ئاياللارغا مۇراجەت (مۇزاتى)

مۇزاتى

ئاياللارغا مۇراجەت

(قىسمەن ئاياللارغا تەقلىد)

مەخمۇت ئاۋۇت(مۇزاتى)

ئايالدۇرسەن مىللەت ئانىسى،
بولالامسەن مىللەتكە ۋەكىل؛
ئەجدادىڭنىڭ ئىزىدىن باسقىن،
باردۇر سەندە بۇنچىلىك ئەقىل؟!

مىللىيلىكنى دېمىگىن«مەتۇ»،
مىللىتىڭدىن چانغىنىڭمۇ بۇ؛
قاراپ باققىن ئەينەككە بېرىپ،
سەنمۇ مىللىي،ئەسلى ئۇيغۇرغۇ؟

چىمەن دوپپا،ئۇزۇن چاچ بىلەن،
ئىدى قوشماق، ئاچا-سىڭىلدەك؛
ئۇلار بولدى نەلەرگە غايىپ،
يوقالمىسۇن نەسلىڭمۇ بىردەك.

يارىشاتتى خويمۇ ئۇزۇن چاچ،
كېسىۋەتتىڭ ئۇنى نە ئۈچۈن؛
قالدىمۇ يا ئەرلەر ياراتماي،
ئەركەك شىردەك ياساندىڭ يوچۇن.

بوياپ چاچنى قىزىل-سېرىقتا،
غەرىبلىككە قىلدىڭمۇ ھەۋەس؛
يارىماقچى بولساڭ ئۇلارغا،
ئۇيغۇر پېتى بار يېنىغا، بەس!

«ساپ مەدەنىي» بولغىنىڭمۇ بۇ،
كىيىپ كالتە،كاسساڭنى ئېچىپ؛
ئەمەسمۇ سەت ئەجدات ئالدىدا،
ئەن-ئەنەڭدىن كەتسەڭ گەر تېبىپ.

سېتىۋەتمە ۋىجدان-غۇرۇرنى،
«سۆلىتىڭ»نى بازارغا سېلىپ؛
يوقاتمىغىن ئۆز خاسلىقىڭنى،
يات قەۋىمدىن ئۈلگىلەر ئېلىپ.

بارغۇ بىزدە خاسلىق، قىياپەت،
غەرىبچىنى كۆچۈرمىسەكمۇ؛
لايىقىدا بولسا تۇرقىمىز،
تۇنار ئەجدات ئۆلۈپ كەتسەكمۇ!

نارسىدەڭنى ئۆزەڭگە ئوخشاش،
«شىر »سىياقتا ياسىما ئەمدى؛
ئۇدۇن بولۇپ قالمىسۇن ئاڭا،
ئۇ مىللىتىم بىخى،ئۈمۈدى.

دېمەڭ ئۇنى تاشقى قىياپەت،
ئىچكى دۇنيا شۇنىڭدىن ئايان؛
بولسا نابۇت مىللىي خاس،غۇرۇر،
بۇنى تىلدا قىلماق تەس بايان...

مەنبە: ئۆز ئىجادىيىتىم.

ئىلغار

ياخشى شېئىر ئىكەن، قىزلارغا بىر قېتىملىق تەربىيە بوپتۇ ،رەخمەت سىزگە ئەپەندىم

زەپەر

مەزمۇنى بەك ياخشىكەن . قىز - ئاياللارغا ياخشى مەسلىھەت بۇلۇپتۇ .   ھەر بىر ئايال چۇقۇم كۈرشى زۈرۈلكەن

مەرزىيە

مىللىيلىكنى دېمىگىن«مەتۇ»،
مىللىتىڭدىن چانغىنىڭمۇ بۇ؛
قاراپ باققىن ئەينەككە بېرىپ،
سەنمۇ مىللىي،ئەسلى ئۇيغۇرغۇ؟
بۇ مىسرالار ماڭا بەك ياقتى،رەھمەت سىزگە .مەن باشقىلارنىڭ مىنى ‹‹مەتۇ ››دىيىشىدىن قورقمايمەن،چۈنكى مىللىتىمدىن پەخىرلىنىمەن.

مۇزاتى

مەرزىيە يوللىغان ۋاقتى  2013-4-26 23:50
مىللىيلىكنى دېمىگىن«مەتۇ»،
مىللىتىڭدىن چانغىنىڭمۇ بۇ ...

رەخمەت سىزگە مەرزىيە، شېئىرىمدىكى بەزى سۆز-ئىبارىلەر قاتتىقراق كەتكەن بولسىمۇ،گەپ تەسىر قىلمايدىغان بەزى-بىر قىز -ئاياللارغا تەسىر قىلارمىكىن دەپ بەك ئاياپ ئولتۇرمىدىم،ئەيىبكە بۇيرۇمىغايسىز....
ياقتۇرۇپ ئوقۇغىنىڭىزغا رەخمەت ئېيتىمەن!

گۈلزار

نارسىدەڭنى ئۆزەڭگە ئوخشاش،
«شىر »سىياقتا ياسىما ئەمدى؛
ئۇدۇن بولۇپ قالمىسۇن ئاڭا،
ئۇ مىللىتىم بىخى،ئۈمۈدى.
بۇ مىسرالاردا ئېيتىلغاندەك بىر قىسىم ئاياللىرىمىز ئۆزى غەيرى ياسانغانننىڭ ئۈستىگە پەرزەنتلىرىنىمۇ تېخىمۇ ئاشۇرۇپ ياساندۇرماقتا ، بۇلارنى كۆرسەم مىلللىتىمنىڭ كەلگۈسىدىكى ئوبرازى خىرەلىشىدۇ .
رەھمەت بۇ ئەسكەرتمىلىرىڭىزگە .

Qol~Ogli

       ئاياللار- كىشلىك جەمىيەتتە تۇتقان ئورنى موھىم،  مەسئۇلىيەت ۋە مەجبۇرىيىتى ئىغىر ئالاھىدە پۇخرالاردۇر ، چۈنكى پەرزەنت بۇ دۇنياغا ئاپىرىدە بولغاندىن تارتىپ تاكى مۇستەقىل تۇرمۇش كەچۈرۈش سالاھىيىتىگە ئېرىشكۈچە بولغان بۇ بىر ئۇزۇن جەرياندا ئانىنىڭ بىۋاستا ياكى ۋاستىلىق تەربىيەسىنى قوبۇل قىلىدۇ ، ئانىنىڭ گەپ-سۆزى، مېڭىش- تۇرۇشى، كىشىلىك مۇناسىۋەت قارىشى ۋە ئەمەلىيىتى  پەرزەنتلەرگە ئۈلگە بولىدۇ ، شۇڭا يۇقارقىدەك مەسئۇلىيەت ۋە مەجبۇرىيەتنى ئۈستىگە ئالغان ئانىلار(ئاياللار)  ئۆزىدە مائارىپچىلىق قارىشى تۇرغۇزىشى،بىلىم قۇرۇلمىسى ۋە قىياپىتى ئارقىلىق « تەربىيەلىگۈچى»لىك رولىنى ياخشى ئۆتىشى تولىمۇ زۆرۈر .
        يۇقۇرىقى شېئىردا قامچىلانغان ئاياللار گەرچە جەمىيىتىمىزدىكى قىسمەنلىك بولسىمۇ ئۇلارنىڭ تەسىرىگە سەل قارىغىلى بولمايدۇ ،چۈنكى «بىر تال ماياق، بىر تۇلۇم ماينى سېسىتىدۇ» -دە .
      ئەجرىڭىزگە تەشەككۈر بۇرادەر .

گۈلنۇر

بۇ شئرنىڭ مەزمۇنى بەك ياخشى چىقىپتۇ .ماڭا بەك ياقتى .

艾力.吾麦尔

بەزىبىر ( ئاز ساندىكى ) قىز - ئاياللارغا نىسپىتەن  ئىبرەت ئېلىشقا تىگىشلىك ياخشى ئۆرنەك شىئېركەن .