جۇڭگو ئاخبارات تورىنىڭ 25-ئىيۇل خەۋىرى: چەتئەل ئاخباراتلىرىنىڭ خەۋىرىگە ئاساسلانغاندا، ش ئا ئە ت نىڭ بىر تىك ئۇچار ئايروپىلانى شۇ جاي ۋاقتى 7-ئاينىڭ 25-كۈنى ئافغانىستاندا چۈشۈپ كەتكەن، ئايروپىلاندىكى خادىملار يېنىك يارىدار بولغان، ئادەم ئۆلمىگەن. تالىبان تىك ئۇچار ئايروپىلاننى ئېتىپ چۈشۈرۈپ تاشلىغانلىقىغا مەسئول بولىدىغانلىقىنى جاكارلىغان.
خەۋەرگە ئاساسلانغاندا، ش ئا ئە ت خەلقئارا بىخەتەرلىك ياردەمچى قىسىملىرى باياناتىدا بىلدۈرۈشىچە، 25-ئىيۇل ئافغانىستاننىڭ شەرقىي قىسىمىدا ش ئا ئە ت نىڭ بىر تىك ئۇچار ئايروپىلانى چۈشۈپ كەتكەن، ئايروپىلان خادىملىرى ۋە يولۇچىلار يېنىك يارىدار بولغان، يېقىن ئەتراپتىكى بىر بازىغا بىخەتەر قايتىپ كەتكەن. بىر ساقچى ش ئا ئە ت تىك ئۇچار ئايروپىلانىغا راكېتا بومبا تېگىپ چۈشۈپ كەتكەن بولىشى مۇمكىنلىكىنى ئېيتقان.

ش ئا ئە ت قۇتقۇزۇش خادىملىرى ئايروپىلان چۈشۈپ كەتكەن نەق مەيدانغا يېتىپ بارغاندا، قوراللىق كىشىلەرنىڭ ھۇجۇمىغا ئۇچرىغان، ش ئا ئە ت ئەسكەرلىرى قايتۇرما ھۇجۇم قىلغان.
تالىبان بۇ تىك ئۇچار ئايروپىلاننى ئېتىپ چۈشۈرگەنلىكىنى جاكارلىغان، تالىباننىڭ 2 نەپەر ئادىمى ئېتىشىشتا ئۆلگەنلىكىنى بىلدۈرگەن. تالىبان يەنە ئافغانىستاندا تۇرۇشلۇق 22 نەپەر چەتئەل ئەسكىرىنى ئېتىپ ئۆلتۈرگەنلىكىنى بىلدۈرگەن.
ئافغانىستاننىڭ شەرقىدىكى كۇنار ئۆلكىسىنىڭ ساقچىسى بىلدۈرۈشىچە، ش ئا ئە ت نىڭ بىر «چىنۇك» تىك ئۇچار ئايروپىلانى يېرىم كېچىدىن كېيىن چۈشۈپ كەتكەن، تىك ئۇچار پۈتۈنلەي ۋەيران بولغان بولۇپ، قارىماققا راكېتا بومبىنىڭ ھۇجۇمىغا ئۇچرىغانغا ئوخشايدىكەن.
ساقچىنىڭ دېيىشىچە، ش ئا ئە ت نىڭ يەنە بىر تىك ئۇچار ئايروپىلانى نەق مەيدانغا بېرىپ قوراللىق ئۇنسۇرلارغا قايتۇرما ھۇجۇم قىلغان، تاڭ سۈزۈلگەندە نەق مەيداندىن تالىباننىڭ ئىككى ئادىمىنىڭ جەسىتىنى تاپقان.