ۋېنخۇي گېزىتى تورىنىڭ 16-ئىيۇل خەۋىرى: ئامېرىكا دۆلەت مۇداپىئە مىنىستېرلىكى 15-ئىيۇل ھەر قايسى تەرەپلەر كۈتكىلى ئۇزۇن بولغان تۇنجى ئېنتىرنېت ئىستراتىگىيىسىنى ئېلان قىلىپ، ئېنتىرنېت تورىنى 5-ئۇرۇش قىلىش ساھەسى ئىكەنلىكىنى جەزملەشتۈرۈپ، دېڭىز، قۇرۇقلۇق، ھاۋا ۋە ئالەم بوشلۇقى بىلەن بىر قاتاردا تىزىپ، ئامېرىكا ئارمىيىسى ھەمدە مۇھىم ئاساسىي ئەسلىھەلىرىنىڭ بىخەتەرلىك قوغدىنىشىنى كۈچەيتكەن. يېڭى ئىستراتىگىيەنىڭ مۇھىم نۇقتىسى ئىلگىرىكى پاسسىپ مۇداپىئەلىنىشتىن ئاكىتىپ مۇداپىئەلىنىشكە ئۆزگەرگەن ھەمدە ئامېرىكا بىلەن ئىتتىپاقداشلىرى ۋە شېرىكلىرى ئارىسىدىكى ئېنتىرنېت ساھەسى خەلقئارالىق ھەمكارلىقىنى كۈچەيتىش، كرېمنىي جىلغىسىدىكى كارخانىلار بىلەن ھەمكارلىشىپ، ئېنتىرنېت تورى قوغداش ئەترىتى قۇرۇشقا تەييارلىق قىلىش، خاككېرلارنىڭ ئامېرىكا دۆلەت بىخەتەرلىكىگە بۇزغۇنچىلىق قىلىشنى توسۇش قاتارلىقلارنى ئۆز ئىچىگە ئالغان.
«ئېنتىرنېت بوشلۇقى ئۇرۇش قىلىش ئىستراتىگىيىسى» ناملىق ھۆججەتتە ئامېرىكا ئارمىيىسىنىڭ پۈتكۈل دۇنيادا 15 مىڭ دانە ھېسابلاش تورى ۋە 7 مىليون دانە ھېسابلاش ئەسلىھەسى بارلىقىنى ئېنىق كۆرسەتكەن.
خەۋەردە كۆرسىتىلىشىچە، تۈرلۈك ئالامەتلەردىن، ئامېرىكا ئارمىيىسى ئېنتىرنېت تور بوشلۇقىنىڭ تەھدىت ۋە ھۇجۇم ئىقتىدارىنى تېخىمۇ مۇھىم ئورۇنغا كۆتۈرىدىكەن. ئامېرىكا ئاخباراتلىرى «ئامېرىكا ئارمىيىسى تور بوشلۇقىنى كېڭەيتىشى ئېھتىمال تور بوشلۇقىنى ھەربىيلىشىشىنى كەلتۈرۈپ چىقىرىپ، تور ھەربىي ھازىرلىقلار مۇسابىقىسىنى قوزغاپ قويۇشى مۇمكىن» دېگەن.
ھۆججەتتە بەش بۇرجەكلىك بىنانىڭ تورى ھەر كۈنى نەچچە مىليون قېتىم ھۇجۇمغا ئۇچرايدىغانلىقىنى، مۇۋاپىقىيەتلىك ھۇجۇم قىلىپ كىرگەنلىرى نەچچە مىڭ ھۆججەتنىڭ ئاشكارىلىنىپ كېتىشىنى كەلتۈرۈپ چىقارغانلىقى، رەقىبلىرى بارغانسېرى مۇرەككەپ ھەمدە كەڭ دائىرىدە ئېرىشەلەيدىغان قوراللارنى داۋاملىق ئېچىۋاتقانلىقىنى، كىچىك گۇرۇپپىلارنىڭمۇ ئامېرىكا بىخەتەرلىكىگە «سىممېتىرىك بولمىغان تەسىر» پەيدا قىلىدىغانلىقىدىن دېرەك بېرىدىغانلىقى كۆرسەتكەن.