| ئۈچ غەزەل
ئەخمەتجان تۇرۇپ بەگتۈ*رك
ئاشىق سەپىرى
ئىشىق سەھراسىدا گۈ-گۈر كۆيۈپ كەلدىم داۋا ئىزدەپ ،
سۈزۈك تاڭلارغا تاشلاندىم شىپالىق ساپ ھاۋا ئىزدەپ .
قويۇپ چۆللەرگە ئوت گاھى غېرىپتەك بوزلىدىم نەچچە ،
مېنىڭدەك بىناۋالارغا يېقىملىق كۈي ناۋا ئىزدەپ .
قىزىلگۈل بەرگىگە تامغان سۈزۈك ياشنى سۆيۈپ ئۆتتۈم ،
چېچى بوستان ، دىلى ۋۇلقان ، لېۋى قان-قان سابا ئىزدەپ .
زىمىستان پەسلىدە گۈلگۈن تېنىم چوغدانغا ئايلاندى ،
يۈرەكلەر تەكتىدىن قايناپ ئېقىپ تۇرغان لاۋا ئىزدەپ .
گۈلى سۇنغان دالالارغا مۇھەببەتتىن ئۇرۇق چاچتىم ،
شىۋىرغان سوقسىمۇ ئۆچمەس قۇياش يەڭلىغ جۇلا ئىزدەپ .
سۈكۈت تولغان قىيالاردا ئېتىمنىڭ كىشنىشى قالدى ،
قورام تاشلارنى ئۈن قىلغان قاناتلىق شوخ سادا ئىزدەپ .
ئۆمۈرنىڭ ئۆركىشى بەلكىم يەنە ئوتلارنى ئۇلغايتار ،
ۋىسال قۇچماق ئۈچۈن بىر كۈن سۆيۈملۈك جان پىدا ئىزدەپ .
دىلبەرگە مەكتۇپ
بىلىپ بولماس ئاچاللاردا كۈتەرسەنمۇ مېنى دىلبەر ،
ئىشىق سەھراسىدا ئىزدەپ يۈرەرسەنمۇ مېنى دىلبەر .
پۇرۇقلاپ قاينىسام دائىم مۇھەببەتنىڭ ئوچاقىدا ،
بىلەلمەستىن يىراقلارغا سۈرەرسەنمۇ مېنى دىلبەر .
تېنىمنى يالمىشىپ سەۋدا مېنى ساتتى قۇمۇشلارغا ،
ھىلالغا بىر نىگاھ تاشلاپ كۆرەرسەنمۇ مېنى دىلبەر .
قۇيۇنلار ئوۋلىغان سايدا غېرىپتەك تالجىقىپ ياتسام ،
كېلىپ بىر لەھزە باغرىڭغا بۆلەرسەنمۇ مېنى دىلبەر .
نىتەي دوستلار ئىكەن مۈشكۈل ئازاپ يۇتماي ۋىسال قۇچماق ،
يۈرەكنىڭ تەكتىگە شۇڭغۇپ سۆيەرسەنمۇ مېنى دىلبەر .
نورۇزنامە
سۆيۈپ قويغىن مېنى نورۇز چېچەككە ئايلىناي ئەمدى ،
قۇياشنىڭ باغرىدىن تامغان گۆدەككە ئايلىناي ئەمدى .
سېنى كۈتمەك بىلەن روھىم ئازاپ پەنجىدە قىرچىلدى ،
قىياقلار جىلمىيىپ ئۆسكەن چۆنەككە ئايلىناي ئەمدى .
ئېمىپ تەپتىڭنى يۈكسەككە ھامان قونماقنى ئىستەيمەن ،
ئىچۈرگىن بىر قەدەھ جۈرئەت پىلەككە ئايلىناي ئەمدى .
ھارارەت چاچمىسام سەندەك خىلى مەن قايسى ئەركەكنىڭ ؟
جاھانغا ئوت سۇنۇپ بەرگەن يۈرەككە ئايلىناي ئەمدى .
يېلىنجاپ تۇرسا شەيدالىق لېۋىمگە تامچىغاي يالقۇن ،
جۇدۇننى دان قىلىپ يۇتقان تىلەككە ئايلىناي ئەمدى .
|
|
شۆھرەت
تۆھپە
تىللا
قىزغىنلىق
ۋاقتى: 2015-11-15 18:43:55
ۋاقتى: 2015-11-15 20:04:31
