مۇئەللىم (ئۆڭمەس)

مۇزاتى

مۇئەللىم

مەخمۇت ئاۋۇت ئۆڭمەس

مىننەتسىزلىك،كەمتەرلىك  ئۈلگىسىدۇر مۇئەللىم،
غەم-قايغۇنىڭ دورىسى - كۈلكىسىدۇر مۇئەللىم؛
كۈچ-جاسارەت بۇلىقى، ئىلىم-ئىرپان  چىرىقى،
باھادىرى  يېڭىلمەس،  سەركىسىدۇر مۇئەللىم.



شۇم نىيەتلىك، پەسكەشلىك قامچىسىدۇر مۇئەللىم،
چاڭققاق  دىلغا  ئۇ زەم-زەم تامچىسىدۇر مۇئەللىم؛
بېرىپ ئەلگە مېھرىنى ،چاقنىغان ئىرپان بىلەن،
خۇنۈك دىلغا  نۇر-زىبا  باغچىسىدۇر مۇئەللىم.



ئىتتىپاقلىق، ئۆملۈكنىڭ  ئەلچىسىدۇر مۇئەللىم،
مۈشكۈلاتنىڭ، قىسمەتنىڭ يەلكىسىدۇر مۇئەللىم؛
ئۆڭمىسە  ۋىجدان-غۇرۇر، شۇدۇر  ئەخلاق بەلگىسى،
مەنزىلىنىڭ ساداقەت رولچىسىدۇر مۇئەللىم.



خامۇشلۇقنىڭ، غەپلەتنىڭ خەنجىرىدۇر مۇئەللىم،
ئىناقلىقنىڭ، بىرلىكنىڭ زەنجىرىدۇر مۇئەللىم؛
ئىلىم-ھېكمەت، مەرىپەت  دولقۇنلايدۇ  قېنىدا،
ئەلنى سۆيۈش، گۈللەشنىڭ تەدبىرىدۇر  مۇئەللىم.



مۇڭ-پىغاننىڭ، كۈلپەتنىڭ شادلىقىدۇر مۇئەللىم،
مەجرۇھ تەننىڭ ئوزۇقى- ئاشلىقىدۇر مۇئەللىم؛
شېخى ھەريان ئۆسسىمۇ يىلتىزىدۇر  تۇتاش بىر،
دىلغا بەخت تېڭىشنىڭ ئاشىقىدۇر  مۇئەللىم.



گۈل چىمەننىڭ، باغلارنىڭ بۇلبۇلىدۇر مۇئەللىم،
رىقابەتنىڭ، جەڭگاھنىڭ  دۇلدۇلىدۇر  مۇئەللىم؛
چېھرى ئايدەك يورۇغان ،قەددى مەزمۇت بىر چىنار،
ئەل-جاھانغا پاسىبان، گۈل-گۈلىدۇر مۇئەللىم.



بىپايان ئۇز زېمىننىڭ گىياھىسىدۇر مۇئەللىم،
پارلىغان تاڭ-قۇياشنىڭ جۇلاسىدۇر مۇئەللىم؛
ئەمەس مەۋجۇت قاباھەت، تاپقاچ شىپا جاراھەت،
چىن ھاياتنىڭ جاكاسى، نىداسىدۇر  مۇئەللىم.



ئادىمىيلىك، خىسلەتنىڭ ئىنژىنېرى مۇئەللىم،
ھۆنەر، ئىلىم-ھېكمەتنىڭ ئۇستاز-پىرى مۇئەللىم؛
مەرىپەتنىڭ مەشئىلى، يۈكسىلىشنىڭ  كۈچ،ئۇلى،
ئىدراك-ئەقىل،ھۆرمەتنىڭ چولپان نۇرى مۇئەللىم.


مەنبە : ئۆز ئىجادىيىتىم.

گۈلزار

بۇ شېئىرىڭىزنى ئوقۇپ ئوقۇتقۇچۇچى بولغانلىقىمدىن پەخىرلەندىم . رەھمەت سىزگە

مۇزاتى

گۈلزار يوللىغان ۋاقتى  2013-6-30 00:17
بۇ شېئىرىڭىزنى ئوقۇپ ئوقۇتقۇچۇچى بولغانلىقىمدىن پەخى ...

ئوقۇتقۇچىلار جاپاكەش ، قەدىرلەشكە«ئون مېتىر يىراقتىن سالام بېرىشكە»تېگىشلىك كىشىلەر سىلەر، سىلەرنى تەرىپلەپ قانچە داستان پۈتسەكمۇ ئادا بولمايدۇ.....................

بايقاش

مائارىپ ئىشلىرى ئۈچۈن جان كۆيدۈرۈپ تەر تۆكىۋاتقان ئوقۇتقۇچىلارنى قانچىلىك مەدىھيەلىسەك ئەرزىيدۇ！
来自: Android客户端

1چىچەك

قەلىمىڭىز خېلى كۈچلۈككەن.يازغان شئېرىڭىز ھەر قانداق مائارىپچىغا ياقماي قالمايدۇ جۇمۇ؟

pari

ئوقۇتقۇچى ئىنسان قەلبىنى يورۇتقۇچى .

بەختىيار(بايقاش

مۇزاتى ئۇستاز شېئىرىڭىزنى ئوقۇپ تولىمۇ سۆيۈندۈم ،رەھمەت سىزگە!

دىلرۇس

ئوقۇتقۇچىغا بېرىلدىغان ھەرقانداق مەھدىيە، ئۇنىڭ بىر كۈنلۈك جاپاسىغىمۇ توغرا كەلمەيدۇ. ئوقۇتقۇچىنىڭ جاپاسىنى، ئوقۇتقۇچى (ئىسمى- جىسمىغا لايىق، مەسئۇليەتچان، ھەقىقىي بۇرۇچنى ئۈستىگە ئالالىغان) لارلا بىلىدۇ. مۇزاتى ئۇستازنىڭ بۇ شىئېرى مېنىڭ غۇرۇر ۋە ئىپتىخارىمغا ئوت ياقتى، گويا مەن مەھدىيلىنىۋاتقاندەك شۇنداق ئىپتىخارلاندىمكى، بېشىم كۆكە يەتتى. شەكسىزكى، بۇ مەھدىيە بىر ماۋسۇم جاپالىق ئىشلەپ، تەتىلگە چىقىش ئالدىدا تۇرغان بارلىق ئۇستازلارنىڭ جاپاسىغا ئەڭ شىپالىق روھى مەلھەم بولالايدۇ.
رەھمەت ئۇستاز مەھدىيىڭىزگە، مەن مىللىي مائارىپىىز ئۈچۈن يۈرەك قېنىنى سەرىپ قىلىۋاتقان بارلىق ئوقۇتقۇچىلار نامىدىن سىزگە ئالىي ئېھتىرامىمنى بىلدۈرىمەن!!

خۇمارى

مۇڭ-پىغاننىڭ، كۈلپەتنىڭ شادلىقىدۇر مۇئەللىم،
مەجرۇھ تەننىڭ ئوزۇقى- ئاشلىقىدۇر مۇئەللىم؛
شېخى ھەريان ئۆسسىمۇ يىلتىزىدۇر  تۇتاش بىر،
دىلغا بەخت تېڭىشنىڭ ئاشىقىدۇر  مۇئەللىم.
مۇئەللىملەرنى ئاجايىپ پاساھەتلىك تىللار بىلەن ئوبرازلىق سۈرەتلەپ بىرىپسىز .بەك ياقتۇردۇم رەھمەت سىزگە.

قەسىر

                    دىل گۈلىستان باھار بولماس ئۇنىڭسىز،
                   شام-چىراق ئۇ دىل يورۇماس ئۇنىڭسىز.
                     دۇنيا گۈزەل مېھر قۇرۇماس ئۇنىڭسىز،
                  ئىلىم-مەرىپەت ھەم خورىماس ئۇنىڭسىز.
                    نەدە بولۇڭ سالام سىزگە ئەي ئۇستاز!