئويلىما.

(شىنجاڭ گېزىتى 1999-يىلى 2-فېۋرال سانىدىن)
2012.1.3.2

ئەركان

ياخشى يېزىلغان شېئىر ئىكەن.

نۇرلان

مەرھۇمە نۇرىيە ئېلاخۇن ئاياللىرىمىز ئىچىدىكى ئاز يازىدىغان، ساز يازىدىغان قەلەمكەشلىرىمىزنىڭ بىرى ئىدى...
تېما يوللۇغۇچىغا رەھمەت.

نەۋرۇز

مەرھۇمنىڭ يازمىسى بىلەن يەنە ئۇچراشقىنىمدىن خوش بولدۇم. رەھمەت ياخشى تېما يوللاپسىز.

Ayshemgul

ئىنكاسلاردىن ئەپسۇسلىنىش ئىچىدە ئاپتور ھەققىدە ئەڭ دەسلەپكى ئۇچۇرلانى ئىگەللەپ ئولتۇرۇپتىمەن. بۇ شېئىرىنى ناھايتىمۇ ياقتۇردۇم رەھمەت، شۇنچە ئېسىل شېئىرنى ئوقۇۋالدىم. ھەربىر كوپلىت،  ھەربىر مىسراسى ئادەمنى ئويلاندۇرىدىكەن، ئويغىتىدىكەن.

ئەزھەر36

يەنە بىر ئېسىل يازمىڭىزغا مۇبارەك بولسۇن .