غوجامۇھەممەد مۇھەممەد غەزەللىرى

كەۋسەر

غوجامۇھەممەد مۇھەممەد غەزەللىرى
******************************
(1)
كەزسەم خوتەننى ،قەشقەردە ئاھىم ،
ياش تۆكتى ئاقسۇ،مىڭ ئەردە ئاھىم .

ئىزدەپ تىنچلىق بارسام ئىلىغا ،
قانىتى بوغۇق كەپتەردە ئاھىم .

ئاتۇشقا چىقسام تاشلار يېرىلدى ،
جاندا بىلەنگەن شەمشەردە ئاھىم .

تۇرپاندا قەبرە ، بولدۇم ھازىدار ،
شائىرنى چاپقان خۇمپەردە ئاھىم .

كەزدىم ۋەتەننى ئون بەش چۆرگىلەپ ،
ئون بەش تامچە قان مەھشەردە ئاھىم .
(2)
ئالمىخاننىڭ ئالمىسى بار ،باغى يوق ،
لەيلىخاننىڭ گۈلى بار، گۈلزارى يوق .

سايرىماڭلار غۇنچىخانغا تەلمۈرۈپ ،
ئېچىلىشقا بەھرى ئاپتاپ يازى يوق .

تاڭغا يىغلاپ ئولتۇرىدۇ نۇرىخان ،
تۈندە كەلمەڭلار ئۇنىڭ چىراغى يوق .

چىللىماڭلار ھۆرىخاننى بەزمىگە ،
ئاڭا ئاشىق يىگىتى - سەردارى يوق .

تىڭشىماڭلار كۈيلىسە ئازادىخان ،
جان غېمىدىن كۆڭلىنىڭ ئارامى يوق.
(3)
يارىم كېلىپتۇ كۆرۈپ كەتكىلى ،
ساچىنى چۇۋۇپ ، ئۆرۈپ كەتكىلى .

جېنىمنى ئويناپ بارماقلىرىدا ،
بارماقلىرىمدا ئۆلۈپ كەتكىلى .

دوزاخ ئوتىدىن ئالغاچ كېلىپتۇ ،
ئۆچكەن قېنىمغا كۆمۈپ كەتكىلى .

لەۋلىرى سەرسان، كۆكسىدە ئىسيان ،
يىغلاپ كېلىپتۇ ، كۈلۈپ كەتكىلى .

سۇندۇر قەدەھنى ، جىسمىم شارابدۇر ،
يارىم كېلىپتۇ چۆمۈپ كەتكىلى .
(4)
ئول كۆڭۈل باغى ئارا سەيلانە كىم؟
گۈلگە مەست كەيپى بىلەن خەندانە كىم؟

ئىككى ئالەمنى تىگىشكەن سۆيگۈگە،
مەشرەبى دىۋانىدەك مەردانە كىم؟

جام لېۋىدە ئىستىقامەت ئەيلىگەن،
تەڭرىگە ھەييام كەبى مەستانە كىم؟

يۇلتۇزى ئۆچكەن پەلەككە كۆز تىكىپ،
ئاھىدىن تۇرغان يېنىپ نۇرانە كىم؟...

تۈندە بۆرە ھۇۋلىدى تۇردۇم چۆچۈپ،
بىللە چۆلگە كەتكۈدەك دوستانە كىم؟!
(5)
كەچكۈدەك جانۇ- جاھانىم قالمىدى،
يەتكۈدەك ياكى ۋىسالىم قالمىدى.

سارغىيىپ ئۇچتۇم سامان رۇخسارىدا،
سۈرگىدەك شىرىن خىيالىم قالمىدى.

ئىككى ئالەم مۈلكىنى يۈردۈم يۈدۈپ،
ساتقۇدەك قايناق بازارىم قالمىدى.

كېچىسى ياتتىم جەسىەدنىڭ قەلبىدە،
ئۆلگىدەك باشقا ئامالىم قالمىدى...

ئەي غوجى قوپ،ساڭا ئىچ ئاغرىتمىغان،
ئادىمى،ھەتتا خۇدايىم قالمىدى.


مەنبە: ساقلىۋالغان

تۇرخان

تەشەككۇر ،تەشەككۇر....ئارام ئالغاندا ئۇقۇيدىىغان غەزەللەر ئىكەن بۇ

كەۋسەر

ياقتۇرغىنىڭىزغا رەھمەت .