شىنجاڭ 3-نۆۋەتلىك ئۆسمۈرلەر قوش تىلدا نۇتۇق سۆزلەش مۇسابىقىسىنىڭ مۇكاپاتى تارقىتىلدى

    شىنجاڭ 3-نۆۋەتلىك ئۆسمۈرلەرنىڭ قوش تىلدا نۇتۇق سۆزلەش مۇسابىقىسىنىڭ مۇكاپات تارقىتىش كېچىلىكى 24-دېكابىر كەچتە شىنجاڭ تېلېۋىزىيە ئىستانسىسىدا ئۆتكۈزۈلدى. مەھلىيا نېغمەت، گۈلزىبا ئابلىكىم، لى لىندوڭ قاتارلىق 15 نەپەر بالا ‹‹مۇنەۋۋەر قوش تىل گۆدەك بالىسى›› شەرىپىگە، چېن شىپيەن، تالەنت ھۆرمەتبېك، مۇنتەزەر مۇتەللىپ، يېلىنا يېرلان قاتارلىق 20 نەپەر بالا باشلانغۇچ مەكتەپ گۇرۇپپىسى بويىچە ‹‹مۇنەۋۋەر قوش تىل بالىسى›› شەرىپىگە ئېرىشتى. ۋاڭ يۈخۇا، ۋاڭ شاۋفېن، جىن شاۋبو قاتارلىق 35 نەپەر يېتەكچى ئوقۇتقۇچى ‹‹باغۋەن مۇكاپاتى››غا ئېرىشتى.

    شىنجاڭ ئۇيغۇر ئاپتونوم رايون رەھبەرلىرىدىن ئەركىنجان تۇراخۇن، دۇ چىنرۈي، جىن نو، ھۆرىگۈل جاپپار قاتارلىقلار كېچىلىككە قاتناشتى ھەمدە مۇكاپاتقا ئېرىشكۈچىلەرگە مۇكاپات تارقىتىپ بەردى.

    ئىگىلىنىشىچە، ئۆسمۈرلەر قوش تىلدا نۇتۇق سۆزلەش مۇسابىقىسى شىنجاڭ ئۇيغۇر ئاپتونوم رايونلۇق پارتكومنىڭ قوش تىل مائارىپىنى ئىلگىرى سۈرۈشتىكى بىر تۈرلۈك مۇھىم تەدبىرى بولۇپ، 2006-يىلىدىن باشلاپ ھازىرغىچە ھەر ئۈچ يىلدا بىر قېتىم ئۆتكۈزۈلگەن. ئۈچ نۆۋەتلىك مۇسابىقىگە قاتناشقانلارنىڭ سانى بىر مىليون 700 مىڭ ئادەمگە يەتكەن بولۇپ، قوش تىل مائارىپ خىزمىتىىنى تەشۋىق قىلىش، ئىلگىرى سۈرۈشتىكى مۇھىم ماركا، ھەر مىللەت ئۆسمۈرلىرىنىڭ، مەكتەپلەرنىڭ، ئوقۇتقۇچى ۋە ئائىلە باشلىقلىرىنىڭ يۈكسەك ئەھمىيەت بېرىدىغان، بالىلارنىڭ قوش تىلدا پىكىر ئالماشتۇرىدىغان سەھنىسىگە ئايلاندى.