تۆگە گۆشىنىڭ ئۇيغۇر تېبابىتىدە ئىشلىتىلىشى

بۇ تۆگە ئائىلىسىدىكى مەشھۇر ھايۋان قوش لوكىلىق تۆگىدىن ئىبارەت بولۇپ ، ئۇنىڭ گۆشى دورا ئورنىدا ئىشلىتىلىدۇ .
تەبىئىتى : قۇرۇق ئىسسىق .
خۇسۇسىيىتى : « تەبىئەت»نى ۋە يۈرەكنى قۇۋۋەتلەش ، قان كۆپەيتىش ، يەللەرنى تارقىتىش ، رەئىس ئەزالارنى قۇۋۋەتلەش ، قىزىتمىنى پەسەيتىش ، كونا - يېڭى باش ئاغرىقىنى قالدۇرۇش ، سۈيدۈك ھەيدەش ، ئاغرىق پەسەيتىش ، قان توختىتىش .
ئىشلىتىلىدىغان كىسەللىكلەر : باھ ئاجىزلىقى ، تەمرەتكە ، قارا داغ ، خانازىر ، ئىستىسقا ، سەرتان ، پالەچ ، نىقرەس ، رەئىشە ، ئىششىق ، يىرىڭلىق جاراھەت ۋە يارا قاتارلىق كىسەللىكلەرگە ئىشلىتىلىدۇ .

ئىشلىتىش ئۇسۇلى :
1. گۆشىنى ھەر خىل ئۇسۇلدا پۇشۇرۇپ يېسە ، باھنى ۋە رەئىش ئەزالارنى قۇۋۋەتلەيدۇ .
2. مۇۋاپىق مىقداردىكى مۇقەلنى كۈدە سۈيىدە ئېرىتىپ ، تۆگە يېغىنى ئارىلاشتۇرۇپ سىرتتىن سۈركىسە ، بۇۋاسىر دانىچىلىرىنى يوقىتىدۇ .
3. تۆگە جىگىرى مۇۋاپىق ھالدا ئىستىمال قىلىنسا ، كۆزنى قۇۋۋەتلەيدۇ ، كۆزگە چۈشكەن سۇنى يوقىتىدۇ .
ئىشلىتىش مىقدارى : 3-10گرام .
زىيانلىق تەسىرى : ئىسسىق مىزاج كىشىلەرگە زىيان قىلىدۇ .
تۈزەتكۈچىسى : سىركە ، بىنەپشە ، ئاچچىقسۇ .
ئورۇنباسارى : بۆرە ئەرمىنى .
مەنبە : ئۇيغۇر تېبابىتى ئالىي تېخنىكوم دەرسلىكى