بەل-پۇت سوغۇق تۇرۇشنى داۋالاشنىڭ قانداق چارىسى بار [سۇئال-جاۋابلار]

ھۆرمەتلىك بىرزات ئەپەندى ياخشىمۇسىز،ئالدى بىلەن تىنىڭىزگە سالامەتلىك تىلەيمەن.
مىنىڭ داۋاملىق پۇت-قولۇم سوغۇقلا تۇرىدۇ، بولۇپمۇ پۇتۇم ھەردائىم سوغۇق تۇرىدۇ، قىش كۈنلىرى خىلى قىلىن كيىنسەممۇ يەنىلا پۇتۇم ئىسسىمايدۇ،ھازىر ھاۋا خىلى ئىسسىغان بولسىمۇ پۇتۇم (ھوشۇققىچە)يەنىلا سوغۇق،كەچتە ئاياغنى سالسام ئاياغ ئىچى ھۆل بولۇپ كىتىدۇ،مەندىكى بۇخىل ئالامەت كىچىك ۋاقتىمدىن باشلاپلا شۇنداق ئىدى،مەندەباشقا كىسەللىك ئالامەتلىرى يوق،مىنىڭ پۇت-قولۇمنىڭ دائىم سوغۇق تۇرىشىغا ئۈنۈملۈك دورا بارمۇ؟ مەسلىھەت بەرگەن بولسىڭىز،

جاۋاب:
ئەسسالامۇ ئەلەيكۇم
بەدىنىڭىزدە كىچىكىڭىزدىن كالتىسىي دېگەندەك ئوزۇقلۇقلار تازا يېتەرسىز بولسا كېرەك.
پىژغىرىم ئىسسىقتا يالاڭ ئاياق قۇمغا دەسسەپ بىرىش، ئاپتاپقا كۆپرەك قاقلىنىپ بېرىش، بولسا قەلەمپۇر مېيى، تۇخۇم مېيى دېگەنلەر بىلەن بەل-پۇت، قول ، بىلەكلەرنى مايلاپ قاقلىنىپ بەرسىلە تېخى ياخشى.
( بولسا يېزىدا تۇققانلار بولسا بىرىپ ئورما ئىلىشىغا ھەم كۈزلۈك يېغىنغىچە ئېتىزدا ئىشلىشىپ بەرسىلىرى ساقىيىپ قالاتتىكەنلا ).
ئىچكى تەرەپتىن قۇۋۋەتلىك غىزالىنىپ بەرسىلە، پەي، نېرىپلارنى بوشاشتۇرغۇچى، قاننى سوۋۇتقۇچى سوغۇق تەبىئەتلىك يېمەك-ئىچمەكلەردىن - لەڭپۇڭ، راڭپىزا، توڭلاتقۇنىڭ مۇزلۇقلىرى، قېتىق ۋەھاكازالاردىن ئىمكان بار ساقلانسىلا!
مۇۋاپىق بەدەن چىنىقتۇرۇپ بەرگەننىڭمۇ قان سوۋۇپ كېتىشكە مەنپەئىتى بار.
ئۇرۇقسىز قىزىل ئاپتابى ئۈزۈم، جېگدە چېچىگى ھەسىلى، ياڭاق مېغىزى، كەپتە شورپىسى دېگەندەك قۇۋۋەتلىك ، ئېسسىقلىقى يۇقۇرى يېمەك-ئىچمەكلەرنى كۆپرەك ئىستىمال قىلىپ بەرسىلە!
ماددتىل ھايات ، ھەببى ئازاراقى دېگەن دورىلاردىن ئۈزۈلدۈرمەي 2 ئاي ئەتراپىدا ئىستىمال قىلىپ كۆرۈپ باقسىلا! ئۇلارنىڭ پەي مۇسكۇل، نېرىپلاردىكى سوغۇقنى ھەيدەش، قاننى قىززىتىش، ئارتۇق ھۆللۈكنى قۇرۇتۇش، بەدەننى قۇۋۋەتلەش، كالتىسى تولۇقلاش خۇسۇسىيەتلىرى بار.
________________- مۇھەممەد تۇرسۇن (بىرزات)

ئەسسالامۇ ئەلەيكۇم، بىرزات ئەپەندىم!
ئۇلۇغ ئاللاھدىن ئىشلىرىغا بەرىكەت، تەنلىرىگە سالامەتچىلىك تىلەيمەن.
36 ياشقا كىردىم (ئايال)، بىر يىلدىن ئاشتى، پۇت_قولۇم  بەك  مۇزلايدۇ، قىشمۇ_ ياز ئوخشاش.
يېقىننىڭ ياقى يۈز_ پۇت_قولۇم  ئششىيدىغان  بولىۋالدى، يۈرەك_ بۆرەكنى تەكشۇرتسەم
ساق دەيدۇ ( ھورمۇنلارمۇ نورمال ئىكەن).بۆرەكنىڭ ئەتراپى تېلىپ ئاغرىيدۇ ھەم  مۇزلايدۇ،
نىمە  دىسەم  بولار  زادى  ھەممە  ئىشلار قولايسىز.................................
ئاللاھ  ئەجىرلىرىنى  بەرسۇن ،ياخشى  پىكىر_ تەكلىپلەردىن بەرگەيلا...........

ۋەئەلەيكۇم ئەسسالام
بۆرەك-يۈرەك  تەكشۈرۈشتە باشقا مەسىلە چىقمىغان ئەھۋالدا يۈز ، پۇت قوللاردىكى ئىششىقنىڭ سەۋەبى ئاساسلىقى بۆرەك، بالياتقۇنى مەركەز قىلىپ ئومومىي بەدەن سوۋۇپ كەتكەنلىكتىن بولىدۇ. ئاياللاردا  بۇ خىل ئەھۋالدا بەل-پۇت، قول ئاسان مۇزلاش، بەل تېلىپ ئاغرىش، ئاق خۇن كۆپىيىش، جىنسىي ھەۋەس سۇسلاش، پۇت-قوللار ئېغىرلىشىش قاتارلىق ئالامەتلەر كۆرىلىدۇ.
سىرتقى تەرەپتىن چارە كۆرۈش: ئىسسىقلىق دورا-دەرمەكلەر بىلەن يۇيۇنۇش، ھورداققا چۈشۈش، شور كاڭغا چۈشۈش، قۇمغا كۆمۈلۈش، تۇخۇم يېغى، زەيتۇن مېيى، قەلەمپۇر مېيى قاتارلىق پەي-نېرىپلارنى قۇۋۋەتلىگۈچى ئىسسىقلىق مايلار بىلەن مايلىنىپ ئاپتاپقا قاقلىنىش قاتارلىق چارىلەرنىڭ قايسى بىر ياكى بىر قانچىسىنى ئەمەلىي شەرت-شارائىتلىرىغا قاراپ ئىشلىتىپ بەرسىلە بولىدۇ.
ئىچكى جەھەتتىن:كۈن ئارىلاپ كەپتەر باچكا شورپىسى، پاقلان گۆشى شورپىسى دېگەندەك ئىسسىقلىق قۇۋۋەت غىزالار بىلەن ئوزۇقلىنىش، ئۇسسۇلۇققا دورىلىق قۇۋۋەت چايلىقى تەڭشەپ ئىچىپ بىرىش، جىگدە چېچىگى ھەسىلى، ياڭاق مېغىزى، قىزىل ئاپتاۋى ئۈزۈم قاتارلىقلارنى بىر مۇددەت ئىستىمال قىلىش ياكى ئوزۇقلىنىش ئادىتى قىلىش قاتارلىقلار.
دورىلاردىن : ئەھۋالنىڭ ئېغىر يېنىكلىكىگە قاراپ ماددىتىل ھايات ئەلا، جاۋارىش زەرئۇنىي، ھەببى ئازاراقى، مەجۈنى ئاياللار گۆھىرى قاتارلىقلاردىن ئىستىمال قىلىپ بەرسە ياخشى مەنپەئەت قىلىدۇ. سىلىنىڭ ئەھۋاللىرىدا ماددىتىل ھايات بىلەن جاۋارىش زەرئۇنىي نى 2 ئاي ئەتراپىدا ئىستىمال قىلىپ بەرسىلە بولىدۇ.
پەرھىز تۇتىدىغان يېمەكلىكلەردىن : داۋاملىق تەكىتلەپ كېلىۋاتقىنىمىزدەك <<قېتىق، سۈت، فىرىما، لەڭپۇڭ-راڭپىزا، كالا گۆشلۈك ئۈگرە، قوينىڭ ئۆپكىسى، ماروژنا، تولۇق پىشمىغان مېۋە-چېۋە ( غورا، توڭ سويما، تەرخەمەك) دېگەندەك قاننى سوۋۇتۇپ پەي-ئەسەبلەرنى ئاجىزلىتىدىغان، شەھۋەت قىزغىنلىقىنى تۆۋەنلىتىدىغان يېمەك-ئىچمەكلەردىن پەرھىز تۇتۇش، ھاۋا سوغۇق پەيتلەردە قىلىنراق كىيىنىش، سوغۇق سۇ بىلەن ھەپىلىشىدىغان ئىشلار ھەم نەم موھىتتا ئۇزۇن تۇرماسلىق دېگەندەك ئىشلارغا دېققەت قىلىش >> لازىم.
__________ بىرزات