بوغۇز ئىششىقى دائىم كۆرىلىدىغان كېسەللىكلەرنىڭ بىرى. بولۇپمۇ بالىلارنىڭ بوغۇزى ئاسانلا ئىششىپ قالىدۇ.
شىنجاڭ تىببىي ئۇنىۋېرسىتېتى قارىمىقىدىكى 1-دوختۇرخانا بالىلار كېسەللىكلىرى بۆلۈمىنىڭ كاندىدات مۇدىر ۋىراچى جاڭ جىخۇڭ بۇ ھەقتە توختىلىپ مۇنداق دېدى:
-بوغۇز ئىششىقى ھەقىقەتەن بالىلاردا كۆپ كۆرىلىدۇ، بىراق بۇنىڭلىق بىلەن بۇ خىل كېسەللىككە سەل قاراشقا بولمايدۇ. بوغۇز ئىششىقى ئالدى بىلەن يۇقۇملۇق ۋە يۇقۇمسىز دەپ ئىككى خىلغا ئايرىلىدۇ. ئادەتتە ۋىرۇستىن يۇقۇملانغان، ئاغرىپ، قىزىتىدىغان، ئاق قان دانچىسى بەك ئۆرلەپ كەتمىگەن، بوغۇزنىڭ بىر تەرىپى بەكرەك ئىششىپ قالدىغىنى يۇقۇملۇق بوغۇز ئىششىقى بولۇپ، بالىدا يۇقىرىقىدەك ئەھۋاللار كۆرۈلگەن بولسا، چۇقۇم ماسكا تاقىشى كېرەك. چۈنكى يۇقۇملۇق بوغۇز ئىششىقى نەپەس يولى ئارقىلىقلا تارقىلىدۇ. ئەگەر بالىدا قىزىش، ئاغرىش، زۇكام بولغاندەك ئالامەتلەر كۆرۈلۈپ بىر تەرىپى ئىششىپ، قاندىكى ئاق قان دانىچىسى ئۆرلەپ كەتكەن بولسا، كۆپ ھاللاردا بۇ يۇقۇمسىز بوغۇز ئىششىق ئىكەنلىكىدىن دېرەك بېرىدۇ. ئۇنىڭدىن باشقا، ئاتا-ئانىلارنىڭ تېخىمۇ دىققەت قىلىشقا تېگىشلىكى، بوغۇز ئىششىقنىڭمۇ ئەگەشمە كېسەللىكلىرى كۆپ بولىدۇ. مېڭە ياللۇغى بوغۇز ئىششىقىنىڭ ئەڭ خەتەرلىك ھەم كۆپ كۆرىلىدىغان ئەگەشمە كېسەللىكى ھېسابلىنىدۇ. شۇڭا ياش ئاتا-ئانىلار بالىلىرىدا بوغۇز ئىششىش ئالامەتلىرى كۆرۈلگەندە، ۋاقتىدا دوختۇرخانىغا ئاپىرىپ تەكشۈرتۈش كېرەك.
مەنبە: شىنجاڭ قانۇنچىلىق گىزىتى
تۆۋەندىكى مەزمۇننى يانفۇنىڭىزدا دوستلىرڭىز بىلەن تەڭ بەھىرلىنىڭ !
