باھاركەلدى

كەۋسەر

باھاركەلدى

ئابدۇرېھىم ئۆتكۈر

باھار كەلدى، جاھان كۈلدى
كۈلەر مەستانە مەستانە.
ئېرىپ قارا مۇز، ئاقار ئەگىز
ئاقار دۇردانەـ دۇردانە.

باھار كەلدى، ياشاردى چۆل،
ياشاردى ھەم ساماۋى كۆل.
بۇقۇلداپ قىردا كەكلىكلەر،
كېزەر ھەريانەـ ھەريانە.

بۇلۇتسىز كۆك گويا ئەينەك،
ئۇچار كۆكتە قاتارلەگلەك؛
نە لەگلەك، بەلكى ئاققۇلار.
ئۇاچار جەۋلانە - جەۋلانە.

باھار كەلدى چىمەن كۈلدى،
چىمەندە گۈل تۈمەن كۇلدى.
نە گۈلكى ھەممەجان كۈلدى،
كۈلەر جانانە - جانانە .

چېچەكلەر بەرگىدە شەبنەم،
قۇياشتا يالتىرار ھەردەم.
ئېچىلغان گۈل ،قىزىل مەيگە
تولۇر پەيمانە - پەيمانە.

باھار كەلگەچ يېتىپ باغقا ،
قونۇپ بۇلبۇل كەبى شاخقا.
سەنەممۇ سەيلىگە چىقتى
يۈرۈپ سەيلانە - سەيلانە .

باھار كۈلدى قۇياش كۇلدى،
قۇياشلىق ئەلمۇ خۇش كۈلدى.
رەقىبلەر قان يۇتار ئەمدى،
كۈنى ۋەيرانە - ۋەيرانە .

باھار كەلدى ياشاردى جان،
جىرىڭلار قولدا ئالتۇن جام،
بولۇپ ئەل بەختىگە ساقىي،
كېزەي مەيخانە - مەيخانە .

مەنبە؛ ئابدۇرېھىم ئۆتكۇر شېئىرلىرى