مۇئەللىم

ئادىل10

مۇئەللىم  ئۇ _ بىرلا چېلەك سۇلا ئەمەس ،
ئۇ بىر شېشە غايىپ تەملىك  كۇلا ئەمەس .
ئۇ ئەمەلىي بىر تىرىك جان ، ئۇ _ ئىسلاھات،
ئۇ_  ئۆزگىرىش،ئۇ _ يېڭىلىق ،< كونا > ئەمەس.
مۇئەللىم ئۇ _ نازۇ - نېىمەت، ئۇ _ داستىخان ،
ئېچىلىدۇ  مېھمان دىمەي ، سائىللارغا .
ئۇ ساداقەت تانكىسىدىن ئوت ئاچىدۇ،
مەرىپەتنى كۆرەلمىگەن خائىنلارغا .
ئۇ سەھەرنىڭ گۈلخىنىغا ئوت ياققۇچى،
مۇئەللىمنى ئىنژىنىرغا ئوخشاتماڭلار،
ئۇ ئىگىلمەي كۈنگە قاراپ تىك ئۆسىدۇ،
قالايمىقان يىلتىزىنى يۇمشاتماڭلار !
ئۇ ئەسلىدە بالىجانلىق قارلىغاچتۇر،
ئۇ ئۇچۇرما پەسلىگىچە توختىمايدۇ.
مۇئەللىمگە تەۋە ئەسلى < جىننىس > رېكۇت،
ئۇ ئېھتىمال چارەك ئەسىر ئۇخلىمايدۇ.
مۇئەللىمنى پىخسىق دىمە ، ئاغزىڭغا تاش !
ئۇنىڭ سېخي ھالىتىنى مۇنبەردە كۆر .
ئۇ بىخلانغان سەمىيمىلىك ئۇرىقىدۇر ،
ئۇنىڭ ئاددىي قامىتىنى ھەر يەردە كۆر!
مۇئەللىم ئۇ_  ئەمەلدارنىڭ نۆل سىزىقى ،
ئورۇندىقى تەققاس ئەمەس كىرىسلوغا .
شېرىن پۇراق شەرەتلەرگە سۈكۈت قىلار،
ئامراق ئەمەس كۆڭۈلگە ئوت سېلىشلارغا .
ئۇ ئەسلىدە بىر مىللەتنىڭ ئاشپىزىدۇر ،
توق تۇرىدۇ ئۇ بولغاچقا ئەۋلاتلىرى.
ئۇ يىغمايدۇ ، بەلكى بېرەر مىللەت ئۈچۈن ،
بازار نەرقى ئەمەس ئۇنىڭ بايلىقلىرى .
مۇئەللىمنى شام دىگەنلەر . كەچۈرىڭلار ،
ئۇ شۇنچىلا ئاددي كۆيۈپ ئۆچەمدىكەن ؟
چۈجىلەرنىڭ ئەڭ مېھرىبان ئانىسى ئۇ ،
ئەتە ئۈچۈن دان تاتلىماي كېتەمدىكەن ؟
مۇئەللىمنىڭ كىگىز ئۆيى - دەل ئىشخانا ،
ساقلىماقتا تاپشۇرۇقلار ،تەييارلىقلار ،
چاچالمايدۇ دىققىتىنى قەلەم تۇتسا ،
قىززىقتۇرماس مىڭ  بىھۇدە ھەييارلىقلار .
مۇئەللىمنىڭ كۆز يېشىنى كىم كۆرۈپتۇ ،
ئۆكسۈپ –ئۆكسۈپ يىغلاپ قويار پىنھانلاردا .
ئۇ دەريادەك  يۈرىكىنى يېرىپ  كۈندە ،
سۈزۈك سۆيگۈ باشلاپ كېلەر ھەر دىللارغا .
مۇئەللىمنى ‹ ئەخمەق› دىگەن ‹ چوڭ ئەخمەق ›تۇر ،
بالىسىنى تېپىپ قويۇپ  ‹بولدى›  دىگەن .
شۇبالىنى ‹ ئەركە تاي › دەپ  سۆيۈپ تۇرۇپ
يەنىلا شۇ مۇئەللىملەر ئازار يىگەن !
مۇئەللىمنىڭ مائاشى بار ، ‹بەرىكەت › لىك ،
لىكىن ئايلار    ئارىسىنى ئۇلالمايدۇ .
سودا قىلىپ يۈرگەن ئەركە بايۋەتچىلەر ،
كوچىدىكى مۇئەللىمىنى تونالمايدۇ !
مۇئەللىمنىڭ بارغۇسى بار توي – تۆكۈنگە  ،
ئېچىلىپ ئۇ  كاپام پولۇ يىگۈسى بار .
بازارلاردا ماركا تاللاپ ئېسىل كىيىم
باشقىلاردەك ئۇنىڭمۇ بىر كىيگۈسى بار ،
ئۆيىدىكى غەملىرىنى سانىمايلى ،
ھېيت – بايرامدا ساڭزا – قۇيماق سالالامدۇ؟
كۆرپە سېلىپ ئىسسىققىنە تاماق ئېتىپ ، ،
ئانىسىنىڭ رازىلقىنى ئالالامدۇ؟
ئىككى بالا تەلمۈرىدۇ  دەرۋازىغا ،
يىغىنىدىن قايتىپ كەلدى مۇئەللىممۇ ،
ئۇ ئالدىراپ پۇسۇققىدە دىمەيدىكەن ،
‹پۇت – قولۇمنى سۇنۇپ راھەت سۈرەرمەنمۇ ›
مۇئەللىمنىڭ كېسىلى يوق ، زوكامى بار ،
ئۇ بالنىستا يېتىپ قېلىپ ئاغرىمايدۇ .
ئۇ سائەتلىك ئوكۇل بىلەن ئوڭشالغاچقا ،
ئىلمىي مۇدىر ئەنسىرمەيدۇ ، ئاغرىنمايدۇ.
ئۇنى چۆيۈن يۈرەك دىسەم ، ئالايماڭلار ،
ئۇ ئالدىراپ خىزمىتىدە داتلاشمايدۇ .
تەنقىد بىلەن جازالارغا كۆنۈك تۇرسا،
كەسىپى بىلەن ئۇ ئالدىراپ ياتلاشمايدۇ.
مۇئەللىمنى زەرەتلىگۈچ دىدىم ، چاخچاق ،
ئۇ ھەر قانداق  تاقاق دىلنى زەرەتلەيدۇ .
ئۇنىڭ شۇنچە  تۆھپىلىرى مەۋھۇم بولغاچ ،
پەقەت ئۇنى شائىرلارلا سۈرەتلەيدۇ .
مۇئەللىملىك كەسپىمنى بەك قەدىرلەيمەن ،
مەيلى خەقلەر مېنى پىخسىق ،نادان دىسۇن ،
پەرۋايىم يوق ! ماڭقۇرۇتلار ھېساپ ئەمەس ،
‹سەن ئىشلىمە › ، دىگەن سۆزنى دادام دىسۇن !
‹مۇئەللىمنى سۆيۈش›  دىگەن تام دوسكا بار ،
ئۇ تامدىكى ئۇلۇغلارغا سۆزلەپ تۇرار .
ئۇ مائارىپ ئۈچۈن بولار‹  ئادەم كۆۋرۈك ›
ئۇ بىر  يىراق ئۈمۈدلەرنى كۆزلەپ تۇرار .
مۇئەللىمگە  ‹رەھمەتۇف ›نىڭ  كېرىكى يوق ،
ئۇ ساداقەت ئۇرىقىنى كەڭ چاچىدۇ .
قاناتلىرى يېتىلگەندە ئەۋلاتلىرى ،
سېغىنغاندا قۇچىقىنى كەڭ ئاچىدۇ.
مۇئەللىمنىڭ جەمىيەتتە بەك ھۆرمىتى بار ،
سەھنىلەردە  گۈل قۇچاقلار  مۈكچەيگەندە .
تاتلىق جېنى كېپىنەك بوپ چىقىپ كېتەر ،
بىرەرسى كېپ سۈيۈپ قويسا ئۈمچەيگەندە .
بىر سېغىنسا  تۇيغۇسىدا مۇنبەرلەرنى
مۇئەللىمنىڭ كۆزئەينىكى تورلاشمايدۇ،
كىتاپ بىلەن بور توزانى ئەركىلىسە ،
باشقا كەسىپ بۇ ئىشلارغا قولاشمايدۇ .
ئەي، مۇئەللىم، ئايىقىڭىزنى مايلىتامسىز؟
رەھمەت  بالام ، مايلامچىلىق مېنىڭ كەسپىم .
نادانلىق ۋە خۇراپاتنى سېزىپ قالسام ،
غۇرۇرم بەك تېز ئۆرلەيدۇ ، مۇشۇ ئەيپىم  .
بارمىقىڭنى چىشلىۋەتكىن ، سۆزۈڭ خاتا ،
مەن مۇئەللىم ، يەنە قانداق پەتىۋا بار ؟
مىڭ شەرەپلىك ئەنئەنە بار بۇ دۇنيادا
مۇئەللىمدەك ئەڭ قىممەتلىك ئەتۋار بار !!!
ئابلەت مۇھەممەت شېئىرى
سەھرايى كۆلبەم : توققۇزتارا

دىلكەش

ياخشىي يېزىلغان شىئىركەن.

pari

مۇئەللىمنى ياخشى تەرىپلەپسىز رەھمەت .

سەييارە0

مۇئەللىمدەك ئەڭ قىممەتلىك ،كىشلەر سۇيۇندىغان ئادەم بولمىسا كىرەك.

زەھرا

ۋاھ ...بۇ شىئىرىڭىزنى ئوقۇپ شۇنداق ھاردۇقۇم چىقىپ قالدى،رەھمەت سىزگە.

قەسىر

ئەڭ...ئەڭ ئوبرازلىق- جانلىق يېزىلىپتۇ،ئېسىل....ئېسىل.......!

گۈلزار

ئۇ سەھەرنىڭ گۈلخىنىغا ئوت ياققۇچى،
مۇئەللىمنى ئىنژىنىرغا ئوخشاتماڭلار،
ئۇ ئىگىلمەي كۈنگە قاراپ تىك ئۆسىدۇ،
قالايمىقان يىلتىزىنى يۇمشاتماڭلار !
ئۇ ئەسلىدە بالىجانلىق قارلىغاچتۇر،
ئۇ ئۇچۇرما پەسلىگىچە توختىمايدۇ.
مۇئەللىمگە تەۋە ئەسلى < جىننىس > رېكۇت،
ئۇ ئېھتىمال چارەك ئەسىر ئۇخلىمايدۇ.

ھەقىقەتەن ئوبرازلىق ئوخشىتىش بولۇپتۇ . ئوقۇتقۇچىلىق خىزمىتىنى ياخشى كۆرگەنلىكىمدىنمۇ ، ئوقۇتقۇچىلار تەرىپلەنگەن ئەسەرلەرنى كۆرسەم ۋۇجۇدۇم كۈچكە تولىدۇ . رەھمەت سىزگە

艾尼。艾买提

پاھ  بۇ شىردىكى ئوخشتۇشلارنى نىمانداق پاسەھەتلىك ھە؟ناھايتى ياخشى يېزىلپتۇ .

خۇمارى

مۇئەللىمنىڭ كېسىلى يوق ، زوكامى بار ،
ئۇ بالنىستا يېتىپ قېلىپ ئاغرىمايدۇ .
ئۇ سائەتلىك ئوكۇل بىلەن ئوڭشالغاچقا ،
ئىلمىي مۇدىر ئەنسىرمەيدۇ ، ئاغرىنمايدۇ
ئەگەر ياتسىمۇ ئەشۇ كىسەل كارۋىتىدا،
پەرزەتلەرنى ئويلاپ بىردەم كۆزيۇممايدۇ.
دەرسىم كىيىن قالدى باللار قانداق قىلار
بالىلاردىن ئۆزگىنى ئۇ ئويلىمايدۇ.
شۇنداق ياخشى يېزىلغان شېئركەن مەنمۇ ئىلھاملىنىپ ،قەلەم تەۋرىتىپ قويدۇم ،تەسەۋۇرىڭىزنى ئەركىن قاتلاندۇرۇپ ھەقىقى ئۇقۇتقۇچى ئوبرازىنى يارتىپسىز .سىزنىڭ قەلىمىڭزگە بەرىكەت تىلەيمەن.

دىلرۇس

مۇئەللىمگە پىچىلغان تون، قائىدە- تەرتىپ،
باشقىلارغا پىچىلمايدۇ، تىكىلمەيدۇ.
مۇئەللەمنىڭ مېھنىتىدەك، ئۇلۇغ مېھنەت،
باشقىلاردىن تېپىلمايدۇ- تېپىلمايدۇ.
مەنمۇ ئۆزەمنى بېسىۋالالماي قاملاشمىغان بولسىمۇ بىر كەلىمە قوشۇپ قويدۇم. شىئېرىڭىزدىكى مۇئەللىم ئوبرازى تۇمۇرلىرىمدىكى قانلىرىمغا قوشۇلۇپ، لەززەتلىك بىر بوشلىققا ئېلىپ چىقتى. بۇ بوشلۇقتا مۇئەللىم دۇنيادا نېسىپ بولىدىغان ھەممە نەرسىسىنى ماڭا ئىككى قوللاپ سۇندى، مەن ئۇنىڭ ھىممىتىدىن ئىككى دۇنيالىق پاراغەتنى بەھۇزۇر سۈرىۋالدىم. بۇ مەن ئىرىشكەن ھالىلات. بەركەتلىك قەلىمىڭىزگە ئۇتۇقلار يار بولسۇن.