بىر ئانىنىڭ قىزىغا قىلغان ئۈگۈت سۆزى

گۈلزار

بىر ئانىنىڭ قىزىغا قىلغان ئۈگۈت سۆزى

   ئاڭلا، داداڭ بىلەن ئىككىمىزنىڭ يۈرەك پارىسى، نازۇك چىمەنلەر ئىچىدىكى ئەڭ نازۇك گۈللەرنىڭ سەرخىلى بولغان گۈل سۈپەت قىزىم! سەن بىر قىزسەن، قىز دېمەك- مىللەتنىڭ كەلگۈسىدىكى ئانىسى دېمەكتۇر، مىللەتنىڭ كەلگۈسىدىكى ئانىسى بولغان ھەر بىر قىزدا چوقۇم لاياقەتلىك ئانا بولۇشقا تېگىشلىك بارلىق سۈپەتلەر ھازىرلانغان بولىشى كېرەك. _
   گۈل بەدەنلىك قىزىم! شۇنى بىلگىنكى، ئەدەپ -ئەخلاق ئىنساننىڭ ئەڭ گۈزەل سۈپەتلىرىنىڭ بىرى. ئەدەپ ۋە ئەخلاققا رىئايە قىلىش، ئۇنى ھەر ۋاقىت جارى قىلدۇرۇش ھەر بىر ئىنسانغا تولىمۇ مۇھىم ۋە زۆرۈر. بولۇپمۇ تەبىئىتىدىن تولىمۇ نازۇك، يۇمران، مېھرىبان كېلىدىغان ساڭا ئوخشاش قىزلارنىڭ كىشىلىك ئەدەپ -ئەخلاققا رىئايە قىلىشى ۋە كىچىكىدىن مۇشۇ جەھەتتىن مايىللاشتۇرۇپ تەربىيلىنىشى ئىنتايىن مۇھىم.  
  ئاڭلا، ئەي ئاي يۈزلۈك قىزىم! كۈندىلىك تۇرمۇشتا كىشىلەر بىلەن كۆرۈشكەندە، مۇئامىلە قىلغاندا گەپ -سۆزدە، ئىش -ھەرىكەتتە ئۇيغۇر قىزلىرىغا خاس مۇلايىملىق، ئىتائەتمەنلىكنى ئۆزۈڭگە يار قىلساڭ، ئۆزەڭنىڭ گۈزەل ئەخلاقىڭ، ئېسىل پەزىلەتلىرىڭ بىلەن كىشىلەرنى تەسىرلەندۈرسەڭ، يۈرىكىگە ئىسسىق ئۆتكۈزسەڭ، سەن بىلەن مۇئامىلە قىلغان كىشىلەرنىڭ قەلبىدە گۈزەل ئەسلىمىلەرنى قالدۇرالىساڭ، مانا بۇ سەن ئۈچۈن تېپىلغۇسىز بەخت ۋە ئامەتتۇر. شۇنى ئېسىڭدە چىڭ تۇتقىنكى، كىشىلىك دۇنيادا كىشىلەرنىڭ ھۆرمىتىگە ۋە ئىززەتلىشىگە ئېرىشىشتىنمۇ ئارتۇق ئامەت مەۋجۇت ئەمەس.  
ئاڭلا، ئەي پەرى سۈپەت قىزىم ! بۇ   دۇنيادا ئادەمگە خاس ئەدەپ -ئەخلاققا رىئايە قىلىپ ياشاش ھەر بىر قىز  ئۈچۈن ئىنتايىن مۇھىم. سەن  بىر قىزسەن،ئۆزۈڭنىڭ قىزلىق غورۇرۇڭ بىلەن ياشىيالىساڭ ئاندىن ئىززىتىڭ بىلەن ياشىغان بولىسەن، ئەتراپىڭدىكى يولدىن چىققان، شەرمى -ھايانى ئۇنتىغان قىزلارنىڭ ھالىغا بىر نەزەر سېلىپ باققىنا؟ ئۇلار بىردەملىك راھەت -پاراغەتكە، ئۆزىنىڭ ھېسسىياتىغا بېرىلىپ، كۆڭلىنىڭ كەينىگە كىرىپ، قىزلار ئۈچۈن ئەڭ مۇھىم بولغان ئىپپەت -نومۇسىدىن ئايرىلدى، بۈيۈك ئەخلاقى ۋە نومۇسىنى ئۆز قولى بىلەن دەپسەندە قىلدى. ئۇلارغا نەزەر سالساڭ، ئېرىشكىنىدىن يوقاتقىنى كۆپ بولدى، ئۆمۈر بويى پۇشايمان قاچىسىنى يۈدۈپ، ھەسرەت ئىچىدە ئۆتتى. مانا مۇشۇنىڭدىنلا ئەدەپ -ئەخلاقلىق بولۇش، ئىپپەت -نومۇسىنى ساقلاشنىڭ ئىنتايىن مۇھىم ئىكەنلىكىنى، ئەدەپ -ئەخلاقلىق بولۇش بىلەن ئەخلاقسىز بولۇشنىڭ كۆرىدىغان ئاقىۋىتىنىڭ قانچىلىك پەرقلىنىدىغانلىقىنى ئۆز كۆزۈڭ بىلەن كۆرۈپ يەتكەيسەن قىزىم!  
ئاڭلا، ئاي پەرى سۈپەت قىزىم! ئەدەپ -ئەخلاق دەرىخىڭنى ئوبدان پەرۋىش قىلىپ،تېخىمۇ ياشناتساڭ ياشناتقىنكى، ھەرگىز قۇرۇتۇپ قويما، ئۇنىڭ مۇھىملىقىنى بىر مىنۇتمۇ ئېسىڭدىن چىقىرىپ قويما، ئۇنىڭ قەدرىگە يېتىپ، ئۇنىڭدىنمۇ بىر مىنۇتمۇ ئايرىلماي ياشىغىن. بۇ دۇنيانىڭ خوشاللىقلىرىنى، بەخت -ئامەتلىرىنى، گۈزەللىكلىرىنى ئۆزۈڭنىڭ ئەدەپ -ئەخلاقىڭدىن ئىزدە!

مەنبە « پەزىلەت غۇنچىلىرى سۆز » دىن

دىلرۇس

قىزدىكى پەزىلەت، ئاتا- ئانا تەربىيسىنىڭ مىۋىسى ھەم ئاتا- ئانا پەزىلىتىنىڭ كامالىتىدۇر. قىزلارنى پەزىلەتلىك قىلىپ تەربىيلەش، ئاددىي قىلىپ ئېيتقاندا، شۇ قىزنىڭ كەلگۈسى تۇرمۇشىنىڭ خاتىرجەملىكى دېگەنلىكتۇر. بۇ تېمىدىكى ئانا ئۆگىتلىرى بارلىق قىزلىرىمىزغا قىلىنغان ئۆگىت بولۇپ، بىزنىڭ ئەستايىدىل مۇئامىلە قىلىشىمىزغا ئەرزىيدۇ.
تېمىڭىزغا رەھمەت ئۇستاز.

pari

ئوقۇپ ئۆز ئەمىليىتىمىزگە تەدبىقلاپ باقساق بولغۇدەك رەھمەت خانقىز ھارمىغايسىز !!