| ئوغرىلاپ كېلىنگەن مۇھەببەت
ئۇمۇ باشقا بالىلارغا ئوخشاش ئاپىسىدىن بەك قورقاتتى. مەيلى ئۇنىڭ ئىپادىسى قانچە ياخشى ياكى نەتىجىسى قانچە ئەلا بولۇشىدىن قەتئىينەزەر ، ئاپىسى چىش يېرىپ بىرەر ئېغىز ماختاپ قويمايتتى. نەچچە قېتىم ساۋاقداشلىرىنىڭ ئۆيىگە بېرىپ، ساۋاقداشلىرىنىڭ ئاتا- ئانىسىنىڭ بالىلىرىنى ماختىغانلىقىنى ئاڭلىغىنىدا ، ئۇ تولىمۇ ھەۋەسلىنىپ كەتكەندى.
لېكىن ئاپىسى ئاغزى ئېچىلماس قۇتىدەك ، بىرەر ئېغىز سۆزنىمۇ ئارتۇق قىلىشنى خالىمايتتى ، ئەڭ كۆپ بولغاندا ‹‹ ھە››، ‹‹ھىم›› دېگەندەك سۆزلەرنىلا قىلاتتى.
بەزى ۋاقىتلاردا ئاپىسىنىڭ سۆزلىرى ئۇنىڭ يۈرىكىگە پىچاق بولۇپ سانجىلاتتى.
- ئىككىنچى بولغاننىڭ نىمىسى قالتىس ؟ سەنمۇ باشقىلارغا ئوخشاش بىرىنچىلىكنى تالاشساڭ بولمامدۇ؟
ئۇ ئاپىسىنىڭ ئاغزىدىن مېھىر- مۇھەببەتكە تەۋە ھېچقانداق سۆزنى ئاڭلاپ باقمىغاندى. شۇڭا ئۇ ئاپىسىنىڭ بۇ تەرپىنى زادىلا كەچۈرەلمەيتتى. ۋاقىت ئۇزارغانسېرى بالىنىڭ نەتىجىسى تۆۋەنلەپ ، ئۆزىمۇ كەم سۆز، مىسكىن بولۇپ قالدى.
بىر كۈنى ئاپىسى ئالىي مەكتەپتە بىللە ئوقۇغان ساۋاقدىشىغا خەت يېزىپ، بالىنى پوچتىخانىغا بېرىپ خەتنى سېلىۋېتىشكە ئەۋەتتى. يولدا كېتىۋېتىپ، بالا بىر خىل قىزىقىشنىڭ تۈرتكىسىدە خەتنى ئېچىپ ئوغۇرلۇقچە كۆردى. كۆرۈپ قاتتىق ھەيران قالدى. توپتوغرا ئۈچ بەت كېلىدىغان خەتنىڭ ھەممىسى ئۇنى ماختايدىغان سۆزلەر بىلەن تولغان ، ئاپىسى تىلغا ئېلىپ باقمىغان مېھىر- مۇھەببەتكە تەۋە سۆزلەر خەتتە ئون نەچچە يەردە تىلغا ئېلىنغاندى.
بالىنىڭ ياشلىرى يىپى ئۈزۈلگەن مارجاندەك تۆكۈلۈپ، خەتنى ھۆلدىۋەتتى، ئۇ خەتنى بىر نۇسخا كۆچۈرۋېلىپ ، ئارقىدىن ئەسلى پېتى كونۋېرتقا سېلىپ پوچتا ساندۇقىغا سېلىۋەتتى.
ئۇ كۆچۈرۋالغان خەت ئۇنىڭ ئەڭ قىممەتلىك بايلىقىغا ئايلاندى، ئۇ خەتنى ھەر كۈنى نەچچە قېتىم ئوقۇيتتى. قىيىنچىلىققا ئۇچرىغاندا ، ھېلىقى خەت ئۇنىڭغا كۈچ ئاتا قىلدى. ئۇنىڭ مىجەزى بارغانسېرى ئوچۇق- يورۇق، جانلىق بولۇپ، نەتىجىسىمۇ تىك سىزىق بۇيىچە ئۆرلەشكە باشلىدى. كىشىلەر ئۇنىڭدىكى ئۆزگىرىشنى كۆرۈپ قاتتىق قاتتىق ھەيران قالدى.
ئۇ ئىلگىرى ئاپىسىنى كۆرسە ، يات ئادەمنى كۆرگەندەك ئۆزىنى قاچۇراتتى. لېكىن ھازىر ئاپىسى بىلەن بىرگە بولۇشقا ئىنتايىن ئامراق بولۇپ كەتتى. نۇرغۇن يىللاردىن كېيىن ، بۇ بالا داڭلىق ئالىمغا ئايلاندى. ھېلىقى خەتنى ئۇ ھېلىمۇ يېنىدا ئېلىپ يۈرۈيدۇ، چەتئەللەرگە بېرىپ يىغىنغا قاتناشقاندىمۇ شۇنداق.
ئانىلارغا سۆز: ئادەتتە: ‹‹ مۇھەببەتنى داۋراڭ قىلىش ھاجەت ئەمەس، ئۇنى قەلبىمىزدە ساقلىساقلا بولدى ›› دەپ قارايمىز. لېكىن ئوتلۇق مېھىر- مۇھەببىتىڭىزنى سۆزلەپ، خەت قىلىپ يېزىپ ياكى ھەرىكىتىڭىزدە ئىپادە قىلىپ كۆرسىتىپ، بالىڭىزدىكى ئۆزگىرىشلەرگە دېققەت قىلىپ بېقىڭ . ئۇنىڭ قەلبى ئەڭ سەزگۈر راداردەك ، مۇھەببەتنىڭ سىگنالىنى دەرھال قۇبۇل قىلالايدۇ.
ھېلىقى بالا ناھايىتى بەختلىك ئىكەن، ھېلىمۇ ئۇنىڭ كەپسىز بولۇپ قالغىنى. ئۇ ئاپىسىنىڭ تاپىلاشلىرىغا قۇلاق سالماي، خەتنى ئېچىپ ئوغرىلىقچە كۆرۈپ، ئاپىسىنىڭ ماختىشى ۋە مۇھەببىتىنى ئوغرىلىۋالدى. بولمىسا ئۇ ئاپىسىنىڭ ئۆزىنى نەقەدەر سۆيىدىغانلىقىنى ، ئۇنىڭغا قانچىلىك زور ئۈمىد باغلىغانلىقىنى مەڭگۈ بىلەلمىگەن بولاتتى. بالىنى شەرتسىز ھالدا سۆيۈش ، ماختاش، ئىلھاملاندۇرۇش كېرەك.
مەنبە: ‹‹ ئانىلار بىلىشكە تېگىشلىك 101 ھېكايەت›› نامىلىق كىتاپتىن ئېلىندى.
|
|
شۆھرەت
تۆھپە
تىللا
قىزغىنلىق
ۋاقتى: 2014-1-3 15:39:28
ۋاقتى: 2014-1-3 16:55:06
ئىگىسى
بالىلارنى ئىلھاملاندۇرۇپ تۇرۇش كىرەك، دېگەن مەزمۇن چىقىۋاتمامدۇ دەيمە...
