مائارىپ نامراتلىقنى تۈگىتىشنىڭ ئاچقۇچى
خالىدە ئوبۇل
يېقىنقى يىللاردىن بۇيان، ئاپتونوم رايونىمىز ئالاھىدە ئىش ئورنى ئوقۇتقۇچىلىرىنى قوبۇل قىلىش سالمىقىنى ئاشۇرۇش، پېداگوگىكا مەكتەپلىرىدە ھەقسىز ئوقۇيدىغان ئوقۇغۇچىلارنىڭ سانىنى كۆپەيتىش ئارقىلىق يېزا مەكتەپلىرىدە ئوقۇتقۇچى كەمچىل بولۇش مەسىلىسىنى مەلۇم دەرىجىدە ھەل قىلىپ، شەھەر، يېزا مائارىپىنىڭ تەكشى تەرەققىياتىغا كاپالەتلىك قىلىشتا تىرىشچانلىق كۆرسەتتى. لېكىن ئوقۇتقۇچىلار قوشۇنىنىڭ تۇراقلىق بولماسلىقى، بولۇپمۇ يىراق يېزا، قىشلاقلاردا يەنىلا ئوقۇتقۇچى يېتىشمەسلىك، مۇنەۋۋەر ئوقۇتقۇچىلارنى تۇتۇپ قالالماسلىق مەسىلىسى ھېلىھەم مەۋجۇت. بۇ بىۋاسىتە مەجبۇرىيەت مائارىپىنىڭ تەكشى تەرەققىياتىغا تەسىر كۆرسەتمەكتە. بۇ خىل ئەھۋال تۆۋەندىكى بىر قانچە تەرەپلەردە ئىپادىلىنىۋاتىدۇ:
بىرىنچىدىن، تەكلىپلىك ئوقۇتقۇچىلارنىڭ ئىستېپا بېرىشى، توختام ۋاقتى توشمايلا مەكتەپتىن كېتىپ قېلىشى سەۋەبلىك ئوقۇتۇش ئىشلىرى مەلۇم دەرىجىدە تەسىرگە ئۇچرىماقتا. ئىككىنچىدىن، زور كۈچ ۋە ۋاقىت سەرپ قىلىپ، تەربىيەلەپ چىقىلغان غوللۇق ئوقۇتقۇچىلار تەمىناتتىكى پەرق تۈپەيلى شەھەردىكى مەكتەپلەرگە، شەھەر ۋە بازارلاردىكى ئوقۇتقۇچىلار چوڭ شەھەردىكى مەكتەپلەرگە يۆتكىلىپ كەتمەكتە.
شىنجاڭ ئۇيغۇر ئاپتونوم رايونلۇق 12 – نۆۋەتلىك خەلق قۇرۇلتىيىنىڭ 4 – يىغىنىغا قاتنىشىۋاتقان ۋەكىللەر يۇقىرىقى مەسىلىلەرنى چۆرىدىگەن ئاساستا، قىممەتلىك پىكىر – تەكلىپلىرىنى ئوتتۇرىغا قويدى.
ۋەكىل ئەركىن ئۆمەر مۇنداق دېدى: ئاپتونوم رايونىمىزدا ئوقۇتقۇچىلار قوشۇنىنى كۈچەيتىش چارىسىنى ئوتتۇرىغا قويۇپ، ئوقۇتقۇچىلارنىڭ تەمىنات، ئۇنۋان، مۇكاپات قاتارلىق جەھەتلەردىكى باشقۇرۇشىنى مۇكەممەللەشتۈرۈپ، مۇنەۋۋەر ئوقۇتقۇچىلار قوشۇنىنى يېتىشتۈرۈشكە كۈچ سەرپ قىلسا.
ۋەكىل لياڭ چاۋ مۇنداق دېدى: جەنۇبىي شىنجاڭدىكى ئوتتۇرا، باشلانغۇچ مەكتەپلەرنىڭ قاتتىق دېتال ئەسلىھەلىرى يېقىنقى يىللاردىن بۇيان زور دەرىجىدە ياخشىلانغان بولسىمۇ، ئوقۇتقۇچى يېتىشمەسلىك، بولۇپمۇ تەجرىبىلىك ئوقۇتقۇچىلار كەم بولۇش مەسىلىسى جەنۇبىي شىنجاڭنىڭ ئوقۇتۇش تەلىپىنى تولۇق قاندۇرالمايۋاتىدۇ. ھەر دەرىجىلىك خەلق ھۆكۈمەتلىرى تېخىمۇ كۆپ كۈچ سەرپ قىلىپ، جەنۇبىي شىنجاڭدىكى ئوتتۇرا، باشلانغۇچ مەكتەپلەرنىڭ ئوقۇتۇش سۈپىتىنى يۇقىرى كۆتۈرۈشكە تۈرتكە بولسا.
ۋەكىل خەيرىگۈل، ۋۇشەن مۇنداق دېدى: جەنۇبىي شىنجاڭدىكى ئوقۇغۇچىلارنىڭ ‹‹قوش تىل›› مائارىپى خىزمىتىگە تېخىمۇ ئەھمىيەت بېرىشى لازىم. نۆۋەتتە، جەنۇبىي شىنجاڭدا ئوتتۇرا، باشلانغۇچ مەكتەپلەردە ‹‹قوش تىل›› ئوقۇتقۇچىسى كەم بولۇش سەۋەبلىك، ‹‹قوش تىل›› مائارىپى تەسىرگە ئۇچراۋاتىدۇ، شۇڭا، قوش تىل ئوقۇتقۇچىلىرىنى تولۇقلاشقا ئەھمىيەت بېرىلسە.
ۋەكىل رەيھان ماخمۇت، لىن ۋېي مۇنداق دېدى: مائارىپ ئىشلىرىنى زور كۈچ بىلەن راۋاجلاندۇرۇش نامراتلىقنى ۋە قالاقلىقنى تۈگىتىشنىڭ تۈپ ئۈنۈملۈك يولى، ھەر دەرىجىلىك خەلق ھۆكۈمەتلىرى ئوقۇتۇش قاتتىق دېتال ئەسلىھەلىرى، ئوقۇتقۇچىلار قوشۇنى ۋە ئوقۇتۇشنى باشقۇرۇش قاتارلىق جەھەتلەرگە يۈكسەك ئەھمىيەت بېرىپ، شىنجاڭنىڭ مائارىپ سەۋىيەسىنى يۇقىرى كۆتۈرۈشكە تېخىمۇ كۈچ سەرپ قىلسا، چەت – يىراق رايونلاردىكى مەكتەپلەرگە قارىتىلغان قۇرۇلۇش تۈرلىرىنىڭ ئەمەلىيلىشىشى ئىلگىرى سۈرۈلسە. | 
شۆھرەت
تۆھپە
تىللا
قىزغىنلىق
ۋاقتى: 2016-1-18 22:52:58
